Read Ntcham Nombres 14 Bible Online

Nombres 14 - Ntcham bible

Nombres 14

¹Isirayeel yab kɔkɔ nìn gbáń ibiil ki súń míǹ kunyamɔŋu gbanti.

²Samaayee kɔkɔ nìn bí ki wòoǹ Mooyiisi nì Aarɔn ní ki lì-bi yii: «Ti yaa bàà nìn kpíìń Eejipiti tiŋkin àá ti yaa tí kpíì kuteeun doo, an bàà sɔ́!

³Ba pu ní ti-Dindaan cáǹ-ti kitiŋ nee poon bí tin kpɔ̀-ti ní? Bi làá tin kpɔ̀-ti ní kí cúú ti-nimpoobi nì ti-biyaamu kuyuŋu. Ti yaa fātìi nín gítí Eejipiti, an kaa sɔ́ɔɔ?»

⁴Ní bi bí ki lì tɔb yii: «Tí kàam̄maan ukpil ubɔ kí nīn gítí Eejipiti!»

⁵Ní Mooyiisi nì Aarɔn tātìi dōoǹ dicincibil Isirayeel yab samaau kɔkɔ nimbiin.

⁶Ní Nuuni jipɔɔn Joosuwa nì Yeefunee jipɔɔn Kaaleeb bin nìn ŋmàl̄ bin cūtìi cɔ́ŋkì kitiŋee kansikinee, cúú bi-bɔkutiŋ ki cátì,

⁷ní ki bí Isirayeel yab samaau kɔkɔ yii: «Kitiŋ kin ti cūtìi yìin̄ ki kpēēyee sá kitimmɔmmɔntii ní!

⁸An sá kitiŋ kin poon nnaabiim nì tisiil còol̀ee ní. Ti-Dindaan yaa yú ti-boon, u làá kɔ́ǹ-ti ki-poon kí dū-kì kí tīī-ti.

⁹Tin páb́ee di sá ní taa jáǹ ti-Dindaan, kí taa fàŋkì kitiŋ gbanti nib. Ti làá já kí pɔ̄ɔkiǹ-bi sɔ́kɔ sɔkɔ. Di sá bi-waaŋi ŋin cí-bee dū-bi ki fá, ama ní timbi Dindaan bí ti-cee. An puee taa fàŋkìmaan-bi.»

¹⁰Ŋyunti ŋun samaa kɔkɔ bíi màkafī kí yāŋkì-bi ataŋkpee kí kpɔ̀ee ní ti-Dindaan nyooti dɔ́miń circir kɔŋkooŋŋun Isirayeel yab kɔkɔ nimbiin.

¹¹Ti-Dindaan bí Mooyiisi yii: «Kí tin sāā ŋyunti ŋulɔŋu ní dinibul nee làá gbèen̄ kí taa ti kpèè-mi fám ní? Kí tin sāā ŋyunti ŋulɔŋu ní bi làá yíí kí taa nín̄ cáá m-pu dimákal, nì min kɔkɔ m ŋá maamaacikpaambi bin bí nee bi-kansikinee?

¹²M làá yàntī bìlbil kúm ń dāá kpɔ̀ kí céetí bi-kɔkɔ, ní bí lóó bi-fakal ní m dī sii pu kí náań ditimbuŋkpaandi din cáá mpɔn ki jítiǹ-bee.»

¹³Ní Mooyiisi kíí ti-Dindaan yii: «Eejipiti yab nyí yii a dū a-pɔŋŋu ní ki nyántìń-bi bi-cee.

¹⁴Ní bi tùkū binib bin di kóò kitiŋ nee puee, ní bi mun bi-ba gbìl̄ yii sii ti-Dindaan bí dinibul nee cee, ki nyāntí a-ba ki dàkà-bi, ki sá ditagbandi ki dàn̄ bi-pu ki còom̄ ki līī bi-nyɔkɔpu ŋwiimpu, ki sá-bi ŋŋmi tagbandi kunyeeu.

