Read Ntcham Nombres 28 Bible Online

Nombres 28 - Ntcham bible

Nombres 28

¹Ti-Dindaan bí Mooyiisi

²ń tīī Isirayeel yab mara nee yii: «Ní nīn nyí kí cáań-mi saraabi ŋyunti ŋun an sá bí cáań-bee deedee, m-saraabi bin sá tijin bí dūú wà ŋŋmi mi-sɔnsɔfiŋu sɔ̀ŋkī m-pɔbilee.

³«Á tùkù-bi yii saraabi bin bi làá nīn ŋáań ki tìì-mee sɔ̀. Kutaa kamaayee, bí cáań apibil ŋin cáá abin ali, ŋi-laaba kaa wɔ̀b̄ee kí ŋá saraawɔkaa kí tīī-mi. An di sá saraawɔkaa un bi làá nīn ŋáań ki tìì-mi múlmul kí taa gbèen̄ee.

⁴Bí dū dipibil diba kí ŋá saraa kutaafaau, ní kí dū din kíǹee kí ŋá saraa kujoou.

⁵Bí dū ŋyim kiiloobi bita, kí dū ɔliifi kpam min wāĺ kílkilee liitiri ubɔ nì dijandi kí búuń ŋyimee kí dūú kūtì kí ŋá saraa.

⁶An di sá saraawɔkaa un ni làá nīn ŋáań múlmul kii un bi nìn ŋá Siinaayi jool puee. An sá saraa un sɔnsɔfiŋu sɔ̀ŋkī m-pɔbilee.

⁷Ní dū ndamam liitiri ubɔ nì dijandi kí kūtì kí ŋá saraapeepeekaa. Circir kɔŋkooŋŋun, ni-Dindaan nimbiin ní ni làá ŋá saraa gbanti nì ndaam min pɔ̄ɔ̄yee.

⁸Saraaliliitee, kujoou ní ni làá ŋá úǹ kí tīī-mi. Tiwan tin kɔkɔ ni kútì ki ŋá saraapeepeekaayee, tíǹ tibaantiil ní ni làá tí dūú kūtì kí ŋá saraaliliiti mun. An di sá saraawɔkaa un sɔnsɔfiŋu sɔ̀ŋkī m-pɔbilee.

⁹«Ŋwiŋŋuŋfikaa dalee, ní dū dibindi diba pibiliŋ ali ŋin laaba kaa wɔ̀b̄ee kí ŋá saraa. Ní dū ŋyim kiiloobi biluu, kí dū ŋkpam ki búuń, ní ki dū ndamam kí kūtì kí ŋá saraa gbanti.

¹⁰Ŋwiŋŋuŋfikaa kamaa saraau dee. Ní dūú kūtì saraawɔkaa un ni làá nīn pée ŋáań baabadalee pu.

¹¹«Uŋmal kamaa wimpeekaaŋu dalee, ní dū inajaa ili nì upìja ubɔ nì apibil aluli ŋin cáá dibindi dibee kí ŋá-mi saraa. Tiwaŋkuti gbantee, tì-laaba ń taa nīn wɔ̀b̄.

¹²Unaja kamaa saraau puee, ní dū ŋyim kiiloobi biwa kí dū ŋkpam kí búuń, ní upìja kamaa saraau puee, ní dū ŋyim kiiloobi biluu kí búuń ŋkpamin kí dūú kūtì kí ŋá saraa.

¹³Dipibil kamaa saraau puee, ní dū ŋyim kiiloobi bita kí dū ŋkpam kí búuń kí dūú kūtì kí ŋá saraa. An di sá saraawɔkaa un sɔnsɔfiŋu sɔ̀ŋkī m-pɔbilee.

¹⁴Ní dū ndamam liitirib bita kí kūtì unaja kamaa saraau pu, ní kí dū ndamam liitirib bili kí kūtì upìja kamaa saraau pu, ní kí dū ndamam liitiri ubɔ nì dijandi kí kūtì dipibil kamaa saraau pu. Saraabi bin ni làá nīn ŋáań uŋmal kamaa wimpeepeekaaŋu dal kí tin cáá sāā dibindee dee.

