Read Ntcham Nombres 20 Bible Online

Nombres 20 - Ntcham bible

Nombres 20

¹Isirayeel yab kɔkɔ nìn bàn̄ Siini teekun dibindi ŋmapeepeekaau poon ní ki kāl̀ Kadeesi. Niin ní Mooyiisi nì Aarɔn niisal Miiriyam kpíì, ní bi síb́-u[50].

²Bi bí niinee ní nnyiŋkum nyáń Isirayeel yab pu, ní bi kpáfì ki múkuǹ Mooyiisi nì Aarɔn pu.

³Ní bi kíĺ ki bíi nyàab̀ Mooyiisi tibɔti ki lì yii: «Ti yaa bàà nìn kpíì ŋyunti ŋun ti-Dindaan nìn dáaĺ ti-nabiyaamu tafal bi kpíìyee, an bàà sɔ́!

⁴Ba pu ní ni yōoǹní timbi ti-Dindaan samaau ki cáań kuteeu pu doo ti nì ti-waŋkuti ń kpú ní?

⁵Ba pu ní ni yōoǹní-ti Eejipiti tiŋkin ki cáań-ti ki tɔ́ falaa nee poon? Baa ŋūǹ kí bɔ̄l̀ doo tiba, kaa ŋūǹ kí cóoń isufi in bi yíì fiinyi nì fiigi nì Greenaadee, ní nnyim kpáàa kpá tí nyɔ̀.»

⁶Ní Mooyiisi nì Aarɔn nyáń samaa kansikin ki búntì circir kɔŋkooŋŋu nyɔkɔpu. Bi bàn̄ee ní ki tātìi dōoǹ dicincibil, ní ti-Dindaan nyooti kpákatìń bi-cee.

⁷Ní ti-Dindaan bí Mooyiisi yii:

⁸«Yòon̄ ŋkpandɔ si nì a-maan Aarɔn, kí kpāfì Isirayeel yab, kí sòoǹ nì ditaŋkpal nee bi-nimbiin dí tīī-ni nnyim. Ditaŋkpal nee ni ní a làá nyāntí nnyim Isirayeel yab nì bi-waŋkuti ń nyɔ̀.»

⁹Ní Mooyiisi yōoǹ ŋkpandɔ ti-Dindaan nimbiin kii u nín lī yii ú ŋá puee.

¹⁰Ní Mooyiisi nì Aarɔn yíiń samaa kɔkɔ ki kpáfì ditaŋkpalee cee, ní ki bí-bi yii: «Ní pīlifì, nimbi pɔɔgaatibee. Ti ŋūǹ kí nyāntí nnyim ditaŋkpal nee poon kí tīī-naaa?»

¹¹Mooyiisi lī míǹ ki dóòyee ní ki dúkutì ŋkpandɔ ki fáá ditaŋkpalee mili. Dicilpuee ní nnyim púnní, ní Isirayeel yab nyùn̄ ní bi-waŋkuti mun nyùn̄.

¹²Ama ní Ti-Dindaan bí Mooyiisi nì Aarɔn yii: «Kii ni nín kaa máká m-pu kaa dàkā m nín bí circir puee Isirayeel yab nimbiinee, maa làá yàntī ní cáá samaa nee kí cùnnì kitiŋ kin m làá tīī-bee poon.»

¹³Di sá ní bi pú niin diyindi yii Meeriiba nyim, an taapu sá yii <Kujaau> nyim. Di sá niin ní Isirayeel yab nìn nyàab̄ ti-Dindaan tibɔti, ní u dàkā-bi u nín bí circir puee.

¹⁴Bi bí Kadeesi tiŋkin niinee, ní Mooyiisi tú binib Eedoom bɔtiu cee bí tùkù-u yii: «Pīlifì tin a-nabiyaamu Isirayeel yab làá sòoǹee! A nyí falaa un ti jíńee bɔti kɔkɔ.

