Read Ntcham Amos 4 Bible Online

Amos 4 - Ntcham bible

Amos 4

¹Nimbi Samaarii yab nimpoobi, nimbi bin jíń ki gbīfiǹ kii Baasan tiŋkin nasaliiyee, ní pīlifìmaan tibɔti nee. Ni mùul̄ biwɔfib, ki sàantí binandambi ní ki lì ni-calib yii: «Ní cáań ndaam tí nyɔ̀!»

²Ti-Dindaan Unimbɔti un bí circiree, pūtì ki lī yii: «Ŋwiin bí ki dòoń, bi làá dāá dū ipiin kí lɔ̀kɔ̄-ni, kí dáaĺ-ni kí kpáàá búntí kii njɔmpiin nín cútí ujɔm puee ní.

³Kitiŋ guŋŋi laakin bátì bátìi lítèe ní bi làá dī kí cáá-ni kí nyāntí, báà ŋma ń nīn kpèé u-nimbiin. Bi làá dāá cáá-ni kí tɔ̄ ŋgan pú.» Ti-Dindaan di lī míǹ!

⁴«Ní cùmaan Beeteel tiŋkin kí já nì mi, kí cù Giilgaal tiŋkin kí mɔ̀tīí já nì mi tikpil. Ni yaa bàn̄ kutaafaauee, ní cáań kuwaŋkuluu kí ŋá-mi saraa, ní ŋwintataatee ní cáań ni-saalaatiiti.

⁵Ní wà kpɔnɔb bin bi ŋá ŋkpɔnɔnyɔkɔee nsaraafan pu kí ŋá ijaam saraabi[6]. Ní bāakì kí tùkù báà ŋma nlammɔntiim saraabi bin ni ŋá ki tīī-mee, kun puee nimbi Isirayeel yab nín là puee dee!» Ti-Dindaan Unimbɔti di lī míǹ.

⁶«Ni-tiŋkpaammu kɔkɔnee, m yāntì ŋkùm cúú-ni, ki ŋmīntì-ni tijin ni-timbilimmun, ama ní naa fātìi gítìń m-cee.» Ti-Dindaan di lī míǹ.

⁷«Maa yāntì utaa jōō ni-satin ki tin sāā iŋmal ita kudiceeu ń bàń. M yāntì utaa nìn̄ kitiŋ kiban kaa yāntì u nìn̄ kin kíǹee poon, ki yāntì utaa nìn̄ bukpaa bubɔn, ní bun ni u nìn̄ee kpaajinti kūń.»

⁸«Ntimu tikpil nib yíkì ki cūtì kitiŋ kiban ki kpìntī ki nyàab̀ nnyim kí nyɔ̀, ama kaa ká ki nyùn̄ ki bál̀, nì míǹ kɔkɔee, naa fātìi gítìń m-cee.» Ti-Dindaan di lī míǹ.

⁹«M dū iween ki tɔ́ ni-kpaajinti, di sá tì dáá yú tisatin kaa láá bīń ní ki bíi kōō àá ki bíi sù. M yāntì inaakitoon ŋmɔ́ ki bíil̀ ni-kuŋfaati nì fiinyi sufii kpaaŋŋi, nì ni-fiigi sufii nì ni-ɔliifi sufii, ama ní naa fātìi gítìń m-cee.» Ti-Dindaan di lī míǹ.

¹⁰«M dū bìlbil kúm ki tɔ́ ni-waŋkuti pu kii m nín nìn ŋá pu Eejipiti tiŋkinee[7]. M yāntì binannanliibi kūū ni-nipɔmbi, ki cútì ni-taamui ki cáa búntì. M yāntì ni-nikpiliŋ sūū ki núukì ki kɔ́-ni fíŋfiŋ ni-naapaal pu, ama ní naa fātìi gítìń m-cee.» Ti-Dindaan di lī míǹ.

¹¹«M nāaǹ ni-kansikin biba, a lì kii m nín nìn nāaǹ Soodoom nì Goomoora timmu puee[8]. Ni-kansikin bin ŋmátèe sá kii kisanteei kin bi tātèe ní, ama ní naa fātìi gítìń m-cee.» Ti-Dindaan di lī míǹ.

¹²«An puee Isirayeel, kpèè m nín làá ŋá-si puee sɔ̀. Kii tin m làá ŋá-see puee, á bɔ́ntí a-ba kí cīití man a-Nimbɔtiu.»

¹³Di sá yii úǹ di náań ajoon, ki náań kubuŋu, ki lèekī tin u làá ŋée ki dàkà unil. U dù ŋwiimpu kí kpántí kunyeeu ní ki tɔ́kɔ́ kitiŋ kɔkɔ yilpu ki còom̄. Úǹ ní bi yíì yii: <Ti-Dindaan, Unimbɔti Mpɔŋkɔdaan>.