Read Ntcham Nombres 18 Bible Online

Nombres 18 - Ntcham bible

Nombres 18

¹Ní ti-Dindaan bí Aarɔn yii: «Sii nì a-jipɔmbi nì a-nabiyaamu mun sá Leefii naakookunee, nimbi di làá nīn kpèé circir kɔŋkooŋŋu. Ubɔ yaa yīntì tiba ŋu-poonee, nimbi di làá nīn yì dibɔkpil, ama ubɔ yaa yīntì saraabi jandi púee, sii nì a-jipɔmbi di dāa yì dibɔkpil.

²Á dū a-nabiyaamu Leefii yab bin sá a-baa naakookun yabee kí ŋàl̄ a-ba bí nīn bí a-taapu ki tútúǹ-si atuun, ní si nì a-jipɔmbi ń nīn kpèé circir kɔŋkooŋŋu poon tuuŋŋi.

³Bi làá nín bí a-taapu ní ki kpèé circir kɔŋkooŋŋu. Ama bí taa gbēē circir wanti nì nsaraafan pu wanti tiba, án nín làá ŋá pu si nì bi ń taa kpúee.

⁴Bi làá nīn bí a-cee ní kí nīn tūǹ circir kɔŋkooŋŋu poon tuuŋŋi kɔkɔ. Un kaa sá Leefii naakookunee ń taa cèeǹ ni-kansikin.

⁵Sii nì a-jipɔmbi di làá nīn tūǹ circir laŋki nì nsaraafan pu tuuŋŋi, mimmee m-ŋuul kaa làá yīkì Isirayeel yab pu.

⁶Man di lēē a-nabiyaamu Leefii yab Isirayeel yab kansikin bí nīn sá man yab. Ní m dū-bi ki tīī-ni bí nín tūǹ dikpafindi tantiu poon tuuŋŋi.

⁷Ama sii Aarɔn nì a-jipɔmbee, nimbi làá nīn tūǹ disaraaŋal tundi nsaraafan pu nì circir páaa laŋki ŋŋaapìtikaa boon. Disaraaŋal tundi gbantee, man di pú-ni-dì. Un kaa sá Leefii naakookunee yaa sútìi pìl̄-dèe, udaan làá kpú ní.»

⁸Ti-Dindaan bí Aarɔn yii: «Kpèè, m dū saraabi bin Isirayeel yab lèekī tin kɔkɔ pée sá circiree pu ki tìì-mee ki ŋá a-ŋaan. Sii ní m dūu tīī, sii di làá nīn kíǹ ki yì ki tin kpáaǹ a-naantiibi. An sá mara ní m yóoǹ án nīn pée bí kí nīn cá jaanjaan.

⁹Saraabi bin sá circir bi cáań-mi ki dū dijandi ki wùn̄ ŋŋmee, tin kíǹ baa wùn̄ ki sá nimbi yatee sèé. Tijin saraabi nì ikpiti pɔ̄tam saraabi nì dibɔkpil saraabi. Tiwan gbanti kɔkɔee sá circir ní. Ní yòon̄, sii nì a-jipɔmbi yati dee.

¹⁰Ní jī saraabi gbanti jinti laakin bí circiree. Uninja kamaa ŋūǹ kí jī-tì, tiwan gbanti ń nīn sá circir a-cee.

¹¹Ní dū ti nee mun kí kūtì. Tiwampɔkaal tin kɔkɔ Isirayeel yab cāabìń-mee, sii di yì. M dūu tīī sii nì a-jipɔmbi nì a-bisalib kí nīn pée cáa cá jaanjaan. An sá mara ní m yóoǹ. A-dicaŋku poon bin kɔkɔ bí circiree ŋūǹ kí jī an jinti.

¹²M dū tijincɔ̀fikaal tin bi làá cáań-mee, ŋkpam nì ndamam nì bilee ki tīī-si.

¹³Isirayeel yab kpaajinti ticɔfikaal tin bi làá cáań-mee, a-dicaŋku poon un kamaa bí circiree ŋūǹ kí jī an jinti.

¹⁴Tin kamaa ní Isirayeel yab cáań ki sú-mee, sii di yì[46].

¹⁵Mbiseebiyaamu nninjabiyaamu mun bi cāabìń ki ŋáań-mi saraayee, an yaa sá binibeeee, tiwaŋkuteeee, sii di yì. Ama á yàntī bí pà mbininjabiyaamu yil pu, kí pà tiwaŋkuti tin kaa ŋān̄ bí dūú ŋá saraayee mun yil pu.

