Read Ntcham Nombres 29 Bible Online

Nombres 29 - Ntcham bible

Nombres 29

¹«Uŋmaluluúti wimpeekaaŋu dalee[73], ní kpāfì kí nyɔ̄ŋkìmaan man ni-Dindaan. Yaadal wiiŋŋuee ní taa tɔ̄ ditundi báà diba. Án nīn sá-ni ifaal wiiŋŋu.

²Ní dāá dū unaja ubɔ nì upìja ubɔ nì apibil aluli ŋin cáá dibindi dibee kí ŋá-mi saraawɔkaa un sɔnsɔfiŋu sɔ̀ŋkī m-pɔbilee. Tiwaŋkuti gbanti laaba ń taa nīn wɔ̀b̄.

³Ní dū ŋkpam kí búuń ŋyim kiiloobi biwa kí dūú kūtì unaja pu kí ŋá saraa, ní kí dū ŋkpam kí búuń ŋyim kiiloobi biluu kí kūtì upìja pu kí ŋá saraa.

⁴Ní dū ŋkpam kí búuń ŋyim kiiloobi bita kí dūú kūtì kí ŋá dipibil kamaa saraau,

⁵ní kí dū uŋɔja ubɔ kí ŋá ni-pu ikpiti pɔ̄tam saraau. Bí dāá ŋá ni-pu akoobil ŋin bi máaǹ kí ŋée, ní kí ká ni-kpitii pɔ̄tam.

⁶Saraabi nee kɔkɔ ń dāá dūú kūtì saraawɔkaa un ni ŋáań kutaa kamaayee, nì bin ni ŋáań uŋmal kamaayee, nì ŋyim nì ndamam min ni cáa kútí ki ŋáań saraabi gbantee. Saraabi bin ni ŋáań ki wù ŋŋmee sɔnsɔfiŋu di sɔ̀ŋkī m-pɔbil.

⁷«Uŋmaluluúti iwiin saalaa dalee, ní kpāfì kí nyɔ̄ŋkì-mi, kí bóob́ kinyɔkɔ, kí taa tɔ̄ ditundi báà diba yaadal wiiŋŋu.

⁸Ní dāá dū unaja nì upìja nì apibil aluli ŋin cáá dibindi diba kaa wɔ̀b̄ee ki ŋá-mi saraawɔkaa un sɔnsɔfiŋu sɔ̀ŋkī m-pɔbilee.

⁹Ní dū ŋkpam kí búuń ŋyim kiiloobi biwa kí dūú kūtì unaja pu kí ŋá saraa, kí dū ŋkpam kí búuń ŋyim kiiloobi bita kí dūú kūtì upìja pu kí ŋá saraa.

¹⁰Ní dū ŋkpam kí búuń ŋyim kiiloobi biluu kí dūú kūtì dipibil kamaa pu kí ŋá saraa.

¹¹Ní dū uŋɔja ubɔ ki ŋá ikpiti pɔ̄tam saraau. Saraabi gbanti kɔkɔee ń dāá dūú kūtì ikpiti pɔ̄tam saraau un ni ŋá ikpiti pɔ̄tam wiŋkpaaŋŋu dalee nì saraawɔkaa un ni ŋáań kutaa kamaa nì ŋyim nì ndamamee pu[74].»

¹²Uŋmaluluúti poon iwiin saalku dalee ní kpāfì kí nyɔ̄ŋkì man ni-Dindaan, kí taa tɔ̄ ditundi báà diba yaadal wiiŋŋu. Ní dāá dū iwiin iluli kí nyɔ̄ŋkì man ni-Dindaan[75].

¹³Ní dāá dū inajaa saalaa nì ita nì ipijaa ili nì apibil diba kpá saalku ŋin cáá dibindi dibee, kí ŋá saraawɔkaa un sɔnsɔfiŋu sɔ̀ŋkī man ni-Dindaan pɔbilee. Tiwaŋkuti gbanti kɔkɔ laaba ń taa nīn wɔ̀b̄.

¹⁴Ní dū ŋkpam kí búuń ŋyim kiiloobi biwa kí dūú kūtì unaja kamaa pu kí ŋá saraa, ní kí dū ŋkpam kí búuń ŋyim kiiloobi biluu kí dūú kūtì upìja kamaa pu kí ŋá saraa.

¹⁵Ní dū ŋkpam kí búuń ŋyim kiiloobi bita kí kūtì dipibil kamaa pu kí ŋá saraa.

¹⁶Ní dū uŋɔja kí ŋá ikpiti pɔ̄tam saraau. Saraabi gbanti kɔkɔee ń dāá kūtì saraawɔkaa un ni ŋáań kutaa kamaa nì ŋyim nì ndamamee pu.

