Read Ntcham Nombres 3 Bible Online

Nombres 3 - Ntcham bible

Nombres 3

¹Ŋyunti ŋun ti-Dindaan nìn sòon̄ nì Mooyiisi Siinaayi jool puee, Aarɔn nì Mooyiisi maaliŋun yab nyɔkɔm nín nìn sá puee sɔ̀.

²Aarɔn jipɔmbi yiŋŋi sɔ̀. U-jipɔŋkpiliu di sá Nadaab, ní Abiyuu pá, ní Eeleeyasaar pá, ní Itamaar jóol̀[2].

³Aarɔn jipɔmbi bin pu bi nìn sītì ŋkpam ki dū-bi ki sú disaraaŋal tundi bi kíĺ ki bíi tūǹee yiŋŋi dee.

⁴Nadaab nì Abiyuu nìn kpíì Siinaayi teekun, ti-Dindaan nimbiin, di sá bi nìn mɔ́fìń ŋŋmi laaba[3] ki kɔ́ǹ circir kɔŋkooŋŋun. Nadaab nì Abiyuu kaa nìn màl̄ mbiyaamu. Eeleeyasaar nì Itamaar di nìn kíǹ ki bí bi-baa Aarɔn nimbiin ki tútúǹ-u disaraaŋal tundi.

⁵Ti-Dindaan bí Mooyiisi yii:

⁶«Yíiń Leefii naakookun yab kí dū-bi kí ŋàl̄ Aarɔn bí nīn bí u-cee ki tūǹ disaraaŋal tundi.

⁷Bí nīn bí u-taapu ki tūǹ Isirayeel yab kɔkɔ yil pu tundi circir kɔŋkooŋŋu nyɔkɔpu, nì atuun ŋin kɔkɔ pée sá circir kɔŋkooŋŋu poon tuuŋŋee.

⁸Bíǹ di làá nīn kpèé tin kɔkɔ bi cáa ŋáań saraabi tuuŋŋi an yú circir kɔŋkooŋŋu poonee, ní kí nīn tūǹ Isirayeel yab yil pu tuuŋŋi circir kɔŋkooŋŋun.

⁹Á dū Leefii yab kí tīī Aarɔn nì u-jipɔmbi bí dū bi-ba kɔkɔ kí sú Isirayeel yab kɔkɔ yil pu.

¹⁰Aarɔn nì u-jipɔmbi baba ní á kàan̄ bí nīn tūǹ disaraaŋal tundi. Un kaa sá usaraaŋalee yaa sútìi pìl̄ ki túń ditundi gbantee, bí kpɔ̀-u.»

¹¹Ti-Dindaan bí Mooyiisi yii:

¹²«Á nīn nyí yii man m-ba di lēē Leefii yab Isirayeel yab kansikin bí fōō Isirayeel yab biseebiyaamu nninjabiyaamu yil. Man di yì Leefii yab.

¹³Kibiseebiki kininjabiki kamaayee, man di yì, di sá daliŋkin m nìn kūū Eejipiti tiŋkin biseebiyaamu nninjabiyaamu kɔkɔee, m nìn dū Isirayeel biseebiyaamu nninjabiyaamu nì bi-waŋkuti biseemal njamu kɔkɔ ki sú m-ba[4]. Man di sá ni-Dindaan.»

¹⁴Ti-Dindaan sòon̄ nì Mooyiisi Siinaayi teekun ki bí-u yii:

¹⁵«Á kàaǹ Leefii naakookun yab kí nóó nì bi-dicaŋŋi nì bi nín pēē pēē mmaal puee. Á kàaǹ kí yòon̄ mbininjabiyaamu mun cáá uŋmal ubɔ kí nīn cée.»

¹⁶Ní Mooyiisi kàan̄-bi kii ti-Dindaan nín nìn tīī-u mara ú ŋá puee.

¹⁷Leefii jipɔmbi di sá Geersɔn nì Keeyaati nì Meerarii.

¹⁸Geersɔn jipɔmbi ki nóó nì bi-dicaŋŋi yiŋŋi di sá Liibinii nì Simeeyii.

