Read Ntcham Abdias 1 Bible Online

Abdias 1 - Ntcham bible

Abdias 1

¹Tibɔti tin ti-Dindaan Unimbɔti lēē ki dàkā Oobadiyee. U nín sòon̄ Eedoom tiŋki pu puee sɔ̀. Ti-Dindaan yāntì ti gbìl̄ tibɔti nee, bi tú ntuun ŋubɔ atimbun kɔkɔn ŋu lì yii: «Yīkìmaan! Tí cùú já nì Eedoom tiŋki!»

²Ti-Dindaan lī yii: «Eedoom, atimbun kɔkɔnee, m làá yàntī á kpántí kiwaŋwaai. Báà ŋma làá nīn kpèé ki sìŋkīǹ-si.

³A-lambikpaandi di kíiĺ-si! A kóò itaŋkpalɔkɔn, ní ki máń a-diiŋŋi ki tɔ́kɔǹ ajoon yilpu, ní ki lì yii: <Ŋma di ŋūǹ kí kpákatí-mi taapu?>

⁴Báà a yaa là kí ŋàaǹ kí kɔ́ kutaa kii ukaalunee, kí mā a-diiku iŋmalbijaa kansikin, see m kpákatìń-si taapu!

⁵Binaayub àá kunyeeu fukuliliibi yaa kɔ́ a-puee, bi yòontí tin kɔkɔ bi ŋūǹee ní, baa kīntí-si báà tiba. Bitɔntɔnliibi bin kìtī fiinyi subiliŋee yaa kɔ́ a-saakunee, tin làá pée kíńee di sá tilulifikaal.

⁶Bi fúkúl̀ nimbi Eesayuu naantiibi pílpil, bi bīitì ni-gaajawanti tin bí dibalinee pu!

⁷Bi jìn̄-si ki nyántì a-tiŋkin, si nì bin pēē kinyɔkɔee nyáń a-boon. A-bɔɔmɔntiibi jáń ki pɔ́ɔkiǹ-si. Si nì bin nìn jīǹ disambibaantiilinee bíi pīil̀-si titalindi taapu taapu. Bi sòoǹ ni-pu yii: <Waa ti cáá diyil!>

⁸Tiŋman, man ni-Dindaan nín lī puee sɔ̀. M-ŋuul wiiŋŋu dalee, m làá kpɔ̀ kí céetí biciŋfitiibi Eedoom tiŋkin, maa làá kíń Eesayuu jool pu unyil ubambaanti.

⁹Teeman[1] tiŋki, dinyoondi làá dāá kɔ́ a-janjaliibi, án nín làá ŋá pu bí kpɔ̀ kí kúntí unil sá kamaa Eesayuu jool puee.

¹⁰A fúkúl̀ ki kūū a-nabiki, Jaakɔb naantiibi. An pu ní icoo làá cúú-si tikpil ní bí kúntí-si kí nīn pée cá jaanjaan.

¹¹Ŋwiin ŋun a nìn yú ki kpèé binannanliibi jáń ki pɔ́ɔkiǹ u-janjaliibi ki kɔ́ u-tiŋkin, ki tɔ́ Jeerusaleem pu kasee, a mun nìn bí kii bi-kansikin ubɔee dee.

¹²Eedoom, aa bàà nìn máaǹ kí nīn fàal̀ ŋyunti ŋun a-nabiki kɔ́ dinimbinaamandinee. Aa bàà nìn máaǹ kí nīn fàal̀ ŋyunti ŋun bi bíi nàantí Juuda yabee. Aa bàà nìn máaǹ kí nīn bíi lāā-bi ŋyunti ŋun bi kɔ́ dinimbinaamandi poonee.

¹³Aa bàà nìn máaǹ kí kɔ́ m-nibul tiŋkin, ŋyunti ŋun bi nìn bíi nàantí-kèe. Aa bàà nìn máaǹ kí nīn fàal̀ u-nimbinaamandi wiiŋŋu dal. Aa bàà nìn máaǹ kí yòon̄ u-gaajawanti ŋwiin ŋun bi nìn bíi fúkuĺ-uee.

¹⁴Aa bàà nìn máaǹ kí nīn yú isampuyakati pu ki kù bin nìn sáń kí ŋmátée, kaa bàà nìn tí máaǹ kí dū bin baa kūūyee kí ŋá binannanliibi ŋaan nnaabu wiiŋŋu gbanti dal.

¹⁵Di sá yii ti-Dindaan wiiŋŋu ŋun u làá sòoǹ atimbun kɔkɔ bɔtee tóobiń. A nín ŋá bin beeyee puee, míǹ ní bi làá téeǹ-si. A-tuŋkpitiŋ làá dāá fàtīí gítí a-pu ní.»

¹⁶«Nimbi Isirayeel yab, kii ni nín nìn nyùn̄ m-ŋuul kii ndaamee m-circir jool puee, míǹ mbaantiim ní atimbun kɔkɔ làá dāá nyɔ̀-dì kí taa gbèen̄. Ŋi làá dāá nyɔ̀-dì kí gbí, ní boonee kí wāŋkì.

¹⁷Ama bin yaa láa bí kaa kpíìyee làá dāá sāǹ kí kɔ́ Siiyɔn jool. Dì làá fàtīí kpántí circir jool. Jaakɔb naantiibi làá dāá fàtīí fōō bi-tiŋki bin nìn fōō-kèe ŋaan.

¹⁸Jaakɔb naantiibi làá dāá nīn sá kii ŋŋmee ní, Jooseefi naantiibi làá dāá nīn sá kii diŋmilimbilee. Ama Eesayuu naantiibi làá dāá nīn sá kii timoolee ní. Bi làá dāá wà Eesayuu naantiibi ní kɔkɔ múb.»

¹⁹Bin kóò ŋgiil pú tiŋkee di làá dāá nīn yì Eesayuu jool nì Seefeelaa tiŋki kin pu Fiiliistii yab kóòyee. Bi làá dāá nīn yì Eefiraayiim tiŋki nì Samaarii tiŋki mun, ní Beenjameen ń dāá nīn yì Galaadi tiŋki.

²⁰Isirayeel beel ŋgan pú yab bin bi nìn cúú ki cūnnì kuyuŋuee làá dāá kpántí dijanjakitikpaandi. Bi làá dāá já kí fōō Kanaan yab tiŋki kí tin sāā Sareepita tiŋki. Jeerusaleem yab bin bi nìn cúú ki cūnnì kuyuŋu bi bí Seefaradee làá dāá já kí fōō ntimu mun bí ŋgiil púee.

²¹Bi nín jáń ki jíń mimmee ní bí jɔ̄m̀ Siiyɔn jool pu. Niin ní bi làá dāá nīn bí ní kí jī Eedoom jool pu dibeel. Ti-Dindaan di dāa sá ubɔti!