Read Ntcham Nombres 15 Bible Online

Nombres 15 - Ntcham bible

Nombres 15

¹Ti-Dindaan bí Mooyiisi

²ń sòoǹ nì Isirayeel yab kí tùkù-bi yii: «Ni yaa láa bàn̄ kitiŋ kin m làá tīī-ni ní mā kí nīn kóòyee poonee,

³ní dāá ŋá-mi saraabi. Ní dāá ŋá-mi saraawɔkaa àá mpèé saraabi kí pà ipoon àá an nīn sá nlammɔntiim saraau, àá ni-jiŋaalib yuntiŋuee. Ní dāá dū unaa àá upii àá uŋoobu kí ŋá an saraabi, ní u-sɔnsɔfiŋu ń sɔ̀ŋkì m-pɔbil.

⁴Un cáań kuwaŋkuluu kí ŋá saraa kí tīī-mee ń dū ŋyim kiiloobi bita, kí dū ŋkpam liitiri ubɔ nì dijandi kí búuń ŋyimee kí kūtì kuwaŋkuluuee pu.

⁵Bi yaa làá dū dipibil kí ŋá saraawɔkaa àá mpèé saraauee, bí dū ndamam liitiri ubɔ nì dijandi kí kūtì kí ŋá saraa.

⁶An yaa sá upìjee, bí dū ŋyim kiiloobi biluu, kí dū ŋkpam liitirib bili ki dūú búuń ŋyimee kí kūtì kí ŋá saraa.

⁷Ní dū ndamam liitirib bili kí kūtì, ní u-sɔnsɔfiŋu ń sɔ̀ŋkì m-pɔbil.

⁸An yaa tí sá unaja ní bi làá dūú ŋá saraawɔkaa àá mpèé saraau kí pà ipoon àá án nīn sá nlammɔntiim saraau kí tīī-mee,

⁹bí dū ŋyim kiiloobi biwa, kí dū ŋkpam liitirib bita kí búuń ní kí dūú kūtì kuwaŋkuluu pu kí ŋá saraa.

¹⁰Ní dū ndamam liitirib bita kí kūtì, ní u-sɔnsɔfiŋu ń sɔ̀ŋkì m-pɔbil.

¹¹«Bi yaa làá dū unaja àá upìja àá dipibil àá diŋɔbil kí ŋá saraayee, bi nín máaǹ kí nīn ŋáań miŋyee dee.

¹²Tiwaŋkuti tin bi dūu ŋá saraayee nyɔkɔm yaa sá puee, bí nyàab̀ ŋyim nì ŋkpam nì ndamam kí ŋàl̄ kuwaŋkuluu kamaa.

¹³Míǹ ní Isirayeel yab kɔkɔ máaǹ kí nóó mara un m síiǹ nee kí ŋá saraabi bin nyiim sɔ́fèe kí tīī-mi.

¹⁴Binicambi bin kɔ́ ni-puee nì bin naanjab nìn kɔ́ ni-puee mun yaa là kí ŋá saraabi bin nyiim sɔ́fèe kí tīī-mee, bi mun ń dī mara un m síiǹ-ni nee pu kí ŋá saraabi gbanti.

¹⁵Maree làá nīn sá ubaanti ní ki tīī nimbi Isirayeel yab nì binicambi. U làá nīn pée sá ubaanti míǹ ní kí nīn cá jaanjaan man ni-Dindaan nimbiin ki tīī nimbi nì binicambi kɔkɔ.

¹⁶Marabaanti nì dibɔkpaal dibaantiil ní án làá nīn sá ki tīī nimbi bin sá bitindambee nì binicambi bin kɔ́ ni-puee kɔkɔ[37].»

¹⁷Ti-Dindaan bí Mooyiisi

¹⁸ń tùkù Isirayeel yab yii: «Ní yaa láa bàn̄ kitiŋ kin poon m cáǹ-ni nee,

¹⁹ní ki kíǹ ki jīǹ kitiŋ gbanti jintee, ní dāá lēē tijinee poon kí ŋá saraa kí tīī-mi.

²⁰Ni yaa láa nùkū kpɔnɔ saabuee, ní dāá lēē dipál din ni péé péé ki nùkūee poon ki ŋá ŋkalaawaamu. Ní dāá lēē kii bi nín yaa gbáń tijimpin ki cāatì bi nín lèekī kí ŋá saraa kí tīī-mi puee.

²¹Míǹ ní ni làá nín pée lèekī ŋkalaawaamu mun ni làá péé péé kí púĺee kí ŋá saraa kí tīī-mi. An sá mara ní m yóoǹ-ni kí nīn pée cáa cá jaanjaan.»

