Read Ntcham Nombres 10 Bible Online

Nombres 10 - Ntcham bible

Nombres 10

¹Ti-Dindaan tùkū Mooyiisi yii:

²«Á dū animbil kúti kí mɔ́ɔ́ akantán ali kí nīn cáa búǹ ki yíì Isirayeel samaau ki kpáfí. An yaa tí ŋmāntì bí yīkì dinaapaal puee, á búń bí yīkì.

³Bi yaa búń akantán liitil dicilpuee, an sá Isirayeel yab kɔkɔ ní ń kpāfì a-cee circir kɔŋkooŋŋu nyɔkɔpu.

⁴Dikantámbaantiil ní bi yaa búńee, mimmee an sá Isirayeel yab naakɔti kpilib ŋmaniŋma di làá kpāfì a-cee.

⁵Bi yaa búń dikantándi ikuŋkuunti ŋmàl̄ee, bin bí dinaapaal ŋwìiń nyalaŋki púee ń yīkì.

⁶Bi yaa búń nliliitiim nì ikuŋkuuntee, bin bí dinaapaal ŋgiil púee ń yīkì.

⁷Ama bi yaa làá búń dikpafil kantándee, ikuŋkuunti ń taa nín̄ bí.

⁸«Aarɔn naantiibi bisaraaŋaliibi baba di cáá nsan kí búń dikantándi. Án nīn sá mara un ní ni nì ni-naantiibi làá nīn ŋúb́ kí nīn cá jaanjaanee.

⁹«Ni yaa làá yīkì ni-tiŋkin kí cùú jáǹ ni-nannanliibi bin táká-nee, ní búń akantán nì ijanjakuŋkuunti. An di làá yàntī ḿ téetí ni-pu, ní man ni-Dindaan ni-Nimbɔtiu ń dāá fīī-ni ni-nannanliibi gbanti ŋaan.

¹⁰Ni-jiŋaalib wiiŋyi nì uŋmal kamaa wimpeepeekaaŋu nì jiŋaalib bin kíǹeeyee, ní nīn búǹ dikantándi ŋyunti ŋun ni bíi ŋáań saraawɔkaa nì mpèé saraau ki tìì-mee. Míǹ di làá yàntī ní m téetí ni-pu. Man di sá ni-Dindaan ni-Nimbɔtiu.»

¹¹Isirayeel yab nín nìn nyáń Eejipiti tiŋkin, dibinliliitiil ŋmaliliitiu poon, iwiin mmuŋku dalee ní ditagbandi din nìn dàn̄ tanti un poon Dipoondi dakaau bée yíkì.

¹²Isirayeel yab nìn yíkì Siinaayi teekun ki nìkī bi-saŋkindi. Ní ditagbandee cūtìi yúl̀ Paaran teekun.

¹³Mpeepeekaam dee Isirayeel yab ń nìn yīkì dinaapaal pu ki nóó nì ti-Dindaan marau un Mooyiisi nìn dūu tīī-bee[19].

¹⁴Juuda naakooku janjakitil nì bi-falaŋkau di nìn péé ki yíkì ki līntì nsan. Bi-janjakpiliu di nìn sá Amiinadaab jipɔɔn Naakɔn.

¹⁵Suwaar jipɔɔn Neetaneeyeel di nìn sá Isakaar naakookun yab janjakpiliu.

¹⁶Eelɔn jipɔɔn Eeliyaab di nìn sá Sabulɔn naakookun yab janjakpiliu.

¹⁷Bi nìn cúú circir kɔŋkooŋŋu ki cóotì ní Geersɔn nì Meerarii naantiibi yab yōoǹ ki túǹ.

¹⁸Rubeen naakookun yab janjakitil nì bi-falaŋkau di nìn páaǹ bi-boon. Bíǹ janjakpiliu di nìn sá Seedeeyuur jipɔɔn Eelsuur

¹⁹Suriisadaayi jipɔɔn Seelumiyeel di nìn sá Simeeyɔn naakookun yab janjakpiliu.

