Read Ntcham Jonas 3 Bible Online

Jonas 3 - Ntcham bible

Jonas 3

¹An ŋá mimmee ní ti-Dindaan sòon̄ nì Yoona nliliitiim ki bí-u yii:

²«Yīkì kí cù Niiniifi kitiŋkpaaŋŋi poon kí dū tibɔti tin m dūu ŋúbiǹ-see kí bāakì kí tùkù niin yab.»

³Niinee ní Yoona yíkì ki nín cá Niiniifi tiŋkin, ki nóó nì ti-Dindaan nín bí yii ú ŋá puee. Niiniifi tiŋki gbanti nìn sá kitiŋkpaŋkpaaŋŋi ní, an kaa cáá bí lì. Iwimmɔn ita kɔkɔ ní unil nìn dùŋfī ní kí còom̀ kí pùntī-kì.

⁴Yoona kɔ́ kitiŋin ki kíĺ ki cōom̀ ŋwiin ŋubɔ ní ki báakì ki lī yii: «An gíti kíǹ iwiin imuŋku ili Niiniifi tiŋki làá kúntí!»

⁵Niiniifi yab nìn fōō Unimbɔti bɔti tin u sòon̄ee ki kíí[5], ní bi yóoǹ yii báà ŋma ń bóob́ kinyɔkɔ. Di sá kí yòon̄ bikpilib kí tin cáá sāā ŋwaamuee, báà ŋma nìn dū kutuku ki pēeǹ kí dàkà yii bi fá bi-kpitii ki kpántì bi-ba.

⁶Tibɔti dūu bàn̄ Niiniifi bɔtiu ceeyee ní u yíkì u-beejal pu, ki cúú dibeebɔkutil din u pēēyee ki pēetì, ki dū kutuku ki pēeǹ ní ki kāl̀ ŋfantamin[6].

⁷U ŋée ní ki yāntì bi báakì Niiniifi tiŋki kɔkɔn ki lī yii: «Ubɔti nì u-kpambaliŋ yóoǹ mara yii binib nì tiwaŋkuti, inaa nì ipii nì iŋoobu, báà ubɔ ń taa jī tijinaaa, kí taa nyɔ̀ nnyim mun.

⁸Binib nì tiwaŋkuti kɔkɔ ń dū kutukub kí pèen̄ kí tīminsì kí yíiń Unimbɔti nì bi-pɔŋŋu kɔkɔ. Báà ŋma ń dū isaŋkpiti in u còom̄ee nì tipɔmbɔti tin u ŋáańee kí fá.

⁹Án yaa yíì Unimbɔti làá kpántí u-landɔkɔŋu, kí yàntī u-ŋuukpaandi din u gíí ti-puee ń sɔ̀ŋkì ní tí ŋmátí kí taa kpú!»

¹⁰Unimbɔti nín ká yii Niiniifi yab pɔ́ɔǹ bi-ba ki dū isaŋkpiti in bi nóóyee ki fée, ní u kpántì u-landɔkɔŋu kaa ti dáaĺ bi-tafal kii u nín bàà là kí ŋá puee.