²²Tí lì yii naa béè ní ki yīntì marab bin ní m tīī Mooyiisi ú dūú nàatī-ni nee kansikin ubɔ,

²³an dàkà yii tin kɔkɔ man ni-Dindaan dī Mooyiisi pu ki ŋmàn̄ ki kpáafì ni nì ni-naantitɔntɔkɔŋ ní nīn ŋúb́ kí yòon̄ ŋwiin ŋun ní u ŋmàn̄-tèe kí nīn pée cáa cá jaanjaanee.

²⁴An yaa sá yii udaan yīntì míǹ ní samaa kaa béèyee, samaayee di làá dū unaja kí ŋá saraawɔkaa, ní u-sɔnsɔfiŋu ń sɔ̀ŋkì m-pɔbil. Ú ŋá tijin nì ndaam saraau mun kii dikoobil nín sá puee, ní kí dū uŋɔja kí ŋá ikpiti pɔ̄tam saraau.

²⁵Usaraaŋal ń ŋá Isirayeel samaau pu dikoobil din u máaǹ kí ŋée ní bí ká bi-kpitii pɔ̄tam. Di sá yii baa nyí ní ki yīntì, an pu ní bi cáań saraabi bí dūú wà ŋŋmi kí tīī ti-Dindaan ní ki cáań saraa ki ŋá kí ká ikpiti in baa nyí ki ŋée pɔ̄tam.

²⁶Isirayeel samaau kɔkɔ nì binicambi bin kóò bi-kansikinee làá ká bi-kpitii pɔ̄tam, kun puee bi-kɔkɔ di ŋá ikpiti gbanti.

²⁷Unibaanti di yaa kaa nyí ní ki ŋá ikpitee, ú dū uŋɔsal un cáá dibindi dibee kí ŋá ikpiti pɔ̄tam saraau.

²⁸Usaraaŋal ń ŋá un kaa nyí ki yīntèe pu dikoobil din u máaǹ kí ŋée man nimbiin, ní udaan ń ká u-kpitii pɔ̄tam[38].

²⁹An yaa sá Isirayeel yabaaa, binicambi bin kóò bi-kansikineeyaaa, mara nee làá nīn pée sá ubaanti ní ki tīī bin kɔkɔ kaa nyí ní ki yīntèe.

³⁰Ama an yaa sá Isirayeel yabeeee, binicambi bin kóò bi-kansikineeyeeee, ni-kansikin un di yaa gāā u-bindi ní ki ŋá ikpitee, u kpēē man ni-Dindaan fám dee. Bí nyāntí-u Isirayeel nibul kansikin.

³¹Udaan nín kpēē man ni-Dindaan nyɔɔbundi fám ki yīntì m-marabee puee, bí nyāntí-u. Udaan làá túń u-kpitii gìńdi.

³²Isirayeel yab nín nìn dáá bí kuteeun puee, bi nìn ká uninja ubɔ bí ki píikí idɔ ŋwiŋŋuŋfikaa dal.

³³Bin nìn ká-u u bíi píikí idɔee cúú-u ki cáań Mooyiisi nì Aarɔn nì samaa kɔkɔ cee.

³⁴Bi nìn dá láá dū-u ki kāaǹ ki cí-u tiŋan, kun puee baa nìn dá láá nyí un yīntì ŋwiŋŋuŋfikaa marauee nín máaǹ ditafadaaldi diŋyee.

³⁵Ti-Dindaan nìn bí Mooyiisi yii: «An niliuee máaǹ ŋkúm ní. Bí nyāntí-u dinaapaal kpaanceetiŋu samaa kɔkɔ ń yāŋkì-u ataŋkpee kí kpɔ̀.»

³⁶Samaa kɔkɔ nìn nyántì-u dinaapaal kpaanceetiŋu ki yáŋkì-u ataŋkpee ki kūū, kii ti-Dindaan nín nìn tùkū Mooyiisi yii bí ŋá puee.

³⁷Ti-Dindaan nìn bí Mooyiisi

³⁸ń tùkù Isirayeel yab yii: «Kí yòon̄ nimbi nì ni-naantiibi bin bí ki dòońee, ni yaa làá ŋáĺ abɔkutee, ní dāá ŋá igbeeŋgbeen tibɔkutijúti pu kí dū gulfaman kí kúĺ[39].

³⁹Ni yaa pēē dibɔkutil ní ki wāĺ igbeeŋgbeenee, ni làá nīn téetí ni-Dindaan marab kɔkɔ pu, kí nīn ŋáań marabee nín bí ní ŋá puee. Mimmee naa làá yàntī ni-landɔkɔi nì ni-nimbikpeeŋu ń téé-ni kí kɔ́ǹ iwaatootin.

⁴⁰Án làá yàntī ní téetí m-marab kɔkɔ pu kí nīn tɔ́-bi, ní kí nīn sá man ni-Nimbɔtiu yab.

⁴¹Man di sá ni-Dindaan ni-Nimbɔtiu un nyántìń-ni Eejipiti tiŋkin kí nīn sá ni-Nimbɔtiuee. Man di sá ni-Dindaan ni-Nimbɔtiu.»