Read Ntcham Amos 7 Bible Online

Amos 7 - Ntcham bible

Amos 7

¹Ti-Dindaan Unimbɔti nín nìn lēē tin ki dàkā-mee sɔ̀. U nìn bíi nāantí inaakitoon. An nìn sá ŋyunti ŋun bi gāā ubɔti taamui mooti ki dóò ní timool fātìi kíĺ ki bíi túkùee.

²Inaakitoonee nín dāa ŋmɔ́ kitiŋee pu mɔsɔnti kɔkɔee ní m bí yii: «Ti-Dindaan Unimbɔti, m gbāam̀-si ní, dū a-nibul kpitii kí pɔ̄-bi. An yaa kaa sá míǹ, mana ní bi làá ŋmátí, bíǹ bin kaa pée náaǹ nee?»

³Ní ti-Dindaan kpántì nlandɔkɔ ní ki bí yii: «Án kaa làá bàń míǹ!»

⁴Ti-Dindaan Unimbɔti gíti lēē tibɔti tiba ki dàkā-mi. U nìn cáá ŋŋmi ki sòoǹ u-nibul bɔti. Ŋŋmifaam nìn yāntì nnyim min dɔ̄ kitiŋ taapuee fóotì ní ki wùn̄ Isirayeel tiŋki búkú buku.

⁵Niinee ní m bí yii: «Ti-Dindaan Unimbɔti, m gbāam̀-si, yàntēe! Yaa sá fám, mana ní a-nibul Isirayeel yab bin kaa náaǹ nee làá ŋmátí?»

⁶Ní ti-Dindaan kpántì nlandɔkɔ ní ki bí yii: «Tin bí nee mun kaa làá bàń míǹ!»

⁷Tin ti-Dindaan nìn gíti lēē ki dàkā-mee sɔ̀. U nìn yú digundi diba caŋin ki ŋúb́ ŋŋmii ŋun bi cáa ŋmàntī kí kpèè yii digundi tèen̄aaa, dàa tèen̄ee.

⁸Ti-Dindaan bālifì-mi yii: «Amoosi, ba ní a wāĺ?» Ní m kíí yii: «M wāĺ ŋŋmii ŋun bi cáa ŋmàntī kí kpèè yii digundi tèen̄aaa, dàa tèen̄ee ní.» Ní ti-Dindaan nìkī ki bí yii: «Kpèè, m làá dū ŋŋmii nee kí ŋmàntī kí kpèè yii m-nibul Isirayeel yab tèen̄aaa, baa tèen̄, di sá yii maa làá ti dū bi-kpitii kí pɔ̄-bi.

⁹M làá kúntí ipaan in pu ní Isaaki naantiibi ŋáań saraabee, kí nàan̄ Isirayeel yab circir paaŋyi, ní kí já nì ubɔti Jeerooboowaam dicaŋkun yab.»

¹⁰Amasiya un nìn sá Beeteel tiŋkin usaraaŋakpilee nìn tú bí tùkù Isirayeel bɔtiu Jeerooboowaam yii: «Amoosi bí Isirayeel yab kansikin ki bíi gbì a-taapu. Binib gīī nì tibɔti tin u bí ki sòoǹee.

¹¹Tibɔti tin Amoosi sòon̄ee sèé: <Bi làá kpɔ̀ Jeerooboowaam kujaaun, ní bí dāá cáá Isirayeel yab kí cùnnì kuyuŋu bí nīn dátiǹ bi-tiŋki.>»

¹²Niinee ní Amasiya bí Amoosi yii: «Sii un wāĺee, yīkì doo kí nīn gítí Juuda tiŋkin. Niinee, a ŋūǹ kí nīn nàatī tibɔti kí nīn kāntí ki jīǹ.

¹³Ama á taa ti nàatī tibɔti Beeteel tiŋkin doo! Di sá yii doo sá ubɔti circir paaŋŋu laŋki, dibeel nimbɔtidiiku ní.»

¹⁴Ní Amoosi kíí Amasiya yii: «Maa sá ubɔnaatil, kaa tí nyánní bibɔnaatiliibi kitil diban. M sá upikpaal ní ki kpèé siikoomɔɔr sufii.

¹⁵Ama ní ti-Dindaan cúú-mi ki páatì m-piii boon ní ki bí yii: <Cáá m-bɔti kí nàatī m-nibul Isirayeel yab.>

¹⁶Ama sii Amasiya bí-mi yii ḿ taa dū Unimbɔti bɔti kí nàatī Isirayeel yab, kí taa sòoǹ kí tɔ̄ Isaaki naantiibi pu. Míǹ puee kɔŋkɔnnee, pīlifì tibɔti tin ti-Dindaan sòon̄ a-puee.

¹⁷A-nimpuu làá kpántí kilaakpaai kitiŋin. Bi làá kpɔ̀ a-jipɔmbi nì a-bisalib. Bi làá ŋmàntī a-kpaatanti kí dūú yàkatī kí tīī biba. Sisi a-ba làá kpúnní kitiŋ kin yab kaa nyí Unimbɔtee ni, ní bí cùnnì Isirayeel yab kuyuŋu bí nīn dátiǹ bi-tiŋki.»