²⁰Deewuyeel jipɔɔn Eeliyasaafi di nìn sá Gaadi naakookun yab janjakpiliu.

²¹Keeyaati naakookun yab Leefii yab bin tūntí circir wantee di nìn páaǹ bíǹ boon. Leefii yab bin kíǹee nìn līntì ki cūtìi bíi cōontí circir kɔŋkooŋŋu bi-yab ń nín bàń.

²²Míǹ boonee, Eefiraayiim naakookun yab janjakitil nì bi-falaŋkau di nìn páaǹ. Bi-janjakpiliu di nìn sá Amiiyuudi jipɔɔn Eeliisama.

²³Peedasuur jipɔɔn Gamaliyeel di nìn sá Manasee naakookun yab janjakpiliu.

²⁴Giideewoonii jipɔɔn Abidan di nìn sá Beenjameen naakookun yab janjakpiliu.

²⁵Daani naakookun yab janjakitil nì bi-falaŋkau di nìn lúŋkì. Bíǹ di nìn sá bin pá akiti kɔkɔ boon ki cí-bee. Bi-janjakpiliu di nìn sá Amiisadaayi jipɔɔn Ayeeseer.

²⁶Ookiran jipɔɔn Pagiyeel di nìn sá Aseer naakookun yab janjakpiliu.

²⁷Eeyinan jipɔɔn Ayiira di nìn sá Neefitalii naakookun yab janjakpiliu.

²⁸Isirayeel yab nì bi-janjakitiŋi nín nìn máaǹ kí dī tɔb pu kí yīkèe, míǹ ní bi nìn dī ki yíkì.

²⁹Mooyiisi bí u-coo Reewuyeel un sá Madiyan yab tiŋkinee jipɔɔn Oobaab yii: «Ti làá yīkì kí nīn cá kitiŋ kin poon ti-Dindaan pōoǹ yii u làá tīī-tee dee. Dāan̄ ti nì si ń cù, sii mun ń dāá ká tiŋan tin ti-Dindaan làá ŋá-tee poon tiba[20].»

³⁰Ní Oobaab kíí-u yii: «Aayee, maa làá cù. M làá gítí m-tiŋkin, m-dicaŋku poon.»

³¹Ní Mooyiisi bí-u yii: «M gbāam̀-si, taa dū-ti kí fá. Di sá yii sii nyí kuteeun jaaŋŋi ki ŋūǹ kí dàkà-ti laakin ti máaǹ kí nīn kàal̀ee. Nín̄ bí ti-cee ki dàkà-ti nsan.

³²A yaa céeǹ-tee, ti-Dindaan yaa làá tin ŋá-ti tiŋan tiŋyee, a mun dāa cáá tiba poon.»

³³Ní bi yíkì ti-Dindaan jool taapu ki cōom̀ iwiin ita. Iwiin ita gbantee, ti-Dindaan dakaau nìn līī bi-nyɔkɔpu ki nyàab̀ mpaan ŋun ŋān̄ee bí kàl̄[21].

³⁴Bi yaa yíkì dinaapaal pu ŋwiimpuee, ti-Dindaan tagbandi dàn̄ bi-pu ní bi còom̄.

³⁵Ŋyunti ŋun bi yaa làá yòon̄ ti-Dindaan dakaauee ní Mooyiisi ń téeń yii: «Ti-Dindaan, lìntī nyɔkɔpu a-pulincɔntiibi ń yàl̄, a-nannanliibi ń wāŋkì a-nimbiin[22]!»

³⁶Ní bi yaa làá tí dū u-dakaauee kí yóońee, ní ú tí téeń yii: «Ti-Dindaan, fàtīí gítiń kí nīn kóò Isirayeel yab dicaŋŋi cutimaanyi kansikin!»