¹⁵A yaa kúntì dinibul nee kɔkɔ míǹ kii unibaantee, atimbun ŋin gbìl̄ bi sòoǹ a-puee làá lì yii:

¹⁶<Ti-Dindaan nín nìn pūtì ki pōoǹ yii u làá cáá u-nibul kí cùnnì kitiŋ kin poonee, waa ŋúń ki cáá-bi ki bàn̄, an pu ní u kūū ki céetì-bi kuteeun.>

¹⁷Míǹ puee m gbàam̄-si, m-Dindaan, nyāntí a-pɔŋkpaaŋŋu kí dàkà, kii sii a-ba nín lī puee yii:

¹⁸<M sá ni-Dindaan un kaa gífí diŋuul malaayee, ní m-ŋanti wīikí tikpil. M pūǹ ikpiti kɔkɔ nì i-bulifi. Ama maa tàantí unikpiti kaa dáaĺ u-tafal. M dátí unikpiti tafal kí tin kpáaǹ u-naantitɔntɔkɔŋ ata àá anaa[31].>

¹⁹M-Dindaan, kii a-ŋanti nín wīikí puee, dū a-nibul nee kpitii kí pɔ̄-bi, kii doooo a nín nyántìń-bi Eejipiti tiŋkin bi pée ŋáań-si ikpiti a cáa pūǹ-bi puee[32].»

²⁰Ní ti-Dindaan bí yii: «Kii a nín gbāam̀ yii ḿ dū bi-kpitii kí pɔ̄-bee, m dūu pú-bi.

²¹Ama tiŋman, m nín bí dimaŋfalin ní m-nyooti gbí kitiŋ kɔkɔ pu nee,

²²bin kɔkɔ ká m-nyooti nì tidaandi tin m ŋá Eejipiti tiŋkin nì kuteeun, ama ní ki cɔ́ŋkì-mi ŋfunyɔm saalaa pu kaa pílifì m-nyɔkɔee,

²³bi-kansikin ubɔ kpá kí kɔ́ kitiŋ kin m pōoǹ bi-baabi yii m làá tīī-bee. Bin kɔkɔ pée kpēē-mi fámee kpá kí kɔ́ ki-poon[33].

²⁴Ama kii ŋfam min kpòotī m-tɔntɔnliu Kaaleebee nín nyáń mi-ba u nóó-mi deedee puee, m làá yàntī ú kɔ́ kitiŋ kin u cūtìi kpēēyee poon, ní u-naantiibi ń dāá jī-kì[34].

²⁵Amaleeki yab nì Kanaan yab di dá láá kóò kitiŋ gbantin. Foolee ní fu fàtī ni-boon kí dūú dī kuteeun, Tikati mɔɔl watil.»

²⁶Ní ti-Dindaan bí Mooyiisi nì Aarɔn yii:

²⁷«M gbìl̄ Isirayeel yab nín bí ki kɔ́kɔĺ-mee. Kí tin sāā ŋyunti ŋulɔŋu ní m làá yàntī samaa un kaa bí diŋubil nee ḿ nīn gbùkum̄ m-pu ní?

²⁸Ní tùkù-bi yii: <Man ni-Dindaan bí dimaŋfalin. M pūtì ki lī yii, ni nín pée sòon̄-mi puee, míǹ ní m làá téeǹ-ni.

²⁹Kuteeun doo ní ni làá gbíntí kí kpú. Nimbi bin kɔkɔ bi nìn kàan̄ ni cáá abin mmuŋku kí nīn cée làá kpú ní, kun puee ni kɔ́kɔl̀-mi[35].

³⁰M pūtì yii naa làá kɔ́ kitiŋ kin m nìn pōoǹ yii m làá kàan̄-nee poon. See Yeefunee jipɔɔn Kaaleeb nì Nuuni jipɔɔn Joosuwa baba di làá kɔ́.

