Read Ntcham Amos 8 Bible Online

Amos 8 - Ntcham bible

Amos 8

¹Ti-Dindaan Unimbɔti nìn lēē asubil ŋin mántèe kukabiku ki dàkā-mi.

²U nìn bālifì-mi yii: «Amoosi, ba ní a wāĺ?» Ní m kíí-u yii: «Kukabiku nì asubil ŋin mántèe.» Niinee ní ti-Dindaan bí-mi yii: «M-nibul Isirayeel mántì ki bàn̄ dikúntil. Maa ti làá dūú pɔ̄-bi.»

³Ti-Dindaan Unimbɔti di lī yii: «Yaadalee ilan in bi gà dibeecindee làá dāá kpántí ikpiisilan. Anikpil làá dāá nīn wīikí tikpilku. Bi làá dāá dū anikpil kí fá an kɔkɔ pu. Án làá dāá ŋmīĺ an kɔkɔ pu fɔ́ŋfɔŋ!»

⁴Nimbi bin tà biwɔfib pu ki còom̄ee, nimbi bin là kí kúntí binandambi kitiŋ nee puee, ní pīlifìmaan tibɔti tin m làá sòoǹ nee.

⁵Ni kā ki lì yii: «Ba dal ní uŋmapɔɔn jiŋaaliu làá nín jītí tí ŋmā kí nyāfì ti-kpaajinti dee? Ba dal ní ŋwiŋŋuŋfikaa làá nín jītí tí ŋmā kí nyāfiǹ binib bilee dee?» Ti làá bàtī tiwaŋŋmantikaal wíiŋŋu pu, kí gbéeǹ animbil ŋmàntikaati nyiŋfiŋu pu, kí tútí ti-saniyab bí taa tí nín̄ ŋmàntī tiwan deedee.

⁶Ti làá dū animbil kí dā unandaan ní kí dū kalaa nimbiliŋ kí dā usoodaan. Ti làá nyāfì kí kpáaǹ tijaliŋgbiti.

⁷Ti-Dindaan pūtì ní ki lī yii: «Kitiŋ kin pu Jaakɔb naantiibi gúntí bi-bee puee, m kpá kí súntí tin kɔkɔ bi ŋáańee pu.»

⁸An puee kitiŋ nee làá cìŋkì, ní ki-nib kɔkɔ ń kàl̄ dikpool. Kii Eejipiti mɔɔl Niil nín yaa gbí an yíkí puee, míǹ ní kitiŋ nee làá yīkì yilpu, ní kí fàtīí lítí bɔ̀b.

⁹Ti-Dindaan Unimbɔti lī yii: «Ŋwiin gbantee, m làá dāá yàntī ŋwìiń ń jēetí kuwiŋkaŋu pu, ní kí yàntī kitiŋ kɔkɔ ń kɔ́ dibɔmbɔndin ŋwiimpu.

¹⁰M làá yàntī ni-jiŋaalib ń kpántí akpoo ní kí yàntī ni-laŋyi kɔkɔ ń kpántí ikpiisilan. Báà ŋma làá dāá nīn pēē kpɔsatab ní. Báà ŋma làá dāá pée kòol̀ diyibaakpandi kii unil jipɔmbaabil nín yaa kpíì u kòol̄ puee. Ŋwiin gbanti làá dāá kúntí nì ntuntun ní.»

¹¹Ti-Dindaan Unimbɔti di lī yii: «Ŋwiin bí ki dòoń, m làá dāá dū ŋkùm kí tɔ̄ kitiŋ nee pu. Ŋkùm làá dāá cúú binib, ama kaa dāa sá tijikaal kùm. Nnyinnyoo làá dāá cúú binib, ama kaa dāa sá nnyim nyinnyooŋu. Ama man ni-Dindaan nyɔɔbundi kùm nì di-nyinnyooŋu di làá dāá cúú-bi.

¹²Binib làá dāá nīn tú ki yìiǹ an kɔkɔ pu, kí yīkì tiŋku ubɔ kí cáá sāā un kíǹee, kí yòon̄ ŋgan pú kí cù ŋwìiń nyalaŋki pú, ki bàà pée nyàab̀ kí gbìl̄ man ni-Dindaan nyɔɔbundi ama kaa làá dāá ká.

¹³«Ŋwiin gbantee, bisapɔnnyaambi nì binaacimpɔmbi làá dāá kpú nnyinnyoo.

¹⁴Bin kɔkɔ pùtī Samaarii waal yindi, bin lì yii: <Nì Daani waal yindi pu!> àá <nì Beerseeba waasaŋŋu yindi puee>, bi-kɔkɔ làá dāá lítí kaa làá ti yīkì.»