Read Ntcham Nombres 22 Bible Online

Nombres 22 - Ntcham bible

Nombres 22

¹Isirayeel yab yíkì niinee ní ki cūtìi kāl̀ Moowaab tantakalin, Jɔɔdan buŋgbandi lapu pu ki túĺ Jeeriikoo.

²Siipɔɔr jipɔɔn Balaaki nín gbìl̄ Isirayeel yab nín ŋá Amɔɔr yab puee,

³ní dinyoondi kɔ́ u nì u-samaau Isirayeel yab nín wīikí tikpilee pu. Bi nín ká Isirayeel yabee, tifaandi cúú-bi tikpil.

⁴Ní u bí Madiyan kpilib yii: «Binib nee làá ŋàfì tin kɔkɔ māntìi tú-ti nee kii inaa nín ŋmóò dinaapaal mooti pu nyíki nyikee ní.» Ŋyunti gbantee Siipɔɔr jipɔɔn Balaaki di nìn sá ubɔti Moowaab tiŋkin.

⁵An puee ní Balaaki dū binib ki tú Beewɔɔr jipɔɔn Balaam cee. U nìn kóò u-tiŋkin Peetɔɔr, dimɔɔl din bi yíì Eefiraatee caŋin. U nìn bí bí cùú tùkù-u yii: «Dinibul diba nyánní Eejipiti ki kpátì ki gbí kitiŋ kɔkɔ pu, ní ki kóò ki pìlīǹ man[56].

⁶Míǹ puee m gbàam̄-si, dāan̄ kí tɔ̄-bi mbusu, kun puee bi pɔ̄ɔ̄ ki jítiǹ-mi. A yaa kíí ki dɔ́mińee, án yaa yíì m ŋūǹ kí já kí pɔ̄ɔkiǹ-bi ní kí jà-bi m-tiŋki pu. Di sá m nyí yii un pu ní a yaa bīiǹee kāntí dibiindi, ní un ní a yaa tɔ́ mbusuee, udaan kāntí mbusu.»

⁷Ní Moowaab nì Madiyan kpilib yíkìi yōoǹ tiwampɔkaal tin bi làá tin pɔ̄ Balaamee ki bàn̄ ki ká-u, ní ki dū Balaaki nín lī puee ki kàan̄.

⁸Ní Balaam bí-bi yii: «Ní gbíntí m-cee doo kí dòon̄, ku yaa fu wúntì ti-Dindaan yaa sòon̄ nì mi puee, m làá fu tùkù-ni an nín sá puee.» Niinee ní Moowaab kpilibee gbíntì Balaam cee ki dōoǹ.

⁹Ní Unimbɔti dɔ́miń Balaam cee ní ki bí yii: «Binib bilab di bí a-cee nan ní?»

¹⁰Ní Balaam kíí Unimbɔti yii: «Siipɔɔr jipɔɔn Balaaki, Moowaab bɔtiu di túnní-bi, bí dāá tùkù-mi yii:

¹¹<Dinibul diba nyánní Eejipiti ki kpátìi gbí kitiŋ kɔkɔ pu. An puee dāá tūtuǹ-mi kí tɔ̄-bi mbusu. Án yaa yíì m ŋūǹ kí já kí pɔ̄ɔkiǹ-bi.>»

¹²Ní Unimbɔti bí-u yii: «Á taa táá-bi kí cù, kí taa tɔ̄ dinibul gbanti mbusu kun puee m bīiǹ di-boon.»

¹³Ku wúntì Balaam fīntèe ní ki bí bikpilib bin Balaaki túnnée yii: «Ní nīn gítímaan, ti-Dindaan kaa pú-mi nsan ḿ táá-ni kí cù.»

¹⁴Ní Moowaab kpilib bin bi túee fātìi gítì ki tùkū Balaaki yii: «Balaam yíì yii waa làá táá-ti kí dāan̄.»

¹⁵Ní Balaaki gíti lēē bikpilib bin sá bikpaambi bi-wíiŋŋu mun jítiǹ bipeepeekaabee ki tú.

¹⁶Ní bi bàn̄ Balaam cee ki dū tin pu ní Balaaki túnní-bee ki bíl̀ u-nimbiin yii: «Man Balaaki, Siipɔɔr jipɔɔn, m gbàam̄-si, á taa yíí yii aa làá dāan̄ m-cee.

¹⁷M làá tīī-si tinyool tikpil, ní tin kɔkɔ a yaa bālifèe, m làá ŋá míǹ! Míǹ puee m gbàam̄-si, dāan̄ kí tɔ̄ dinibul nee mbusu.»

¹⁸Ní Balaam kíí bin Balaaki túnnée yii: «Báà Balaaki yaa dū animbil nì sindaariya bin gbí u-beediiŋŋinee kɔkɔ ki tīī-mi, maa ŋūǹ kí yìntīǹ m-Dindaan m-Nimbɔtiu marau kí ŋá tiba fiii gba kí tīī-u.

¹⁹Ama ni mun ń gbíntímaan kunyeeu nee kí dòon̄ doo, m làá fu béé tin ní ti-Dindaan làá fu tùkù-mee.»

²⁰Ní Unimbɔti dɔ́miń Balaam cee kunyeeu ki tùkū-u yii: «Kii binib nee nín gíti dáá dɔ́miń ki yíiń-see, yīkìí táá-bi ní cù. Ama man yaa tùkū-si yii á ŋá puee, tíǹ ní á ŋá.»