¹⁷Ŋwinliliitee ní dū inajaa saalaa nì ili nì ipijaa ili nì apibil diba kpá saalku ŋin cáá dibindi dibee kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄.

¹⁸Ní dū saraa yim nì ndamam kí kūtì unaja kamaa saraau nì upìja kamaa saraau nì dipibil kamaa saraau pu, kii an nín bālifì bí dū tin ní kí ŋá saraabi gbantee.

¹⁹Ní dū uŋɔja ubɔ kí ŋá ikpiti pɔ̄tam saraau, ní kí dūú kūtì saraawɔkaa un ni ŋáań kutaa kamaa nì ŋyim saraau nì u-damamee pu.

²⁰Ŋwintataatee ní dū inaa saalaa nì ubɔ nì ipijaa ili nì apibil diba kpá saalku ŋin cáá dibindi dibee kí dūú ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄.

²¹Ní dū saraa yim nì an damam kí kūtì unaja kamaa saraau nì upìja kamaa saraau nì dipibil kamaa saraau pu, kii an nín pée bàlifī miŋyee.

²²Ní dū uŋɔja kí ŋá ikpiti pɔ̄tam saraau kí dūú kūtì saraawɔkaa un ni ŋáań kutaa kamaa nì u-yim nì u-damamee pu.

²³Ŋwinnanaatee, ní dū inajaa saalaa nì ipijaa ili nì apibil ŋin cáá dibindi dibee diba kpá saalku kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄.

²⁴Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá miŋyee.

²⁵Ní dū uŋɔja kí ŋá ikpiti pɔ̄tam saraau kí dūú kūtì saraawɔkaa un ni ŋáań kutaa kamaa nì ŋyim nì ndamamee pu.

²⁶Ŋwiŋŋmooŋmootee, ní dū inajaa iwa nì ipijaa ili nì apibil ŋin cáá dibindi dibee diba kpá saalku kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄.

²⁷Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá saraabi gbanti miŋyee.

²⁸Ní dū uŋɔja kí ŋá ikpiti pɔ̄tam saraau, kí dūú kūtì saraawɔkaa un ni ŋáań kutaa kamaa nì u-yim nì u-damamee pu.

²⁹Winluu dalee, ní dū inaa inii nì ipijaa ili nì apibil ŋin cáá dibindi dibee kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄.

³⁰Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá saraabi gbanti miŋyee.

³¹Ní dū uŋɔja kí ŋá ikpiti pɔ̄tam saraau, kí dūú kūtì saraawɔkaa un bi ŋáań kutaa kamaa nì u-yim nì u-damamee pu.

³²Ŋwinluluútee, ní dū inajaa iluli nì ipijaa ili nì apibil diba kpá saalku ŋin cáá dibindi dibee kí ŋá-mi saraa. Tiwaŋkuti gbanti kɔkɔ laaba ń taa nīn wɔ̀b̄.

³³Ní dū saraa yim nì an damam kí kūtì unaja kamaa nì upìja kamaa nì dipibil kamaa saraau pu, kii an nín pée bàlifī bí ŋá saraabi gbanti miŋyee.

³⁴Ní dū uŋɔja ubɔ kí ŋá ikpiti pɔ̄tam saraau, kí dūú kūtì saraawɔkaa un ni ŋáań kutaa kamaa nì u-yim nì u-damamee pu.

³⁵Ŋwinniniitee di dāa sá jiŋaal kúntidal. Ní taa tɔ̄ diba yaadal wiiŋŋu.

³⁶Yaadalee ní dāá dū unaja nì upìja nì apibil aluli ŋin cáá dibindi dibee kí ŋá-mi saraawɔkaa un sɔnsɔfiŋu sɔ̀ŋkī m-pɔbilee. Tiwaŋkuti gbanti kɔkɔ laaba ń taa nīn wɔ̀b̄.

³⁷Ní dū saraa yim nì an damam kí kūtì kuwaŋkuluu kamaa pu, kí ŋá saraa kii an nīn pée bālifì yii bí dū tin ní ki ŋá saraabi gbantee.

³⁸Ní dū uŋɔja ubɔ kí ŋá ikpiti pɔ̄tam saraau, kí dūú kūtì saraawɔkaa un ni ŋáań kutaa kamaa nì ŋyim nì ndamamee pu.

³⁹Saraabi bin ni máaǹ kí ŋá-mi ni-jiŋaalib wiiŋyi dalee dee, ní kí dūú kūtì nlammɔntiim saraabi nì ipoon saraabi nì bisaraawɔkaabi nì ŋyim nì ndamam saraabi nì mpèé saraabi.