Read Ntcham Nombres 16 Bible Online

Nombres 16 - Ntcham bible

Nombres 16

¹Uleefiija un bi yíì Kooree u sá Isaar jipɔɔn ki sá Keeyaati maaliŋunee nìn dáaĺ Rubeen naakookun binib bita ki kútì u-ba pu. Bíǹ di nìn sá Eeliyaab jipɔmbi Datan nì Abiiram nì Peeleeti jipɔɔn Ooni[40].

²Bi nìn bóob́ kí jáǹ Mooyiisi, ní bi ká Isirayeel yab kansikin bin sá abɔtibil nì binikpaambi bin samaa nìn lēē bi kpáfí ki sòoǹ tibɔtee binib alaataa ali nì imuŋku ili nì saalaa ki kútì bi-ba pu.

³Ní bi dɔ́miń ki kpáfì ki māntìi tú Mooyiisi nì Aarɔn, ní ki bí-bi yii: «Ni nín ŋáań puee gíti lákatì tikpil! Isirayeel yab kɔkɔ bí circir ní ti-Dindaan bí ti-kɔkɔ kansikin. Ba pu ní nimbi dàkafī yii ni jítiǹ ti-Dindaan nibul kɔkɔ ní?»

⁴Mooyiisi nín gbìl̄ bi bíi wòoǹ-u mimmee ní u tātìi dōoǹ dicincibil,

⁵ní ki bí Kooree nì u-yabee yii: «Fool kutaafaauee, ti-Dindaan làá fu yàntī tí béé un sá u-yɔuee, un u dūu sú u-ba ú nīn sútí ki pìl̀-uee. U làá fu yàntī un u lēēyee ń sútí kí pìl̄-u.

⁶Míǹ puee sii Kooree nì a-naacimbi, foolee ní fu nín̄ ŋúbiń nsambiyaamu mun poon bi tùutī talaaluee.

⁷Ní fu mɔ́fí ŋŋmi kí ŋá poon, kí dū talaalutuukaa kí páań ŋŋmi pu kí yóoń ti-Dindaan nimbiin. Niin ní ti làá fu béé un ti-Dindaan lēē ú nīn sá u-yɔuee. Nimbi Leefii yabee, m gīiǹ ni-bɔti!»

⁸Ní Mooyiisi gíti bí Kooree yii: «Nimbi Leefii yabee, pīlifìmaan!

⁹Ti-Dindaan Isirayeel Nimbɔtiu nín lēē-ni ni-nabiyaamu kansikin ní nīn sútí ki pìl̀-u, kí nīn tūǹ atuun ni-nabiyaamu yil pu circir kɔŋkooŋŋun ti-Dindaan nimbiinee, an kaa yá kí kɔ́-naaa?

¹⁰U yāntì sii Kooree nì a-nabiyaamu Leefii yab sútí ki pìl̀-u ní ni gíti bí ki nyàab̀ disaraaŋal tundaa!

¹¹An pu ní sii nì a-naacimbi bóob́ kí jáǹ ti-Dindaanaa! Di sá yii, ŋma di sá Aarɔn ní ni kpākantí-u?»

¹²Ní Mooyiisi tú bí yíiń Eeliyaab jipɔmbi Daatan nì Abiiram, ní bíǹ kíí yii: «Taa làá dāan̄!

¹³A yōoǹní-ti kitiŋ kin poon nnaabiim nì tisiil còol̀ee ki cáań-ti kí kpɔ̀ kuteeun doo, míǹ kaa yá ki kɔ́-si, ní a gíti là kí dàkà mpɔn kí nīn sá ti-bɔtiuaa!

¹⁴An kaa sá kitiŋ kin poon nnaabiim nì tisiil còol̀ee ní a cáǹ-ti. An kaa sá tisati nì fiinyib ní a tīī-ti difakal! A dàkafī yii ti sá bijɔfub níii? Ti yíì taa làá dāan̄!»

¹⁵Mooyiisi nín gbìl̄ mimmee ní u fōō diŋuul tikpil ní ki bí ti-Dindaan yii: «Á taa fōō bi-saraau. Man kaa fōō bi-kansikin ubɔ maŋki kpaŋkpan. Maa tí ŋá bi-kansikin báà ubɔ ikpiti.»

¹⁶Ní Mooyiisi bí Kooree yii: «Sii nì a-naacimbi ń fu dāan̄ kí yūĺ ti-Dindaan nimbiin, Aarɔn mun làá fu nín̄ bí.