²¹Kutaa wúntèe ní Balaam kpàl̄ u-mansaliiki ki táá bikpilibee ní bi búntì.

²²Balaam nóó-bi ki búntèe ní Unimbɔti fōō diŋuul. Ŋyunti ŋun Balaam kā u-mansaliiki pu u nì u-tɔntɔnliibi bili nóó ki cée, ní ti-Dindaan tuuŋŋu kíntì ki yú nsanni ú taa ŋmā kí jītí.

²³Ní kimansalii ká ntuun yú nsan kansikin ki ŋúb́ njicál ŋu-ŋaan, ní kì gɔ́ntì ki kɔ́ bukpaan. Ní Balaam bíi gbáà-kì kí kíntí nsan.

²⁴Ní ti-Dindaan tuuŋŋu nìkī nyɔkɔpu ki cūtìi yúl̀ nsan laakin kaa wāāyee fiinyi sufii kansikin digundi diba bí ŋŋaŋgan pú ní diba bí ŋŋaŋgiil pú.

²⁵Kimansalii ká ntuun mimmee ní kì còom̄ ki náká nì digundi. Balaam taal dūuǹ digundee, ní u kíĺ ki bíi gbáà-kì.

²⁶Ní ti-Dindaan tuuŋŋu nìkī nyɔkɔpu laakin nsan mɔ́ɔb́ unil kaa ŋūǹ kí fàtī ŋgiilaaa, kaa ŋūǹ kí fàtī ŋganee.

²⁷Kimaŋ ká-ŋu mimmee ní ki dōoǹ Balaam taapu ní Balaam dàn̄ ki-pu. Balaam fōō diŋuul tiŋan pu ní ki dū ndɔ ki gbáń-kì tikpil.

²⁸Ní ti-Dindaan pú kimansalii ŋŋmam kí sòoǹ tibɔti, ní kì bí Balaam yii: «M baasii ŋá-si ba ní a gbáń-mi mita kɔkɔ?»

²⁹Ní Balaam kíí-kì yii: «A kpēē-mi fám ní. M yaa bàà ŋúb́ kitàataajiki m-ŋaan doo, m bàà làá làntì-si!»

³⁰Ní kimansalii kíí-u yii: «Man di kaa sá a-maŋki kin a kàal̀ baabadaleeee? M ŋá-si míǹ dalba ki káaa?» Ní Balaam kíí-u yii: «Aayee.»

³¹Niinee ní ti-Dindaan ŋúbitì Balaam nimbiliŋ ní u ká ntuun yú nsan kansikin ki ŋúb́ njicál ŋu-ŋaan. Dicilpu niinee ní u tātìi dōoǹ dicincibil.

³²Ní ntuun bālifì-u yii: «Ba pu ní a gbáń a-maŋki mita kɔkɔ? M nyáń kí pìin̄-si nsan á taa ŋmā kí cù laakin a cée ní, kun puee nsan ŋun a cá nee cáǹ-si mbusun ní.

³³Kimaŋ ká-mi ní ki gɔ́ntì-mi ŋfunyɔm mita, kì yaa kaa bàà gɔ́ntì-mi, naŋkɔnampu m bàà kūū-si ní kí yàntī kíǹ.»

³⁴Ní Balaam bí ti-Dindaan tuuŋŋu yii: «M yīntì, kun puee maa nyí yii an sá sii di kíntì ki yú nsanni m-nyɔkɔpu. An puee m-saŋŋu nee bɔti yaa kaa mɔ́ɔkiǹ-see, m kíí kí fàtī m-dumpu.»

³⁵Ní ti-Dindaan tuuŋŋu bí Balaam yii: «Sii nì binib nee ń nīn cá, ama anyɔɔbun ŋin ní m làá dūú ŋá a-nyɔkɔnee, ŋíǹ ní a làá sòoǹ.» Ní Balaam nì binibee nìkī bi-saŋŋu ki búntì.

³⁶Ŋyunti ŋun Balaaki gbìl̄ yii Balaam dòońee ní u nyáń ki cūtì ki túŋkì-u áli Moowaab tiŋki kin bí ki pìlīǹ kikpaanyɔkɔ Arinɔn buŋŋu caŋinee.

³⁷Ní Balaaki bí Balaam yii: «Ba pu ní m nín tú binib mpeepeekaam a-cee bí yíiń-see, a yíì kaa dɔ́miń ní? A nyí yii maa ŋūǹ kí tīī-si tinyool níii?»

³⁸Ní Balaam bí Balaaki yii: «Nì min kɔkɔ m dɔ́miń nee, maa ŋūǹ kí gāā m-bindi kí lì tiba, see tibɔti tin Unimbɔti yaa dūu ŋá m-nyɔkɔnee, tíǹ ní m làá sòoǹ.»

³⁹Ní Balaam nóó Balaaki ní bi nín cá Kiiriyati-Usɔti.

⁴⁰Ní Balaaki dū inaa nì ipii kí ŋá saraabi, ní ki lēē tinan ki tīī Balaam nì bikpilib bin nóoń-uee, báà ŋma nì u-yati.

⁴¹Kù wúntèe ní Balaaki yōoǹ Balaam bi nín jɔ́ḿ Bamooti-Baal. Niin ní bi kpēē ki wálìń Isirayeel yab biba.