Read Ntcham Nombres 21 Bible Online

Nombres 21 - Ntcham bible

Nombres 21

¹Araadi bɔtiu ukanaanja un nìn kóò Neegeebee nín gbìl̄ yii Isirayeel yab dīń Atariim saŋŋu ki dòońee, ní bi yíkìi túŋkì-bi ki jáń nì bi, ní ki cúú Isirayeel yab biba kuyuŋu.

²Ní Isirayeel yab pōoǹ ti-Dindaan ipoon yii: «A yaa dū dinibul nee ki ŋá ti-ŋaan, ti làá nàan̄ bi-timmu kɔkɔ ní pílpil.»

³Ti-Dindaan nìn pílifiǹ Isirayeel yab, ní ki dū Kanaan yab ki ŋá bi-ŋaan. Ní Isirayeel yab kūū ki céetì-bi, ki nāaǹ bi-timmu ní ki pú niin diyindi yii Ɔrima, taapu di sá <dicéetil>.

⁴Isirayeel yab yíkì Ɔɔr jool puee ní ki dūu dī Tikati mɔɔl watil kí gɔ́ntí Eedoom tiŋki[52]. Ama bi bí disaŋkindi puee ní samaa wunti yɔ̄tì.

⁵Ní bi kíĺ ki bíi sòoǹ ki bíiĺ ti-Dindaan nì Mooyiisi yii: «Ba pu ní ni nyántìń-ti Eejipiti tiŋkin ki cáań-ti kuteeun kí kpɔ̀ ní? Nnyim kpá, tijin kpá, ní ti núutiǹ maana, falaa jinti tin ti jīǹ nee!»

⁶Niinee ní ti-Dindaan dū ikoobu in looti pɔ̄ɔ̄yee ki tɔ́ bi-pu, ní i júntìi kūū Isirayeel yab tikpil[53].

⁷Ní samaa un kíǹee sáǹ ki cūtìi ká Mooyiisi ki bí-u yii: «Ti nín sòon̄ ki bíil̀ ti-Dindaan nì siiyee, ti ŋá ikpiti. Míǹ puee gbàam̀ ti-Dindaan ú kàkatī ikoobu nee kí wàatī-ti.» Ní Mooyiisi mēē samaa pu.

⁸Ní ti-Dindaan bí Mooyiisi yii: «Á dū tasa kúti kí mɔ́ɔ́ kukoonaŋu kí dūú lúntí ndɔ pu. Un ní ukoobu yaa ti júee, ú wáaǹ kí kpèè kukoonaŋuee kí ŋmátí.»

⁹Ní Mooyiisi dū tasa kúti ki mɔ́ɔ́ kukoonaŋu ki dūu lúntì ndɔ pu. Kí yòon̄ ŋyunti gbantee, un ní ukoobu yaa ti jú ní u wáaǹ ki kpēē kukoonaŋuee kaa ti kúù[54].

¹⁰Isirayeel yab yíkì Ɔɔr jool taapuee ní ki tin bàn̄ ki kāl̀ Oobooti tiŋkin.

¹¹Bi yíkì Oobootee ní ki cūtìi kāl̀ Yee-Abariim kuteeun, Moowaab tiŋkin ŋwìiń nyalaŋki pú.

¹²Bi yíkì niinee ní ki cūtìi kāl̀ Seereedi buŋgbandi.

¹³Bi yíkì Seereedee ní ki cūtìi kāl̀ Arinɔn buŋgbandi. Mbun gbanti nyēeń Amɔɔr tiŋkin ní kí dāá jītí kuteeun. Ŋúǹ di sá Moowaab nì Amɔɔr yab kpaanyɔkɔ.

¹⁴An pu ní an lī ti-Dindaan jaaku gbɔŋkun yii: «Wayeeb bí Sufa nì u-buŋyin, ní Arinɔn

¹⁵nì u-bùmbiyaamu nyim pùub̀ ki kpàkaǹ Aari tiŋki ki tin bàn̄ Moowaab kpaanyɔkɔ.»

¹⁶Bi yíkì niinee ki nín cá Beeyeer, taapu di sá <lɔkɔ>. Lɔkɔ gbanti ní ti-Dindaan nìn bí Mooyiisi yii: «Kpāfì Isirayeel yab doo ḿ tīī-bi nnyim bí nyɔ̀.»

¹⁷Niin ní Isirayeel yab nìn gāā nlan nee yii: «Nnyim ń nīn tòó ki nyēeń lɔkɔn! Nín̄ kpáafímaan abaal!

¹⁸Lɔkɔ un bibɔtiibi gbìn̄ee dee, lɔkɔ un kitiŋ pu nikpaambi lùkū nì bi-kúti nì bi-kpandɔyee dee!» Bi yíkì kuteeunee ní ki bàn̄ Matana.

