Read Ntcham Nombres 24 Bible Online

Nombres 24 - Ntcham bible

Nombres 24

¹Min bí nee Balaam béè yii an ŋān̄ ti-Dindaan cee ú bìin̄ Isirayeel yab puee, waa ti lī yii u làá kàkatī ŋkpaanceeti kí kpèè ti-Dindaan nín làá tùkù-u puee kii u nín kpààa ŋáań puee, u fātì u-nimbiin ki túĺ kuteeu pú ní.

²Balaam wáaǹ ki kpēēyee ki ká Isirayeel yab naakɔti bi-naapaal pu, ní Unimbɔti Fam kɔ́-u.

³Ní Balaam gāā-bi alaŋkpaŋkpaka nee yii: «Tin man Beewɔɔr jipɔɔn Balaam sòon̄ee sèé. Kpèè tin man un wāĺee sòon̄ee.

⁴Kpèè man un gbìl̀ Unimbɔti nyɔkɔ poon bɔtee nín lī puee sèé. Man un di wālifí tin Mpɔŋkɔdaan lèekī ki dàkà ŋyunti ŋun ní an yōoǹ-mi m-nimbiliŋ ŋúbitèe.

⁵«Jaakɔb naantiibi, ni-tantib ŋān̄eeee! Isirayeel yab, ni-kɔŋkooŋŋu ŋān̄ ní!

⁶A lì kii ibun di pùub̀ee, kii bukpaa bun dɔ̄ mbun caŋinee, kii disaaweendi din ti-Dindaan cóoǹee, a lì kii isufi in bi yíì Seedir i yú ki nákáǹ ŋkpinee.

⁷A lì kii nnyim min gbéè dinyimbɔbil, ní ki yàantí u-wambɔlkaati an lòoǹee. Isirayeel yab bɔtiu yindi yíkì yilpu ki jítiǹ ubɔti Agaagi[57], ní bi-beel làá nīn pɔ̄ɔ̄ ki jítiǹ abee kɔkɔ.

⁸Unimbɔti nyántì-u Eejipiti tiŋkin, ní u-pɔŋŋu sá-bi kii upɔɔnaa pɔŋŋuee, ní bi cáa pɔ̀fī atimbun ŋin sá bi-nannanliibee, ki wìil̄ bi-kpabiŋ, ní bi-piiŋyi kɔ̄ntí-bi tiweendi.

⁹Bíǹ di tātìi dɔ̄ kii gbikintee, ŋma di ŋūǹ kí páb́-bi bí yīkì[58]!» «Un di yaa bīiǹ Isirayeel boonee làá ká dibiindi[59]. Un di yaa tí tɔ́-u mbusuee, mbusu làá gítí udaan pu!»

¹⁰Niinee ní Balaaki fōō Balaam pu diŋuul ní ki kpáafì u-ŋalii ki bí Balaam yii: «M yíiń-si á dāan̄ kí tɔ̄ m-nannanliibi mbusu, ní sii dɔ́miń ki mēē ki bīiǹ bi-pu mita kɔkɔɔ!

¹¹Too fàtīí nīn kùǹ a-dumpu malaa! M bàà nìn pōoǹ-si yii m làá tīī-si tinyool, ama ní ti-Dindaan kaa pú-si nsan.»

¹²Ní Balaam kíí-u yii: «M nìn pée tùkū binib bin a nìn túnní m-ceeyee yii:

¹³<Báà Balaaki yaa yōoǹ animbil nì sindaariya bin gbí u-beediiŋŋinee kɔkɔ ki tīī-mi, maa làá yìntīǹ m-Dindaan. Di sá tibɔti tin ní m-Dindaan dūu ŋá m-nyɔkɔnee, tíǹ ní m làá sòoǹ.>

¹⁴Too, kɔŋkɔnnee m làá fàtīí gítí m-yab cee. Kí wàatī ḿ nīn cée, dāan̄ ḿ tùkù-si dalba Isirayeel yab nín làá dāá ŋá a-nibul puee.»

¹⁵Ní Balaam gāā-bi alaŋkpaŋkpaka nee yii: «Tin man Beewɔɔr jipɔɔn Balaam sòon̄ee sèé, kpèè tin man un wāĺee sòon̄ee.

¹⁶Kpèè man un gbìl̀ Unimbɔti nyɔkɔ poon bɔtee nín lī puee sèé, man un di cáá Yilpu Fɔ́ŋŋŋ Nimbɔtiu nyilee. Man un di wālifí tin Mpɔŋkɔdaan lèekī ki dàkà ŋyunti ŋun ní an yōoǹ-mi m-nimbiliŋ ŋúbitèe.

¹⁷M wāĺ tiba, tì bí ki dòoń, ama an kaa nín sá kɔŋkɔnnee. M dáań ki ká tiba, ama taa làá bàń díǹ. Uŋmalbija ubɔ nyáń Jaakɔb maaliŋun, ubɔtikpaan ubɔ nyáń Isirayeel nibulin. U làá dāá fáá kí wīī Moowaab yab nyɔɔkpaweeŋyi, ní kí fáá kí wīī Seeti yab yiliŋ.

¹⁸U làá dāá fōō Eedoom tiŋki, u làá dāá fōō u-nannanliibi Seeyiir yab tiŋki. Isirayeel yab di yì dijajil.

¹⁹Ubɔ làá nyānní Jaakɔb maaliŋun kí nīn tɔ́kɔ́ tikɔkɔ pu. U làá dāá kúntí bin bin nìn sáǹ ki nyáń ntimun ki ŋmátèe.»

²⁰Balaam ká Amaleeki yabee ní ki sòon̄ ki tɔ́ bi-pu yii: «Amaleeki, atimbun kɔkɔ poonee, sii di sá mbaa, ama tin dɔ̄ ki cí-see di sá a làá dāá kúntí ní kí nàan̄.»

²¹Ní u ká Keeni yab ní ki sòon̄ ki tɔ́ bi-pu yii: «Keeni yab, ni bí kitiŋ kin poon tiba kpá kí ŋá-nee, kii kunɔndii kun pá ditaŋkpal puee.

²²Ama ŋŋmi di làá dāá wà ni-kɔŋkooŋyi, ní Asuur yab ń dāá cúú-ni kí cùnnì bi-tiŋkin kuyuŋu.»

²³Ní u gíti lī yii: «Unimbɔti yaa làá tɔ̄ u-tundi kí jītée, ŋma di làá kíń?

²⁴Meelab túnní bijanjaliibi ki làá nyānní Siitiim tiŋkin kí dāá wɔ́b́ Asuur tiŋki yab, kí dāá wɔ́b́ Eebeer tiŋki yab, ní kíǹ ki-ba mun ń dāá céetí.»

²⁵Balaam lī mimmee ní ki fātìi nín gítí u-dumpu ní Balaaki mun nín cá u-laŋki.