³¹Ni-biyaamu mun pu ni lī yii bi làá kpɔ̀-ni kí yòon̄ee, múǹ ní m làá yàntī mú kɔ́ kí béé kitiŋ kin nimbi kpēē ki sīŋkiǹee.

³²Nimbee, ni làá gbíntí kuteeun doo ní kí kpú.

³³Ni-biyaamu làá nīn bí kuteeun ní ki kàal̀ ki póotí ikakaa ki kpàá bi-waŋkuti, kí túń ni nín nyáń m-boon puee gìŋ́ŋi áli abin imuŋku ili, kí nīn cí nimbi kɔkɔ ń dāá kpú kí céetí[36].

³⁴Ni dū iwiin imuŋku ili ní ki kpēē Kanaan tiŋki. Míǹ ní ni làá dū abin imuŋku ili kí túń ni-kpitii gìŋ́ŋi, ŋwiin ŋubɔee dibindi diba, ní ní béé yii baa kpèé man fám.>

³⁵Man ni-Dindaan nín pūtì ki sòon̄ puee dee. Míǹ ní m làá náatí m-samaau un kaa bí diŋubil ki kpáfì kí jáǹ-mee. Bi-kɔkɔ làá gbíntí kuteeun doo ní kí kpú kí céetí.»

³⁶Mooyiisi nìn tú binib bi cūtìi kpēē Kanaan tiŋki. Bi nìn gítìńee ní ki sòon̄ ki bíil̀-kì ki yāntì samaa bíi wòoǹ Mooyiisi.

³⁷An nibee nìn kpíì dicilpu dicilpu. An nìn fáá-bi ki kūū ti-Dindaan nimbiin, kun puee bi nìn sòon̄ ki bíil̀ kitiŋee.

³⁸Nuuni jipɔɔn Joosuwa nì Yeefunee jipɔɔn Kaaleeb baba di nìn kíǹ bin bi nìn tú bi cūtìi kpēē kitiŋee kansikin kaa kpíì.

³⁹Mooyiisi cáań tibɔti tin ti-Dindaan sòon̄ nì uee ki tùkū Isirayeel yab, ní kunimbaakpaaŋŋu kɔ́-bi.

⁴⁰Ku wúntì kutaafaau pɔ̀lpɔlee ní bi yíkì ki cūtìi jɔ́m̀ ajoon pu tiŋki, ní ki bí yii: «Ti lafun ŋá ikpiti, ama kɔŋkɔnnee ti làá cù kí jáǹ binib gbanti kii ti-Dindaan nín lī puee.»

⁴¹Ní Mooyiisi bí-bi yii: «Ba pu ní ni bíi yìntī ti-Dindaan marau míǹ? Ni yaa cūtì naa làá ŋmā.

⁴²Taa cùmaan kun puee ti-Dindaan kaa bí ni-cee. Ní taa cáá ni-ba kí tīī ni-nannanliibi ń kpɔ̀.

⁴³Di sá Amaleeki yab nì Kanaan yab bí ni-nyɔkɔpu. Ni yaa cūtì bi làá kpɔ̀-ni. Ni nín fātì ni-boon ki tīī ti-Dindaanee, waa ti bí ni-cee.»

⁴⁴Nì míǹ kɔkɔee bi ŋá ŋyipɔn ki nín jɔ́ḿ ajoon pu tiŋkin, ama ti-Dindaan dakaau nì Mooyiisi nìn gbíntì dinaapaal pu kaa cūtì.

⁴⁵Ní Amaleeki yab nì Kanaan yab kpákatìń ajoon tiŋki pu, ki jáń ki pɔ́ɔkiǹ Isirayeel yab sɔ́kɔ sɔkɔ, ní ki jìn̄ bin kíǹee ki tin bàn̄ Ɔrima tiŋki.