Read Ntcham Nombres 31 Bible Online

Nombres 31 - Ntcham bible

Nombres 31

¹Ní ti-Dindaan sòon̄ nì Mooyiisi ki bí-u yii:

²«Ikpiti in Madiyan yab ŋá Isirayeel yabee puee, á cùú tɔ̀-bi ipɔntoon[77], ní kí nín kpú kí cùú ŋàl̄ a-baabi.»

³Ní Mooyiisi bí Isirayeel yab yii: «Ni-kansikin biba ń bɔ́ntí kí cùú jáǹ Madiyan yab kí tɔ̀-bi ipɔntoon kii ti-Dindaan nín bí yii tí ŋá puee.

⁴Ní lēē Isirayeel yab naakooku kamaa poonee binib kutuku bí cù kujaau gbanti.»

⁵Ní bi lēē kunaakoou kamaa poon bijanjaliibi kutuku, ní bijanjaliibi kɔkɔ kpáfì kutukub saalaa nì bili ki bóob́ kí cù kujaau.

⁶Ní Mooyiisi dū Isirayeel yab naakooku kamaa nib kutuku ki tú kujaau. Usaraaŋakpil Eeleeyasaar jipɔɔn Fineeyaasi nìn céeǹ-bi ki ŋúb́ circir wanti nì dikantándi ki búǹ ki tìì-bi kujaau daanti.

⁷Ní bi cūtìi jáń nì Madiyan yab kii ti-Dindaan nín tùkū Mooyiisi yii bí ŋá puee, ní ki pɔ̄fì Madiyan ninjab kɔkɔ.

⁸Bi kūū bi-bɔtiibi biŋmoo mun: Eefi nì Reekeem nì Suur nì Yuur nì Reeba, ki kūū ki kpáaǹ Beewɔɔr jipɔɔn Balaam.

⁹Ní Isirayeel yab cúú Madiyan nimpoobi nì bi-biyaamu kuyuŋu, ki cúú bi-waŋkuti kɔkɔ, ní ki kóoǹ bi-gaajawanti kɔkɔ.

¹⁰Bi nìn tūū bi-diiŋŋi nì bi-kaai ŋŋmi.

¹¹Bi nìn yōoǹ bi nín jáń ki fōoń tiŋyee, an dàkà yii binib nì tiwaŋkuti ki kpáàa búntì.

¹²Bi nìn cáá kɔkɔ ki cūnnì Moowaab tantakal din pìlīǹ Jɔɔdan ki túĺ Jeeriikoo tiŋkee, ki dūu dàkā Mooyiisi nì usaraaŋakpil Eeleeyasaar nì Isirayeel samaau kɔkɔ.

¹³Ní Mooyiisi nì usaraaŋakpil Eeleeyasaar nì Isirayeel yab kpilib nyáń dinaapaal boon ki túŋkì-bi.

¹⁴Mooyiisi nín ká mimmee ní u fōō bijanjakpilib nì adican kpilib nì bikpootiliibi bin kɔkɔ nìn cūtì kujaau gbantee pu diŋuul.

¹⁵U bí-bi yii: «Ba pu ní ni yāntì binimpoobi kaa kūū-bi?

¹⁶Nimbi ni-ba nyí yii Peewɔɔr bɔti poonee, Madiyan nimpoobi gbanti ní Balaam nìn sáŋkì bi kíil̀ Isirayeel yab ki tɔ́ tilaakpaal poon. An di dāa yāntì ti-Dindaan dáaĺ Isirayeel yab tafal ŋkpitim pu.

¹⁷Ní kpɔ̀ mbininjabiyaamu kɔkɔ, kí kpɔ̀ binimpoobi bin béè bininjabee kɔkɔ kɔŋkɔnnee.

¹⁸Ama ní taa kpɔ̀ nsapɔmbiyaamu mun kaa láá béè bininjabee, ní yàntī bíǹ ń nīn bí kí tīī-ni.

¹⁹Ni-kansikin bin kɔkɔ kūū unil kujaaun àá ki gbēē utaŋkpiilee ń nyā kí nīn bí dinaapaal boon iwiin iluli, kí ŋá akoobil winta dal nì winluli dal ní kí fàtīí kpántí circir. Mara gbanti sá ki tīī nimbi nì bin kɔkɔ ni cúuń kuyuŋuee ní.

²⁰Ní ŋá abɔkuti nì igban nì tiŋɔkuti wanti nì idɔ wanti kɔkɔ circir.»

²¹Ní usaraaŋakpil Eeleeyasaar bí bijanjaliibi bin kɔkɔ cūtì kujaauee yii: «Kpèèmaan mara un ti-Dindaan nìn tīī Mooyiisi u ŋmàn̄ ki yóoǹee sèé:

²²<Tiwan tin kɔkɔ sá sindaariya nì animbil kúti nì tasa nì tikúti nì tikúpinee,

²³tiwan tin kɔkɔ kaa wù ŋŋmee, ní dū ŋŋmi kí fùuǹ-tì ní tí kpántí circir, kí dū nnyim min lèekī ikpitee kí dūú cántí-tì. Ama tin ŋŋmi wùee, ní dū tíǹ ki ŋá nnyim gbantin kí fíntí ní tí kpántí circir wanti.

²⁴Ni yaa fíntì ni-bɔkutiŋ iwiin iluli dalee, ni kíǹ ki bí circir dee, mimmee ni ŋūǹ kí fàtīí gítí dinaapaal pu.»

²⁵Ní ti-Dindaan bí Mooyiisi yii:

²⁶«Sii nì Eeleeyasaar nì adican kpilib, ní kàaǹ ni nín jáń ki fōoń binib bin kuyuŋuee nì tiwaŋkuti kɔkɔ.

