Read Ntcham Nombres 1 Bible Online

Nombres 1 - Ntcham bible

Nombres 1

¹Ti-Dindaan sòon̄ nì Mooyiisi circir kɔŋkooŋŋu poon Siinaayi teekun. An nìn sá Isirayeel yab nín nìn nyáń Eejipiti tiŋkinee binliliitiil uŋmaliliiti wimpeekaaŋu dal. Ti-Dindaan nìn bí Mooyiisi yii:

²«Ní kàaǹ Isirayeel yab kɔkɔ kí nóó nì bi nín pēē pēē mmaal nì adican puee. Ní ŋmà uninja kamaa yindi

³kí yòon̄ bininjab bin cáá abin mmuŋku kí nīn cáa cá, ki bàn̄ kí cù kujaau Isirayeel yab kansikinee. Sii nì Aarɔn, ní kàaǹ-bi kí nóó nì bi-janjakitiŋi nín bí pu a-ba a-bee.

⁴Ní lēē kunaakoou kamaa poonee kudicaŋu kubɔ kpiliu kí ŋàl̄ ni-ba.

⁵Bikpilib bin ni làá dūú ŋàl̄ ni-bee yiŋŋi sɔ̀. Rubeen naakookunee, Seedeeyuur jipɔɔn Eelsuur.

⁶Simeeyɔn naakookunee, Suriisadaayi jipɔɔn Seelumiyeel.

⁷Juuda naakookunee, Amiinadaab jipɔɔn Naasɔn.

⁸Isakaar naakookunee, Suwaar jipɔɔn Neetaneeyeel.

⁹Sabulɔn naakookunee, Eelɔn jipɔɔn Eeliyaab.

¹⁰Eefiraayiim, Jooseefi jipɔɔn naakookunee, Amiiyuudi jipɔɔn Eeliisama. Manasee, Jooseefi jipɔɔn naakookunee, Peedasuur jipɔɔn Gamaliyeel.

¹¹Beenjameen naakookunee, Giideewoonii jipɔɔn Abidan.

¹²Daani naakookunee, Amiisadaayi jipɔɔn Ayeeseer.

¹³Aseer naakookunee, Ookiran jipɔɔn Pagiyeel.

¹⁴Gaadi naakookunee, Eeliyasaafi jipɔɔn Deewuyeel.

¹⁵Neefitalii naakookunee, Eenan jipɔɔn Akiira.»

¹⁶Binib bin bi nìn lēē bí nīn sá samaa kpilibee dee. Bi nìn sá bi-naakɔtin bikpilib, ní ki nìn sá bin kpòotī bi-janjakitiŋee.

¹⁷Ní Mooyiisi nì Aarɔn dū bininjab bin bi nìn lēē gbantee ki ŋàl̄ bi-ba.

¹⁸Bi nìn yíiń samaa kɔkɔ ki kpáfì uŋmaliliiti wimpeekaaŋu dal, ní ki ŋmàn̄ Isirayeel yab bin kɔkɔ cáá abin mmuŋku kí nīn cáa cée yiŋŋi, ki nóó nì bi nín pēē pēē mmaal nì adican puee.

¹⁹Mooyiisi nìn kàan̄ Isirayeel yab Siinaayi teekun kii ti-Dindaan nín nìn tīī-u mara puee.

²⁰Bi nìn kàan̄ Jaakɔb jipɔŋkpiliu Rubeen naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

²¹Bi nìn nyáń binib kutukub imuŋku ili nì biluu nì binib alaataa aŋmoo.

²²Bi nìn kàan̄ Simeeyɔn naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

²³Bi nìn nyáń binib kutuku ubɔ kpá kutukub imuŋku ita nì binib alaataa ata.

²⁴Bi nìn kàan̄ Gaadi naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

²⁵Bi nìn nyáń binib kutukub imuŋku ili nì biŋmoo nì alaataa aluu nì imuŋku ili nì binib saalaa.

²⁶Bi nìn kàan̄ Juuda naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

²⁷Bi nìn nyáń binib kutukub biluu kpá kutukub imuŋku inaa nì binib alaataa aluu.