¹⁹Keeyaati jipɔmbi ki nóó nì bi-dicaŋŋi yiŋŋi di sá Amiiraam nì Yiisaar nì Eebrɔn nì Usiyeel.

²⁰Meerarii jipɔmbi ki nóó nì bi-dicaŋŋi yiŋŋi di sá Maalii nì Musii. Leefii naakookun yab dicaŋŋi nín nìn sá puee dee.

²¹Geersɔn yab dicaŋŋi yākatì mili pu, Liibinii yab nì Simeeyii yab.

²²Bininjab bin bi kàan̄ kí yòon̄ bin cáá uŋmal ubɔ kí nīn cáa cée nyáń binib kutukub biluli nì binib alaataa aŋmoo.

²³Geersɔn dicaŋŋi yab nìn gà bi-tantib circir kɔŋkooŋŋu boon ŋwìiń jeetilaŋki pú ní.

²⁴Geersɔn dicaŋŋi kpiliu di sá Layeel jipɔɔn Eeliyasaafi.

²⁵Circir kɔŋkooŋŋu poonee, ditundi din Geersɔn yab nìn tūǹee di sá bi nìn kpèé tanti poon nì boon nì tibiiŋkaal nì ŋŋaabu ŋun sàkā circir kɔŋkooŋŋu punyɔkɔpuee,

²⁶nì tanti satau nì dicindi punyɔkɔki ŋaasakaŋkaaŋu ŋun māntìi tú ŋkɔŋkoon nì nsaraafanee nì tanti ŋmiii. Bíǹ di nìn kpèé tiwan gbanti kɔkɔ.

²⁷Keeyaati yab dicaŋŋi yākatì minaa pu ní, Amiiraam yab nì Yiisaar yab nì Usiyeel yab nì Eebrɔn yab. Keeyaati maaliŋu nín sá puee dee.

²⁸Bi nín nìn kàan̄ Keeyaati yab bininjab kɔkɔ kí yòon̄ bin cáá uŋmal ubɔ kí nīn cáa cée, bi nìn nyáń bininjab kutukub binii nì binib alaataa aluu ní. Bíǹ di nìn kpèé circir laŋki.

²⁹Keeyaati dicaŋŋi yab nìn gà bi-tantib circir kɔŋkooŋŋu ŋgiil pú ní.

³⁰Keeyaati dicaŋŋi kpiliu di nìn sá Usiyeel jipɔɔn Eeliisafan.

³¹Keeyaati yab tundi din bi nìn tīī-bee di nìn sá bí nīn kpèé Dipoondi dakaau nì teebil nì fitilab tɔ́kɔŋkaati nì isaraafan nì tin kɔkɔ bi cáa ŋáań saraabi tuuŋŋee nì poon ŋaasakaŋkaaŋu. Bíǹ di nìn kpèé tiwan gbanti kɔkɔ.

³²Leefii yab kpikpaaŋwu di nìn sá Aarɔn usaraaŋakpil jipɔɔn Eeleeyasaar. Úǹ di nìn kpèé bin tūǹ ditundi circir laŋkee.

³³Meerarii yab dicaŋŋi nìn yākatì mili pu ní, Maalii yab nì Musii yab. Meerarii maaliŋu nín nìn sá puee dee.

³⁴Bininjab bin bi nìn kàan̄ kí yòon̄ bin cáá uŋmal ubɔ kí nīn cáa cée nìn sá binib kutukub biluu nì binib alaataa ali ní.

³⁵Meerarii yab kpiliu di nìn sá Abiyayiil jipɔɔn Tuuriyeel. Bi nìn gà bi-tantib circir kɔŋkooŋŋu ŋgan pú ní.

³⁶Ditundi din bi nìn tīī Meerarii yabee di nìn sá bí nīn kpèé tanti dɔi nì tikúti nì idɔjaati nì i-taapu tílkaati nì tin kɔkɔ bi pée cáa tūǹ an tuuŋŋee. Bíǹ di nìn kpèé tiwan gbanti kɔkɔ.