¹⁹Bi yíkì Matanayee ní ki cūtìi kāl̀ Nayaliyeel.

²⁰Bi yíkì Nayaliyeelee ní ki cūtìi kāl̀ Bamooti. Bi yíkì Bamootee ní ki cūtìi kāl̀ ditantakal din dɔ̄ ki jítì Moowaab tiŋkin ki cá Piisga jool yilpuee. A yaa tɔ́kɔ́ niinee, a wāĺ kuteeu kɔkɔ.

²¹Isirayeel yab tú bí mèè Amɔɔr yab bɔtiu Siiwɔn yii:

²²«Ti là kí jītí a-tiŋkin. Taa làá jītí ubɔ kpaabun, kaa làá kɔ́ ubɔ fiinyi sufii saakun, kaa làá nyɔ̀ ni-lɔkɔb nyim. Ti làá nīn pée nóó mbɔtisanjaa ní cáaa kí jītí a-tiŋki pu.»

²³Ama ubɔti Siiwɔn yíì yii Isirayeel yab ń taa jītí. Ní u kpáfì u-janjakitil kɔkɔ bi nyáń ki túŋkì Isirayeel yab áli Yaasi, kuteeun ki jáń nì bi.

²⁴Ní Isirayeel yab jáń ki pɔ́ɔkiǹ-bi ki kūū-bi ní ki fōō bi-timmu kɔkɔ, kí yòon̄ Arinɔn buŋŋu kí cáá sāā Yaabɔki buŋŋu, kí yòon̄ niin kí nīn cá áli Amɔn yab tiŋki kpaanyɔkɔ, di sá Amɔn yab nìn máń digundi bi-kpaanyɔkɔ ní.

²⁵Bi nìn fōō Amɔɔr yab timmu kɔkɔ, ki kpáaǹ Eesbɔn nì ntimu mun māntìi tú-kèe. Bi fōō-muee ní ki kāl̀ mu-poon.

²⁶Eesbɔn nìn sá ditiŋyil laakin Amɔɔr yab bɔtiu nìn kóòyee. U nìn jáń nì Moowaab bɔtiu ukpiki ní ki fōō u-timmu kɔkɔ áli ki tin cáa bàn̄ Arinɔn buŋŋu.

²⁷An pu ní bilaŋkpaŋgaaliibi lī yii: «Dāam̄maan tí fàtīí mā Eesbɔn tiŋki. Tí fàtīí mā Siiwɔn tiŋki!

²⁸«Ŋŋmi ŋubɔ nyánní Eesbɔn, ŋŋmi fōoń Siiwɔn tiŋkin ki wùn̄ Aari nì Moowaab timmu, ki kpáaǹ bin sá bikpilib ki tɔ́kɔ́ Arinɔn buŋŋu yilpuee.

²⁹Mbusu kɔ́-si, Moowaab! Nimbi bin jáaḿ diwaal Keemoosee, ni wáŋkì! A-jipɔmbi sáǹ ki yàl̄ ní Amɔɔr bɔtiu Siiwɔn cúú a-bisalib kuyuŋu[55].

³⁰«Ti jàkā-bi butɔbu ki yōoǹ Eesbɔn ki cáa sāā Diibɔn! Ti kūū ki céetì-bi ki yōoǹ Noofa ki cáa sāā Meedeeba!»

³¹Ní Isirayeel yab jíń Amɔɔr yab tiŋki ki kāl̀.

³²Ní Mooyiisi tú binib bí cùú cɔ̄ŋkì Yaseer tiŋki, ní bi cūtìi jáń ki fōō ntimu mun māntìi tú-kèe, ní ki jìn̄ Amɔɔr yab bin nìn kóò mu-nee.

³³Niinee ní Isirayeel yab fātìi kpántì bi nín bàà túĺ ki cá puee ní ki dūu dī Baasan saŋŋu. Ní Baasan bɔtiu Ɔɔgi nì u-janjakitil kɔkɔ yíkìń ki túŋkì Isirayeel yab Eedreeyii tiŋki kí jáǹ-bi.

³⁴Ní ti-Dindaan bí Mooyiisi yii: «Taa fàŋkì-bi. M làá dū bi nì bi-janjaliibi nì bi-tiŋki kí ŋá a-ŋaan, ní á ŋá-bi kii a nín ŋá Amɔɔr bɔtiu Siiwɔn un nìn kóò Eesbɔn tiŋkinee puee.»

³⁵Ní Isirayeel yab jáń ki pɔ́ɔkiǹ u nì u-jipɔmbi nì u-janjakitil kɔkɔ, ki kūū bi-kɔkɔ ubɔ kaa kíǹ, ní ki fōō u-tiŋki.