Read Ntcham Nombres 13 Bible Online

Nombres 13 - Ntcham bible

Nombres 13

¹Ti-Dindaan bí Mooyiisi yii:

²«Tɔ̄ binib bí cùú cɔ̄ŋkì Kanaan tiŋki kin m làá dūú tīī Isirayeel yabee. Lēē kunaakoou kamaa poon ukpil ubɔ kí tɔ̄.»

³Mooyiisi nìn lēē-bi ki tú, kii ti-Dindaan nín nìn lī puee doooo Paaran teekun. Bi-kɔkɔ nìn sá Isirayeel yab kpilib ní.

⁴Bin bi nìn túee yiŋŋi sɔ̀. Sakuur jipɔɔn Samuwa, u sá Rubeen naakookun.

⁵Koor jipɔɔn Saafati, u sá Simeeyɔn naakookun.

⁶Yeefunee jipɔɔn Kaaleeb, u sá Juuda naakookun.

⁷Jooseefi jipɔɔn Yigeeyal, u sá Isakaar naakookun.

⁸Nuuni jipɔɔn Ooseeya, u sá Eefiraayiim naakookun.

⁹Raafu jipɔɔn Paltii, u sá Beenjameen naakookun.

¹⁰Soodi jipɔɔn Gadiyeel, u sá Sabulɔn naakookun.

¹¹Suusi jipɔɔn Gaadi, u sá Jooseefi jipɔɔn Manasee naakookun.

¹²Geemalii jipɔɔn Amiyeel, u sá Daani naakookun.

¹³Miisayeel jipɔɔn Seetuur, u sá Aseer naakookun.

¹⁴Fɔfisii jipɔɔn Naabi, u sá Neefitalii naakookun.

¹⁵Maaki jipɔɔn Geewuyeel, u sá Gaadi naakookun.

¹⁶Binib bin Mooyiisi nìn tú bí cùú cɔ̄ŋkì kí kpèè Kanaan tiŋkee yiŋŋi dee. Mooyiisi nìn páaǹ Nuuni jipɔɔn Ooseeya diyindi yii Joosuwa[28].

¹⁷Ŋyunti ŋun Mooyiisi làá nìn tɔ̄-bi bí nīn cée ní u bí-bi yii: «Ní dī doo ki jɔ̄m̀ Neegeeb, an dàkà yii ŋgiil pú, ní kí tin dàb̄ ajoon kí nyā Kanaan.

¹⁸Ní cɔ̄ŋkì kí kpèè yii kitiŋ gbanti bí mana, kí kpèè yii ki-nib pɔ̄ɔ̄yaaa, baa pɔ̄ɔ̄, kí kpèè yii ki-nib wīikáaa, baa wīikí.

¹⁹Ní kpèè yii kitiŋ gbanti ŋān̄aaa, kaa ŋān̄, kí kpèè yii bi máń agun ki māntìi tú ntimu mun poon bi kóòyeeyaaa, baa máń.

²⁰Ní kpèè yii kitiŋ gbanti cáá ntiŋkpamaaa, kaa cáá, kí kpèè yii isufi nyēē tiŋanaaa, iaa nyēē. Kámaan dipɔbil kí nīn cá, ni yaa gítińee ní lēeń niin subiliŋ kí cáań.» An nìn sá ŋyunti ŋun ní fiinyi lòoǹ abipeepeekaayee ní.

²¹Ní bi búntì ki cūtìi cɔ́ŋkì Kanaan tiŋki ki kíĺ Siini teekun áli ki tin bàn̄ Leeyoob-Amati caŋin.

²²Bi nìn dī ki jɔ́m̀ Neegeeb pú, ki tin bàn̄ Eebrɔn, laakin Anaaki nibul nì Ayiiman yab nì Seesayi yab nì Talimayi yab nìn kóòyee. - Bi nìn máń Eebrɔn tiŋki abin aluli boon ní bi dāa nín náań Soowan tiŋki Eejipiti tiŋkin. -

²³Ní bi dī kí nīn cá Eeskool tantakalin ní ki gāań fiinyi biliŋ disakal ki dūu lúntì ndɔ pu ní binib bili bùkū. Bi nìn lēeń greenaadi nì fiigi subiliŋ mun.

²⁴Isirayeel yab nín nìn gāań fiinyi biliŋ disakalee pu ní bi pú niin diyindi yii Eeskool, taapu di sá yii: <Disakal tantakal>.

²⁵Bi nìn dū iwiin imuŋku ili ní ki cōom̀ ki cɔ́ŋkì Kanaan tiŋki ní ki fātìi gítìń.

²⁶Bi bāańee ní ki cūtìi ká Mooyiisi nì Aarɔn nì Isirayeel samaau kɔkɔ Kaadeesi, Paaran teekun, ní ki máafì-bi tin kɔkɔ bi kée, ní ki dū kitiŋee poon subiliŋ ki dàkā-bi.

²⁷Tin bi nìn dɔ́miń ki máafì Mooyiisee sèé: «Ti nín bàn̄ kitiŋ kin poon a tú-tee, tiŋman nnaabiim nì tisiil còol̀ ní. Kpèè abil ŋin kì lòoǹee[29].

²⁸Ama binib bin kóò kitiŋ gbantinee cáá mpɔn tikpil, ní bi máń aguŋkpaan ki māntìi tú bi-timmu. Ti ká gba kujawɔkɔu Anaaki naantiibi niin.

²⁹Amaleeki yab kóò Neegeeb, ní Eeti yab nì Jeebusi yab nì Amɔɔr yab kóò dijool pu, ní Kanaan yab kóò dimɔɔl caŋin nì Jɔɔdan buŋgbandi.»

³⁰Ní Kaaleeb céefì samaa un bíi kpākantí Mooyiisee ń ŋmīĺ, ní u bí-bi yii: «Tí cùmaan, ti làá já kí fōō kitiŋ gbanti, kun puee ti làá ŋmā kí já kí pɔ̄ɔkiǹ ki-nib!»

³¹Ama bin nì Kaaleeb nìn cūtì ki cɔ́ŋkì kitiŋee bí yii: «Taa ŋūǹ kí cùú já nì binib nee, bi pɔ̄ɔǹ-ti sɔ́kɔ sɔkɔ ní.»

³²Niinee ní bi kíĺ ki bíi sòoǹ ki bíiĺ kitiŋ kin bi cūtìi cɔ́ŋkèe Isirayeel yab nimbiin. Bi nìn lī yii: «Kitiŋ kin ti cūtìi cōom̀ ki cɔ́ŋkèe nátí ki-nib bin kóò ki-puee, ní binib bin ti ká niinee sá tinikpaandi.

³³Ti ká Anaaki naantiibi tijawɔkɔl niin, ní ti yaa kpēē ti-bee, timbi sá kii inaakitoonee ní bi-cee. Míǹ ní bi mun wāĺ-ti yii ti sá[30].»