¹⁷Sii nì a-naacimbi binib alaataa ali nì imuŋku ili nì saalaayee, báà ŋma ń fu nín̄ ŋúb́ u-sambiki kin poon u ŋáań talaalutuukaayee nì talaalu kí cáań ti-Dindaan nimbiin. Sii nì Aarɔn mun ń nīn ŋúb́ ni-yɔmu.»

¹⁸Ní Kooree nì u-naacimbi lafun ŋúbiń bi-sambiyaamu mun poon bi ŋáań talaalutuukaayee, ki ŋá ŋŋmi poon, ní ki dū talaalutuukaa ki sītì poon, ní ki cūtìi yúl̀ circir kɔŋkooŋŋu punyɔkɔpu, bi nì Mooyiisi nì Aarɔn.

¹⁹Ní Kooree kpáfì Isirayeel samaau bi yú ki túĺ Mooyiisi nì Aarɔn circir kɔŋkooŋŋu punyɔkɔpu. Ní ti-Dindaan lēē u-nyooti ki dàkā samaa kɔkɔ.

²⁰Ní ti-Dindaan bí Mooyiisi nì Aarɔn yii:

²¹«Ní kàkatī ni-ba kí wàatī binib nee, di sá m làá kúntí-bi dibɔbil pu doo!»

²²Ní Mooyiisi nì Aarɔn tātìi dōoǹ dicincibil ní ki bíi kūuntí yii: «Óo Unimbɔti, sii un tìì tiwannáaŋkaal kɔkɔ dimaŋfalee, unibaanti kpitii puee, a làá fōō samaa nee kɔkɔ pu diŋuulaaa?»

²³Ní ti-Dindaan bí Mooyiisi yii:

²⁴«Á tùkù samaa un kóò ki pìl̄ Kooree nì Daatan nì Abiiramee yii bí kàkatī kí wàatī-bi.»

²⁵Ní Mooyiisi yíkì, ní Isirayeel yab kpilib páaǹ u-boon ní bi nín cá Daatan nì Abiiram cee.

²⁶Ní u bí samaa yii: «Ní kàkatīmaan kí wàatī binikpitib nee tantib, kí taa gbēē bi-wanti báà tiba, án nín làá ŋá pu bi-kpitii puee, ní taa kpúee.»

²⁷Ní bin kóò ki pìl̄ Kooree nì Daatan nì Abiiramee yíkìi wāatì-bi. Ní Daatan nì Abiiram nyáń ki yú bi-tantib nyɔkɔpu, bi nì bi-nimpoobi nì bi-biyaamu nì bi-naantiibi.

²⁸Ní Mooyiisi bí yii: «Tin làá ŋá nee di làá yàntī ní béé yii ti-Dindaan di túnní-mi ḿ nīn tūǹ atuun ŋin bí nee kɔkɔ. An kaa sá man m-ba pɔŋŋu pu.

²⁹Binib nee yaa kpíì kii báà ŋma wiiŋŋu nín bà ú kpú puee, mimmee ti-Dindaan di kaa túnní-mi.

³⁰Ama ti-Dindaan yaa ŋá maamaaci tundi, kitiŋ dū bi nì tin bi cááyee kɔkɔ ki náĺ, bi yaa sīntì ditaŋkpiilin nì bi-nimbiliŋee, míǹ di làá dàkà-ni yii bi bēel̀ ti-Dindaan.»

³¹Mooyiisi tin pée lì yii u sòoǹ ki ŋmīlifée, laakin bi yúee, kitiŋ cúu látì bi-taaŋi taapu,

³²ki wāaǹ ki-nyɔkɔ ní ki dū bi nì bi-dicaŋŋi ki náĺ ki kpáaǹ Kooree yab nì tin kɔkɔ bi cááyee.

³³Bi pée wāĺ ní ki sīntì ditaŋkpiilin bi nì bi-wanti kɔkɔ, kitiŋ bīiǹ bi-pu ní baa ti ká-bi Isirayeel yab kansikin.

³⁴Isirayeel yab bin nìn yú ki pìl̄-bee nín gbìl̄ bi bí ki gbáà ibiilee ní bi sáǹ ki lì yii: «Tí sām̀maan kitiŋ ń taa kpáaǹ ti mun kí náĺ!»

³⁵Ní ŋŋmi ŋubɔ nyánní ti-Dindaan cee ki wùn̄ bin nìn bíi tùutī talaalub ti-Dindaan nimbiinee binib alaataa ali nì imuŋku ili nì saalaa.