Read Ntcham Jonas 2 Bible Online

Jonas 2 - Ntcham bible

Jonas 2

¹Bi dū Yoona ki tɔ́ tiŋkunee ní ti-Dindaan lēē ujɔŋkpaan ubɔ ki tú u dū Yoona ki náĺ, ní u kāl̀ ujɔmee poon iwiin ita, ŋwiimpu nì kunyeeu[4].

²Yoona kā ujɔm poonee ní ki mēē ti-Dindaan u-Nimbɔtiu ŋwimmeem yii:

³«M nìn bí dinimbinaamandin, ki tíminsì ki yíiń sii ti-Dindaan ní a kíí-mi. M nìn sīntì taapu taŋkpiilin ki kúuǹ ki yíiń-si á dāá jòoń-mi ní a gbìl̄ m-timinsii.

⁴A dū-mi ki tɔ́ tiŋku poon m nín sìntī nnyimbuun taapu taapu ní nnyim māntìi tú-mi an kɔkɔ pu, ní a yāntì tinyiŋgban kɔkɔ nì nnyinjil dòoń ki jītí m-pu.

⁵Ní m lī m-neen yii: <Man nì sii yākatì tɔbin ní nee, m pée gíti kpá kí ká-si! Nì míǹ kɔkɔee m gbíntìi bíi kpèé a-circir kɔŋkooŋŋu watil pú>.

⁶Nnyim jɔ́m̀ ki tin sāā m-neen, m mɔ̄tìi nín sìntī tiŋku taapu taapu, ní timool tin bí nnyiminee dūu lùl̄ m-yil.

⁷M sīntì doooo taapu taapu ki tin nyáń ajoon nyeel pu, ditaŋkpiil dū di-punyɔmmu ki pīiǹ m-pu kí nīn pée cá jaanjaan. Ama ní sii ti-Dindaan m-Nimbɔtiu fātìi nyántìń-mi m dáá gbíntìi bí dimaŋfalin.

⁸Ŋyunti ŋun m ká yii an dóò m-puee, m-landɔkɔŋu fātìi gítì sii ti-Dindaan pu, ní m yāntì m-wimmeem nín jɔ́ḿ a-watil pú ki tin bàn̄-si a-circir kɔŋkooŋŋu poon.

⁹Bin dū awaa ŋin kaa bí tibanee ki yíĺ bi-yilee, bíǹ kaa ti cáá diyimɔɔl kí ká difiil dee!

¹⁰An yaa kíǹ kii mamee, man làá gāā ilan kí nyɔ̄ŋkì-si, ki làá ŋá saraa kí tīī-si, ki làá ŋá tin ní m pōoǹ yii m làá ŋá kí tīī-see. Sii ti-Dindaan cee ní difiil nyēeń!»

¹¹Míǹ boonee ní ti-Dindaan pú ujɔmee kinyɔkɔ u fātìi wūliŋkì Yoona ki bíl̀ tiŋku gbandi.