Read Ntcham Nombres 30 Bible Online

Nombres 30 - Ntcham bible

Nombres 30

¹Ní Mooyiisi dū tin kɔkɔ ti-Dindaan sòon̄ nì uee ki tùkū Isirayeel yab.

²Boonee ní Mooyiisi dū ti-Dindaan marab nee ki tùkū Isirayeel yab naakɔti kpilib yii:

³«Ni-kansikin ubɔ di yaa pōoǹ ti-Dindaan yii u làá ŋá tiba kí tīī-u, àá u lēē u-ban ki pūtì yii u làá kòò tibee, udaan ń ŋá tin nyáń u-nyɔkɔn yii u làá ŋée deedee. Ú taa lákatí tin nyáń u-nyɔkɔn u pōoǹ yii u làá ŋée pu[76].

⁴«An yaa sá usapɔɔn di pōoǹ àá u pūtì yii u làá ŋá tiba kí tīī ti-Dindaan ŋyunti ŋun u dáá bí u-baa ceeyee,

⁵ní boonee u-baa gbìl̄ yii u pōoǹ àá u pūtì kí ŋá tiba kí tīī ti-Dindaan ní kaa lī-u tiba an puee, u máaǹ kí ŋá u nín pōoǹ puee.

⁶Ama u-baa yaa gbìl̄ ní ki yíì yii waa máaǹ kí pòon̄ kí lēē u-ban kí kòò tibee, mimmee u-pooŋyi in u lēē u-ban ki pōoǹee ŋá fám dee. Ti-Dindaan làá dūú pɔ̄-u, kun puee an sá u-baa di yíì.

⁷«An yaa tí sá yii usapɔɔn kaa dākafì an píkí ní ki pōoǹ àá ki pūtì kí lēē u-ban yii u làá kòò tiba, ní boonee ki mɔ́ǹ.

⁸U-cal yaa gbìl̄ ní kaa lī tibee, unimpuee ń nīn gbíntìi ŋúb́ u-pooŋyi.

⁹Ama daliŋkin ní u-cal yaa gbìl̄ ní kaa kííyee, ú kpìtī u-pooŋyi nì u-pùtil, ti-Dindaan làá dūú pɔ̄-u.

¹⁰«Ama unimpu un yāntì ticatee àá unimpukpiipu di yaa pōoǹee, an pée sá ú ŋá min u pōoǹee ní.

¹¹«An yaa sá unimpu un mɔ́ǹee di yaa pōoǹ àá u lēē u-ban yii u làá kòò tibee,

¹²u-cal yaa béè ní kaa mɔ́tiǹ-uee, mimmee u máaǹ kí nīn gbíntìi ŋúb́ min u lēē yii u làá ŋée.

¹³Ama ní u-cal yaa gbìl̄ ní ki yíì yii waa pú-u nsanee, ú kpìtī u-pooŋyi, ti-Dindaan làá dūú pɔ̄-u.

¹⁴An puee unimpu yaa pōoǹ àá u yaa pūtì ki bàà là kí ŋá tibee, u-cal di ŋūǹ kí yàntī án ŋá míǹ àá án kpìtī.

¹⁵Ama uninja yaa gbìl̄ míǹ ní kutaa dūu wúntì waa lī tibee, mimmee unimpu ŋūǹ kí nīn gbíntìi ŋúb́ u-pooŋyi nì min u lēē yii u làá ŋée, kun puee u-cal nín gbìl̄ ŋwimmɔn kaa lī tibee dàkā yii an ŋān̄ dee.

¹⁶Ama u yaa gbìl̄ míǹ kaa lī tiba yaadal ní an yúntì ní u dāa bíi yíití yii waa là u-nimpuu ń ŋá mimmee, úǹ di dāa tūntí u-nimpuu pooŋyi kpitii.»

¹⁷Mara un ti-Dindaan tīī Mooyiisi ipoon pu, uninja nì unimpu kansikin, nì ubaati nì u-bisal kansikin, ŋyunti ŋun usapɔɔn dáá bí u-baa cindinee dee.