¹⁵Ní dāá dū uŋɔja ubɔ kí ŋá ikpiti pɔ̄tam saraau kí dūú kūtì saraawɔkaa un ni làá nīn ŋáań baabadal nì ndamamee pu.

¹⁶«Dibimpɔndi ŋmapeepeekaau ŋwiin ŋubɔ kpá saalku dalee, ní jī man ni-Dindaan jiŋaaliu un bi yíì Dilákatil jiŋaaliuee, an dàkà yii jiŋaal un Isirayeel yab làá nīn jīǹ ki téetí Unimbɔti nín nìn nyántì-bi Eejipiti tiŋkin puee[70].

¹⁷Iwiin saalku dalee ní kíĺ jiŋaal kí nīn ŋmóò kpɔnɔb bin baa ŋá ŋkpɔnɔnyɔkɔee kí tin cáá sāā iwiin iluli.

¹⁸Jiŋaal gbanti wimpeekaaŋu dalee, ní kpāfì kí nyɔ̄ŋkìmaan man ni-Dindaan, ubɔ ń taa tɔ̄ ditundi diba ŋwiin gbanti.

¹⁹Ní dāá dū inajaa ili nì upìja ubɔ nì apibil aluli kí dūú ŋá saraawɔkaa kí tīī-mi. Tiwaŋkuti gbanti kɔkɔ laaba ń taa nīn wɔ̀b̄.

²⁰Ní dāá dū ŋkpam kí búuń ŋyim kiiloobi biwa kí dūú kūtì unaja kamaa saraau pu ní kí dū ŋkpam kí búuń ŋyim kiiloobi biluu kí dūú kūtì kí ŋá upìja kamaa saraau.

²¹Ní dū ŋkpam kí búuń ŋyim kiiloobi bita kí dūú kūtì kí ŋá dipibil kamaa saraau.

²²Ní dū uŋɔja ubɔ kí ŋá saraawɔkaa ní bí dū saraayee kí ŋá dikoobil din bi máaǹ kí ŋée ní ní ká ni-kpitii pɔ̄tam.

²³Saraabi nee kɔkɔ ń dāá dūú kūtì saraawɔkaa un ni ŋáań kutaafaau kamaayee pu.

²⁴Ní nīn ŋáań bisaraawɔkaabi baabadal kí tin sāā iwiin iluli. Saraabi gbanti sɔnsɔfiŋu di sɔ̀ŋkī man ni-Dindaan pɔbil. Saraabi gbanti ń dūú kūtì bisaraawɔkaabi nì bi-damam pu.

²⁵Ní ŋwinluluúti dalee ní kpáfì kí nyɔ̄ŋkì-mi. Yaadalee ubɔ ń taa tɔ̄ ditundi báà diba[71].

²⁶«Tijincɔ̀fikaal jiŋaaliu dal ni yaa cáań tijimpɔn kí ŋá man ni-Dindaan saraayee, ní kpāfì kí nyɔ̄ŋkì-mi, kí taa tɔ̄ ditundi báà diba yaadal wiiŋŋu[72].

²⁷Ní dāá dū anajapɔmbil ali nì upìja ubɔ nì apibil aluli ŋin cáá dibindi dibee kí ŋá-mi saraawɔkaa, ní u-sɔnsɔfiŋu ń sɔ̀ŋkì m-pɔbil.

²⁸Ní dū ŋkpam kí búuń ŋyim kiiloobi biluu kí dūú kūtì unaja kamaa saraau pu,

²⁹ní kí dū ŋkpam kí búuń ŋyim kiiloobi bita kí dūú kūtì dipibil kamaa saraau pu.

³⁰Ní dū uŋɔjee kí ŋá saraa, ní bí ŋá akoobil ŋin bi máaǹ kí ŋá ni-puee ní ká ni-kpitii pɔ̄tam.

³¹Saraabi nee kɔkɔ ń dāá dūú kūtì saraawɔkaa nì tijin saraabi bin ni ŋáań baabadalee pu. Ní dū tiwaŋkuti tin laaba kaa wɔ̀b̄ee nì ndamam kí nīn cáa ŋáań saraabi.