¹⁶Bí pà kibininjabiki kin cáá uŋmal ubɔee yil pu jitɔmbi biŋmoo, kí nóó nì circir kɔŋkooŋŋu nimbiliŋ ŋmàntitam, nnyiŋfi ń nīn sá graambi saalaa.

¹⁷Ama bí taa pà unaa nì upii nì uŋoobu biseemaliŋ pu. Tíǹ sá ki tīī man ní, bí làntì-tì ní kí dū fatiku kí yàaǹ nsaraafan pu, ní kí dū ti-kpam kí wà ŋŋmi, ní nsɔnsɔfi ń sɔ̀ŋkì m-pɔbil.

¹⁸Tinanee sii di yì, kii a nín tí yì dibindi nì diŋaŋgiitaal din bi dūu ŋá-mi mpèé saraauee puee.

¹⁹Circir wanti tin kɔkɔ pu ní Isirayeel yab làá lēē kí ŋá-mi saraayee, m dūu tīī sii nì a-jipɔmbi nì a-bisalib ní. An sá mpèé ŋun m dū ŋyaam ki ŋá ki tīī sii nì a-maaliŋuee ní, yii sii nì a-biyaamu nì a-naantitɔntɔkɔŋ di làá nīn pée yì an wanti kí nīn cá jaanjaan. Mara gbanti kpá kí kpìtī man a-Dindaan nimbiin[47].»

²⁰Ní ti-Dindaan bí Aarɔn yii: «Maa làá tīī-si ditinjandi, kii m nín làá tīī Isirayeel yab atinjan puee. Man di sá sii jandi nì a-gaajati Isirayeel yab kansikin.»

²¹«An yaa kíǹ Leefii yabee, difakal din m làá tīī-bee di sá Isirayeel yab nín tìì tisaalaatiil tin kɔkɔee. Án nīn sá bi-paati bi nín bí ki tūǹ ditundi din circir kɔŋkooŋŋunee pu[48].

²²Isirayeel yab bin kíǹee ń taa ti sútí kí pìl̄ circir kɔŋkooŋŋu, mimmee baa làá yìntī ní kaa nín kpíì.

²³Leefii yab baba di làá nīn bí circir kɔŋkooŋŋun ki tūǹ atuun. Bíǹ di dāa yì bi-yìntitam tafadaaldi. An sá mara ní m yóoǹ kí nīn pée cáa cá jaanjaan. Leefii yab kaa cáá kí fōō Isirayeel yab kansikin ditinjandi.

²⁴Ama m làá dū tisaalaatiil tin Isirayeel yab lèekī ki cāabìń-mee ní kí tīī-bi difakal. An pu ní m bí yii baa làá nīn cáá ditinjandi kii Isirayeel yab naakɔti tin kíǹee nín làá nīn cáá puee.»

²⁵Ní ti-Dindaan bí Mooyiisi

²⁶ń tùkù Leefii yab yii: «Isirayeel yab yaa láa lēeń bi-saalaatiiti ki tīī-nee, ni mun ń dāá fàtīí lēē poon tisaalaatiil kí ŋá man saraa.

²⁷Ni yaa lēē míǹ ki tīīyee, ni mun ŋá kii ni-jutiibi nín lèekī bi-kpaajinti nì bi-damam tisaalaatiil pu ki tììyee dee.

²⁸Míǹ mbaantiim ní an sá ní lēē tisaalaatiil tin kɔkɔ pu ni fòol̄ Isirayeel yab ceeyee kí cáań kí tīī usaraaŋal Aarɔn án nīn sá yii man ní ni ŋá saraa.

²⁹Tiwampɔkaal tin kɔkɔ bi làá cáań kí tīī-nee, ní lēē tin ŋān̄ee poon kí cáań kí ŋá man saraa.»

³⁰Á gíti tùkù-bi yii: «Ni yaa lēē tin kɔkɔ sá timɔntiilee ki tīīyee, mimmee ni mun Leefii yab ŋá kii bin béeyee nín lèekī bi-kpaajinti nì bi-damam pu ki tììyee dee.

³¹Báà laakiŋyee, ni nì ni-dicaŋŋi ŋūǹ ki jī an jikaati, kun puee an sá atuun ŋin ni tūǹ dikpafindi tantiunee paati ní.

³²Ni yaa lēē dijammɔntiil ki tīī man ní ki yaa yōoǹ tin kíǹee, naa ŋá ikpiti, kaa kpēē ki sīŋkiǹ Isirayeel yab circir saraau, an puee án kaa làá cáań-ni ŋkúm.»