Read Ntcham Amos 2 Bible Online

Amos 2 - Ntcham bible

Amos 2

¹Ti-Dindaan nín lī puee sèé: «Moowaab yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Bi wùn̄ Eedoom bɔtiu kpabiŋ an kpántì ŋfantam.

²M làá sēē Moowaab tiŋki ŋŋmi, ní Keeriyooti beeciŋŋi ń wà kí lítí. Moowaab yab làá kpú kuwookpaaŋŋu nì ijanjakuŋkuunti nì iyin dibúndi poon.

³M làá kpɔ̀ bi-bɔtiu, kí kpáaǹ u-kàliŋkpilib dicilpu.» Ti-Dindaan di lī míǹ.

⁴Ti-Dindaan nín lī puee sèé: «Juuda yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Bi fá m-marab, kaa nóó m-koobiliŋ. Kii bi-naanjab nín nìn nóó awaa ŋi kíil̀-bi puee, míǹ ní bi yāntì awaa gbanti mun kíil̀-bi.

⁵M làá sēē Juuda tiŋki ŋŋmi, Jeerusaleem beeciŋŋi làá wà kí lítí.»

⁶Ti-Dindaan nín lī puee sèé: «Isirayeel yab ŋá ikpiti tikpil, bi gíti ŋá an jítì mara pu. An puee m nín pée síiǹ kí ŋá puee, míǹ ní m làá ŋá. Bi nyáfí deedeedaan kí ká animbil, ki nyáfí usoodaan kalaa nimbiliŋ[2]

⁷Bi nyìitī uwɔfi yil ki gùl̀ ntamin, kaa sòoǹ unandaan bɔti deedee. Unil nì u-jipɔɔn kpáfí usapɔɔn pu, ki ŋáań míǹ ki bíiĺ man circir yindi[3].

⁸Ipaan in kɔkɔ pu bi jáaḿ Unimbɔtee, abɔkuti ŋin bi fōol̀ toolima bisoodambi ceeyee pu ní bi dɔ̀[4], ki nyù ndaam min bi fìkēe bi-Nimbɔtiu diikun.

⁹Ama bi-puee m nìn kúntì Amɔɔr yab. Binib gbanti nìn kpílifì ní ki yáà kii seedir nì seeni sufiiyee. M kúntì bi-kɔkɔ pílpil.

¹⁰Man di nyántìń-ni Eejipiti tiŋkin, ki kpōotì-ni abin imuŋku ili kuteeun ní ŋmā kí fōō Amɔɔr yab tiŋki.

¹¹M lēē ni-jipɔmbi biba bí nīn sá m-bɔnaatiliibi, ki lēē ni-naacimpɔmbi biba bí dū bi-ba kí sú-mi. An kaa sá mimmaaa, Isirayeel yab?» Ti-Dindaan di sòon̄ míǹ.

¹²Ama ni nyūntì bin dū bi-ba ki sú-mee ndaam, ki pīiǹ m-bɔnaatiliibi nsan yii bí taa ti nàatī m-bɔti.

¹³«An puee m làá tāā kí mátí-ni, kii tɔrɔku un tú tiwan tikpilee nín tà ki mátí tin kɔkɔ dɔ̄ u-saŋŋu pu puee ní.

¹⁴Binib bin yáb̀ee kaa làá dāá ŋmā kí sāǹ kí ŋmátí, bipɔɔbi pɔŋŋu kaa làá kèetī-bi, bijanjamɔntiibi kaa làá dāá ŋmā kí fīī bi-maŋfal.

¹⁵Upintɔl kaa làá dāá ŋmā kí yūĺ kí tɔ̄. Un ŋūǹ ki sáńee kaa làá dāá ŋmā kí sāǹ kí ŋmátí. Utanjakal kaa làá dāá ŋmā kí fīī u-maŋfal.

¹⁶Ujanjal un cáá dibaatandee làá dāá dū u-janjawanti kí fá, kí sāǹ kí kátí ŋwiin gbanti». Ti-Dindaan di lī míǹ.