²⁷Ní cúú binibee nì tiwaŋkutee kí yàkatī mili pu, kí dū dijandi diba kí tīī bijanjaliibi bin cūtì kujaauee, ní kí dū dijandi din kíǹee kí tīī samaa kɔkɔ.

²⁸Binib alaataa aŋmoo kamaa puee, á lēē unil ubɔ kí pà man bi-Dindaan, ní kí lēē tiwaŋkuti mun alaataa aŋmoo kamaa pu kubɔ, an dàkà yii inaa nì ipii nì iŋoobu.

²⁹Bi yaa lēē bi-jandi poon tin sá man yatee ki tīī-mee, á dūú tīī usaraaŋakpil Eeleeyasaar.

³⁰Samaa wanti puee, á lēē binib imuŋku ili nì saalaa kamaa pu unil ubɔ, ní kí lēē tiwaŋkuti mun imuŋku ili nì saalaa kamaa puee kubɔ, an dàkà yii inaa nì ipii nì iŋoobu. A yaa fōōyee á dūú tīī Leefii yab bin bí man circir kɔŋkooŋŋu poon ki tūǹ atuunee.»

³¹Ní Mooyiisi nì usaraaŋakpil Eeleeyasaar ŋá kii ti-Dindaan nín bí yii bí ŋá puee.

³²Bi nín nìn cúú tin kujaaunee, tin kíǹ bi cáańee nyɔkɔm sɔ̀. Ipii nì iŋoobu nìn sá kutukub alaataa aluu nì kutukub biŋmoo kpá imuŋku inaa.

³³Inaa nìn sá kutukub imuŋku ita nì saalaa nì bili.

³⁴Mmamu nìn sá kutukub imuŋku ita nì kutuku ubɔ.

³⁵Bisapɔmbi bin kaa nyí bininjabee nìn sá kutukub mmuŋku nì saalaa nì bili.

³⁶Dijandi din bi nìn lēē ki tīī bin cūtì kujaauee nìn sá ipii nì iŋoobu kutukub alaataa ata nì kutukub bita kpá imuŋku ili nì alaataa aŋmoo.

³⁷Bi nìn lēē tiwaŋkuti gbanti poon alaataa aluu nì tiŋmoo kpá imuŋku inaa ki pàn̄ ti-Dindaan.

³⁸Inaa nìn sá kutukub binaa kpá imuŋku ili, ní bi lēē imuŋku ita nì saalaa nì ili ki pàn̄ ti-Dindaan.

³⁹Mmamu nìn sá kutukub mmuŋku nì saalaa nì alaataa aŋmoo, ní bi lēē imuŋku ita nì kiba ki pàn̄ ti-Dindaan.

⁴⁰Binib nìn sá kutukub saalku nì ubɔ, ní bi lēē binib mmuŋku nì saalaa nì bili ki pàn̄ ti-Dindaan.

⁴¹Ní Mooyiisi fōō tin bi pàn̄ ti-Dindaanee ki dūu tīī usaraaŋakpil Eeleeyasaar, kii ti-Dindaan nín bí ú ŋá puee.

⁴²Dijandi din Mooyiisi nìn lēē ki tīī bijanjaliibee nì din nìn kíǹ u dūu tīī samaayee nìn ŋmà ní.

⁴³Dijandi gbanti nìn sá ipii nì iŋoobu kutukub alaataa ata nì kutukub bita kpá imuŋku ili nì alaataa aŋmoo.

⁴⁴Inaa nìn sá kutukub binaa kpá imuŋku ili.

⁴⁵Mmamu nìn sá kutukub mmuŋku nì saalaa nì alaataa aŋmoo.

⁴⁶Binib nìn sá kutukub saalku nì ubɔ.

⁴⁷Mooyiisi nìn lēē samaa jandi poonee binib imuŋku ili nì saalaa kamaa puee unil ubɔ, ki lēē tiwaŋkuti pu mun míǹ ki tīī Leefii yab bin bí ti-Dindaan circir kɔŋkooŋŋun ki tūǹ atuunee, kii ti-Dindaan nín nìn bí yii ú ŋá puee.

⁴⁸Bijanjakpilib bin nìn kpōotì ajanjakiti kutukub kutukubee nì bin nìn kpōotì ajanjakiti alaataa alaataayee nìn dɔ́miń ki ká Mooyiisi,

⁴⁹ní ki bí-u yii: «Ti nín kàan̄ ti-janjaliibi bin ti kpōotì kujaaunee, ti ká yii bi-kansikin báà ubɔ kaa fɔ́tì.

⁵⁰An pu ní ti cáań tiwampɔkaal kí ŋá ti-Dindaan saraa ú fíntí-ti kí nyāntí ti-jɔkɔntin. Ti cáań sindaariya wanti, an dàkà yii abɔmbil nì mbɔmbiyaamu nì falfatib nì tiléeŋkaal tin báà ŋma kánní kujaaunee.»

⁵¹Ní Mooyiisi nì usaraaŋakpil Eeleeyasaar fōō sindaariya wantee bi-ŋaan.

⁵²Bijanjakpilibee nín nìn cáań sindaariya wanti tin ki ŋá ti-Dindaan saraayee nyiŋfiŋu nìn sá kiiloobi dilaataal nì imuŋku ita nì saalaa ní.

⁵³Bijanjaliibi ŋwaamuee kaa nìn cáań tin bi kánní kujaaunee ki tīī, bi nìn dūu kpáafì bi-ba ní.

⁵⁴Ní Mooyiisi nì usaraaŋakpil Eeleeyasaar fōō bijanjakpilibee cee sindaariya wanti, ní ki cáa kɔ́ǹ circir kɔŋkooŋŋu poon ti-Dindaan nimbiin, án nín làá ŋá pu ú taa súntí Isirayeel yab puee.