Read Ntcham Nombres 12 Bible Online

Nombres 12 - Ntcham bible

Nombres 12

¹Mooyiisi nìn cáá unimpu ubɔ u sá Kuusi tiŋkin, ní Miiriyam nì Aarɔn nìn bíi kpākantí-u u-nimpucáatam gbanti pu.

²Bi nìn bí ki lì yii: «Mooyiisi baba pu ní ti-Dindaan pée dī ki sòon̄aaa? Waa dī ti mun pu ki sòon̄aaa?» Ní ti-Dindaan gbìl̄ tin bi sòon̄ee.

³Di sá Mooyiisi nìn sá unil un sīntì u-ba taapu tikpil ki jítiǹ kitiŋ pu nib kɔkɔee ní.

⁴Kpalaayee ní ti-Dindaan yíiń Mooyiisi nì Aarɔn nì Miiriyam ki bí-bi yii: «Ni-taatil ń dāan̄ circir kɔŋkooŋŋu nyɔkɔpu.» Ní bi nyáń ki búntì.

⁵Ti-Dindaan nìn sīntìń ditagbancancaal poon ki yúl̀ tanti punyɔkɔpu. Ní ki yíiń Aarɔn nì Miiriyam, ní bi-liitil nyáń ki síl̀[26].

⁶Ní ti-Dindaan bí-bi yii: «Ní pīlifì tin m cáá kí tùkù-ni nee tiŋan. Ni-kansikin m-bɔnaatiliu yaa bée, an sá nì dileedakal nì tidamintiil poon ní man ni-Dindaan lèekī m-ba ki dàkà-u, ní ki sòoǹ nì u.

⁷Ama m-tɔntɔnliu Mooyiisi úǹ cee kaa sá míǹ. Úǹ kpèé m-nibul mmɔntiim ní ki bí deedee[27].

⁸M yú u-nimbiin ní ki sòoǹ nì u, ní ki cántí-u tikɔkɔ ní u wāĺ man ni-Dindaan naŋku. Ba pu ní naa fāŋkì m-tɔntɔnliu Mooyiisi ní ki kpákáǹ-u míǹ?»

⁹Ní ti-Dindaan fōō bi-pu diŋuul, ní ki fātìi nín jɔ́ḿ.

¹⁰Ditagbandee tin lì yii dì yíkí tanti puee, Miiriyam wunti pu dinyaŋgbampindi píń ki pīiǹ kii ntaayimee. Aarɔn fātìi kpēēyee dinyaŋgbandi píń Miiriyam pu.

¹¹Ní Aarɔn bí Mooyiisi yii: «M-kpiliu, m gbàam̄-si, taa pà-ti ti-kpitii in ti-gbaandi yāntì ti ŋá-see paati.

¹²Taa yàntī Miiriyam ń kpántí kii kibiki kin kpíì ki-na poon ki-wunti dijandi sūū ki wāatì bi nín màl̄-kèe.»

¹³Niinee Mooyiisi mēē ti-Dindaan nì dinimbinaamandi yii: «Unimbɔti, m gbàam̄-si, cáaǹ Miiriyam!»

¹⁴Ní ti-Dindaan kíí-u yii: «U-baa di yaa bàà tíil̀ ki làb̄ u-nimbiin nee, icoo kaa bàà cútí-u áli iwiin ilulaaa? Míǹ puee an sá ní nyāntí-u dinaapaalin ú nīn bí ŋkpaanceeti áli iwiin iluli, ní boonee ú fàtīí gítiń samaa kansikin.»

¹⁵Niinee bi nyántì Miiriyam dinaapaal poon iwiin iluli. Samaa kaa nìn yíkì dinaapaal pu, see u nín dāa fātìi gítìńee.

¹⁶Míǹ boonee ní samaa yíkì Aseerooti ní ki cūtìi ŋātì dinaapaal Paaran teekun ki kāl̀.