³⁷Bíǹ di nìn gíti kpèé idɔjaati in bi cōontí kí màntīí tū dicindee, nì i-taapu tílkaati nì akpakpaa nì iŋmii.

³⁸Mooyiisi nì Aarɔn nì u-jipɔmbi di nìn gà bi-tantib dikpafindi tantiu nyɔkɔpu ŋwìiń nyalaŋki pú. Bíǹ di nìn tūǹ circir laŋki poon tuuŋŋi Isirayeel yab kɔkɔ yil pu. Ubɔ fám yaa nìn sútìi pìl̄-bi ní kaa sá usaraaŋalee, bi nìn kù-u ní.

³⁹Ti-Dindaan nín nìn yāntì Mooyiisi nì Aarɔn kàan̄ Leefii yab naakookun bininjab kí yòon̄ bin cáá uŋmal ubɔ kí nīn cáa cée, bininjab kɔkɔ wíiŋŋu nìn nyáń kutukub mmuŋku nì bili ní.

⁴⁰Ti-Dindaan bí Mooyiisi yii: «Á kàaǹ Isirayeel yab biseebiyaamu nninjabiyaamu kí kíĺ mun cáá uŋmal ubɔ kí nīn pée cáa cée, kí ŋmà mu-yiŋŋi.

⁴¹Boonee á gàntī Leefii yab bí fōō Isirayeel yab bin kíǹee biseebiyaamu nninjabiyaamu yil kí nīn kíǹ kí sá man yab. Míǹ mbaantiim á tí gàntī Leefii yab waŋkuti tí kpántí man yati Isirayeel yab waŋkuti biseebiyaamu njamu yil pu. Man di sá ni-Dindaan.»

⁴²Mooyiisi kàan̄ Isirayeel yab biseebiyaamu nninjabiyaamu kii ti-Dindaan nín nìn tīī-u mara yii ú ŋá puee.

⁴³Mbiseebiyaamu nninjabiyaamu mun kɔkɔ bi nìn kàan̄ kí yòon̄ uŋmal ubɔ kí nīn cáa cée nyáń binib kutukub mmuŋku nì bili nì alaataa ali nì binib biluli kpá imuŋku inaa.

⁴⁴Ní ti-Dindaan bí Mooyiisi yii:

⁴⁵«Á dū Leefii yab kí kpántí Isirayeel yab biseebiyaamu nninjabiyaamu paaŋŋu, bíǹ ń kpántí man yab. Á tí dū Leefii yab waŋkuti kí kpántí Isirayeel yab waŋkuti biseebiyaamu njamu yil pu. Man di sá ni-Dindaan.

⁴⁶Isirayeel yab biseebiyaamu nninjabiyaamu alaataa ali nì imuŋku ita nì saalaa nì binib bita bin páaǹ Leefii yab biseebiyaamu wíiŋŋu puee[5], á yàntī bí pà bi-yil pu.

⁴⁷Á yàntī bí pà unil kamaa yil puee, jitɔmbi biŋmoo kí nóó nì circir kɔŋkooŋŋu nimbiliŋ ŋmàntitam.

⁴⁸Ní á dū an nimbiliŋee kí tīī Aarɔn nì u-jipɔmbi án nīn sá yii Isirayeel yab pàn̄ binib bin páaǹ Leefii yab biseebiyaamu puee yil pu.»

⁴⁹Ní Mooyiisi fōō Isirayeel yab cee bi-biseebiyaamu mun páaǹ Leefii yab puee nimbiliŋ.

⁵⁰Animbil ŋin u nìn fōō Isirayeel biseebiyaamu nninjabiyaamu mun páaǹee puee nìn kpáfì jitɔmbi kutuku nì alaataa ata nì imuŋku ita nì jitɔmbi biŋmoo ki nóó nì circir kɔŋkooŋŋu nimbiliŋ ŋmàntitam.

⁵¹Ní u dū animbilee ki tīī Aarɔn nì u-jipɔmbi, kii ti-Dindaan nín tīī-u mara ú ŋá puee.