¹⁵Ti-naanjab nìn yíkìi cūtì Eejipiti tiŋkin ki kāl̀ niin ki yúntì tikpil. Ní Eejipiti yab sāaǹ ti nì ti-naanjab.

¹⁶Ti kúuǹ ki yíiń ti-Dindaan ú jòoń-ti ní u gbìl̄ ti-kuŋkuuntii pu, ní ki túnní u-tuuŋŋu dɔ́miń ki nyántì-ti Eejipiti tiŋkin. Di sá kɔŋkɔnnee ti dūu bāań Kadeesi, a-tiŋki kpaanyɔkɔ.

¹⁷Míǹ puee, á pɔ̄-ti nsan tí jītí a-tiŋki poon. Taa làá jītí ubɔ kpaabun, kaa làá kɔ́ ubɔ fiinyi sufii saakun, kaa làá nyɔ̀ ni-lɔkɔb nyim. Ti làá nīn pée nóó mbɔtisanjaa, ní kaa làá pàatī ŋgiil, kaa làá pàatī ŋgan áli kí tin jītí a-tiŋki pu.»

¹⁸Ní Eedoom bɔtiu kíí-u yii: «Maa làá kíí ní jītí m-tiŋkin. Ni yaa mākaǹ m làá yàntī m-yab ń kíntí-ni kí jáǹ-ni.»

¹⁹Ní Isirayeel yab gbíntìi cɔ́ tin bi bàà pée sòon̄ee pu yii: «Ti làá nīn pée nóó mbɔtisanjaa ní. Ti yaa nyùn̄ a-nyim àá ti-waŋkuti di yaa tí nyùn̄ a-nyim, ti làá pà. Tin baba ti pée mèé-see di sá á yàntī tí jītí a-tiŋkin.»

²⁰Ní Eedoom bɔtiu kíí yii: «M bí yii ni kpá kí jītí m-tiŋkin!» Ní Eedoom yab nyáń nì dijanjakitikpaandi din pɔ̄ɔ̄yee ki túŋkì Isirayeel yab.

²¹Míǹ ní Eedoom yab kaa yāntì Isirayeel yab jítì bi-tiŋki poon, ní bíǹ dūu dī laaba pú ki búntì.

²²Isirayeel yab kɔkɔ yíkì Kadeesee ní ki búntì Ɔɔr jool pu.

²³Ɔɔr jool pu, Eedoom tiŋki kpaanyɔkɔ ní ti-Dindaan sòon̄ nì Mooyiisi nì Aarɔn yii:

²⁴«Aarɔn làá kpú kɔŋkɔnnee kí cù kí ŋàl̄ u-naanjab. Waa làá kɔ́ kitiŋ kin m làá tīī Isirayeel yabee poon, kun puee ni yīntì m-marau Meeriiba nyim laŋki.

²⁵An puee sii Mooyiisi, á yòon̄ Aarɔn nì u-jipɔɔn Eeleeyasaar kí jɔ̄ntiǹ Ɔɔr jool yilpu.

²⁶Á pèetī Aarɔn saraaŋabɔkutiŋ kí dūú pèen̄ u-jipɔɔn Eeleeyasaar, kun puee Aarɔn làá kpú niin ní kí cù kí ŋàl̄ u-naanjab.»

²⁷Ní Mooyiisi ŋá kii ti-Dindaan nín bí ú ŋá puee. Bíǹ binib bitee yíkì ki nín jɔ́ḿ Ɔɔr jool yilpu Isirayeel samaau kɔkɔ nimbilin.

²⁸Bi bàn̄ee ní Mooyiisi pēetì Aarɔn saraaŋabɔkutiŋ ki dūu pēeǹ u-jipɔɔn Eeleeyasaar. Dijool yilpu niin ní Aarɔn kpíì. Ní Mooyiisi nì Eeleeyasaar fātìi nín kpákatiń[51].

²⁹Isirayeel samaau kɔkɔ nín béè yii Aarɔn kpíìyee ní bi súń u-kpool iwiin mmuŋku nì saalaa.