²⁸Bi nìn kàan̄ Isakaar naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

²⁹Bi nìn nyáń binib kutukub biluu kpá kutukub imuŋku ita nì binib alaataa anaa.

³⁰Bi nìn kàan̄ Sabulɔn naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

³¹Bi nìn nyáń binib kutukub bita kpá kutukub imuŋku ita nì binib alaataa anaa.

³²Bi nìn kàan̄ Jooseefi jipɔɔn Eefiraayiim naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

³³Bi nìn nyáń binib kutukub imuŋku ili nì alaataa aŋmoo.

³⁴Bi nìn kàan̄ Manasee naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

³⁵Bi nìn nyáń binib kutukub mmuŋku nì saalaa nì bili nì binib alaataa ali.

³⁶Bi nìn kàan̄ Beenjameen naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

³⁷Bi nìn nyáń binib kutukub biŋmoo kpá kutukub imuŋku ili nì binib alaataa anaa.

³⁸Bi nìn kàan̄ Daani naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

³⁹Bi nìn nyáń binib kutukub imuŋku ita nì bili nì binib alaataa aluli.

⁴⁰Bi nìn kàan̄ Aseer naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

⁴¹Bi nìn nyáń binib kutukub imuŋku ili nì ubɔ nì binib alaataa aŋmoo.

⁴²Bi nìn kàan̄ Neefitalii naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi.

⁴³Bi nìn nyáń binib kutukub imuŋku ili nì saalaa nì bita nì binib alaataa anaa.

⁴⁴Mooyiisi nì Aarɔn nì Isirayeel yab naakɔti kpilib saalaa nì bili bin bi nìn lēēyee nín nìn kàan̄ binib biŋyee nyɔkɔm dee.

⁴⁵Isirayeel yab bininjab bin bi nìn kàan̄ ki nóó nì bi-dicaŋŋi, ki cáá abin mmuŋku kí nīn cáa cá, ki bàn̄ kí cù kujaauee

⁴⁶nìn nyáń binib kutukub alaataa aluu nì bita nì alaataa aŋmoo nì imuŋku ili nì binib saalaa.

⁴⁷Baa nìn kàan̄ Leefii naakookun yab ki kútì Isirayeel naakɔti tin kíǹee yab pu.

⁴⁸Di sá yii ti-Dindaan nìn bí Mooyiisi yii:

⁴⁹«A yaa làá kàaǹ Isirayeel yabee, á yàntī Leefii naakookun yab kí taa kàaǹ-bi.

⁵⁰Á dū circir kɔŋkooŋŋu tundi nì ŋu-sambiliŋ nì tin kɔkɔ pée sá ŋu-wantee kí ŋúbíǹ-bi. Bíǹ di làá nīn tūntí circir kɔŋkooŋŋu nì ŋu-wanti kɔkɔ, ní kí nīn tūǹ ŋu-poon tuuŋŋi kɔkɔ. Bíǹ di làá gāā bi-tantib kí màntīí tū-ŋu.

⁵¹Ni yaa làá yīkì dinaapaal din puee, bíǹ di làá cóotí circir kɔŋkooŋŋu. Ni yaa tí bàn̄ laakin ki làá kàl̄ee, bíǹ di làá dū circir kɔŋkooŋŋu kí cóoń. Unifantanti ubɔ di yaa sútìi pìl̄ circir kɔŋkooŋŋu gbantee, bí kpɔ̀ udaan.

⁵²Ni yaa bàn̄ laakin ki làá kàl̄ee, Isirayeel yab báà ŋma ń gāā u-tantiu u-janjakitil paaŋŋu pu, kí nīn kɔ́ĺ di-falaŋkau.

⁵³See Leefii naakookun yab baba di làá gāā bi-tantib kí kɔ́ĺ circir kɔŋkooŋŋu, ní kí nīn tūǹ bi-tundi nín sá puee. Mimmee maa làá dāá fōō Isirayeel yab pu diŋuul.»

⁵⁴Ti-Dindaan nín nìn tīī Mooyiisi mara Isirayeel yab ń ŋá puee, míǹ ní bi nìn ŋá deedee.