Read Ntcham Nombres 32 Bible Online

Nombres 32 - Ntcham bible

Nombres 32

¹Rubeen nì Gaadi naakɔti yab nìn cáá tiwaŋkuti tikpil, ní bi nìn dáań ki ká yii Yaseer tiŋki nì Galaadi tiŋki ŋān̄ diwaŋkpàal.

²An pu ní bi cūtìi ká Mooyiisi nì usaraaŋakpil Eeleeyasaar nì Isirayeel yab kpilib ki bí-bi yii:

³«Atarooti tiŋki nì Diibɔn tiŋki nì Yaseer tiŋki nì Niimra tiŋki nì Eesbɔn tiŋki nì Eelalee tiŋki nì Seebaam tiŋki nì Neeboo tiŋki nì Beeyɔn tiŋki

⁴nìn sá ntimu mun ti-Dindaan nìn jáń ki fōō ki tīī Isirayeel yabee ní. Ntimuee ŋān̄ diwaŋkpàal, ní timbi a-tɔntɔnliibi mun cáá tiwaŋkuti.

⁵A yaa bàà kíikí kí dū ntimu gbanti kí tīī-ti, timbi ń taa dùtī Jɔɔdan buŋgbandi lapu pu.»

⁶Ní Mooyiisi kíí Gaadi nì Rubeen naakɔti yab yii: «Ba pu ní ni-nabiyaamu ń búntí kujaau ní nimbi ń gbíntí ki kā doo?

⁷Ba pu ní ni bí ki yɔ̀tī ni-nabiyaamu Isirayeel yab wunti bí taa cùú fōō kitiŋ kin ti-Dindaan dūu tīī-bee?

⁸Míǹ ní ni-baabi mun nìn tí ŋá ŋyunti ŋun ti nìn bí Kadeesi-Baarneeya m nìn tú-bi bí cùú cɔ̄ŋkì Kanaan tiŋkee.

⁹Bi nìn jɔ́m̀ áli ki bàn̄ Eeskool tantakalin ki kpēē kitiŋ, ní boonee bi yɔ̄tì Isirayeel yab wunti bí taa kɔ́ kitiŋ kin ti-Dindaan tīī-bee poon[78].

¹⁰Ti-Dindaan nìn fōō bi-pu diŋuul ŋwiin gbanti ní ki pūtì ki lī yii:

¹¹<Binib bin nìn nyáń Eejipiti tiŋkin kuyuŋu ki nìn cáá abin mmuŋku kí nīn cée, bi kpá kí kɔ́ kitiŋ kin m pōoǹ kí tīī Abraam nì Isaaki nì Jaakɔbee, kun puee baa yúliǹ-mi deedee.

¹²See Yeefunee jipɔɔn Kaaleeb un sá Keenaasi maaliŋunee nì Nuuni jipɔɔn Joosuwa baba di làá kɔ́ kitiŋ gbantin, kun puee bíǹ yúliǹ-mi deedee kaa kpōoǹ laaba.>

¹³An pu ní ti-Dindaan nìn fōō Isirayeel yab pu diŋuul ki yāntì bi tú ki yìiǹ kuteeun abin imuŋku ili, ní bin kɔkɔ nìn yīntiǹ-uee kpíì[79].

¹⁴Nimbi binikpitib nee làá nóó ni-baabi tabɔbiliŋ kí gbítí ti-Dindaan ŋuul Isirayeel yab puɔɔɔ?

¹⁵Míǹ puee nimbi di yaa fātì ni-boon ki tīī ti-Dindaanee, u làá gíti yàntī Isirayeel yab ń yúntí kuteeun, ní nimbi di làá dāá túń samaa gbanti kpuulool.»

¹⁶Bi gbìl̄ mimmee ní ki sútìi pìl̄ Mooyiisi, ní ki bí-u yii: «Ti làá mā doo nee tikpuŋkpun ti-piii nì ti-ŋoobui ń nīn kóò, ní kí mā ti-biyaamu adiin.

¹⁷Ti yaa ŋá mimmee, ní tí yòon̄ tijanjawan malaa kí lìntī ti-nabiyaamu Isirayeel yab nyɔkɔpu, ní kí cáá-bi kí bànnì kitiŋ kin bi tīī-bee. Ŋyunti gbantee timbi biyaamu bí ntimu mun bi máń agun ki túee poon, binib bin kóò kitiŋ nee puee ń taa ŋmā kí ŋá-bi tiba.

¹⁸See ti-nabiyaamu Isirayeel yab yaa bàn̄ báà ŋma fōō u-tinjandee ní timbi ń nīn gítiń ti-cee.

¹⁹Ama timbi kaa dāa gíti cáá kí fōō tiba kitiŋ kin a làá dāá tīī bíǹ lapu pu buŋgbandee poon, di sá timbi gíti dáá fōō ti-fakal doo pú buŋgbandi.»

²⁰Ní Mooyiisi bí-bi yii: «Ni nín lī puee, ní ŋámaan míǹ. Ní bɔ́ntí kí cù kujaau, kii ti-Dindaan nín tīī mara puee.

²¹Bin kɔkɔ sá bininjab ki bàl̄ tijanjawanee ń dùtī Jɔɔdan buŋŋu, kii ti-Dindaan nín tīī mara puee. Bí nīn bí niin kí tin sāā ŋyunti ŋun ti-Dindaan làá jà u-nannanliibi kɔkɔ,

²²ní kitiŋee nib kɔkɔ ń sìntī bi-ba ki tīī ti-Dindaanee. Boonee ni ŋūǹ kí nīn gítí ni-cee. Ŋyunti gbantee ni nyáń ti-Dindaan bɔtin, ki nyáń ni-nabiyaamu Isirayeel yab mun bɔtin, ní kitiŋ laakin ni bí nee ń kpántí ni-yaka ti-Dindaan nimbiin.

²³Ama ni yaa kaa ŋá mimmee, ni ŋá ti-Dindaan ikpiti, ní ni-kpitii gbanti làá nīn pée dī-ni.

²⁴An puee ní māmaan ni-biyaamu adiin kí mā ni-piii nì ni-ŋoobui tikpuŋkpun. Ama ní ŋá tin ni pōoǹ yii ni làá ŋée mun.»

²⁵Ní Gaadi nì Rubeen naakɔti yab bí Mooyiisi yii: «Timbi a-tɔntɔnliibi làá ŋá kii sii ti-dindaan nín bí yii tí ŋá puee.

²⁶Ti-nimpoobi nì ti-biyaamu nì ti-picaŋkpunti nì ti-ŋɔcaŋkpunti nì ti-naai kɔkɔ làá gbíntí Galaadi tiŋkin doo ní.

²⁷Ní timbi a-tɔntɔnliibi ń yòon̄ ti-janjawanti kí cùú já ki nóó nì ti-Dindaan nín tīī mara puee, kii a nín lī puee.»

²⁸Ní Mooyiisi tīī mara nee usaraaŋakpil Eeleeyasaar nì Nuuni jipɔɔn Joosuwa nì Isirayeel yab naakɔti kɔkɔ kpilib bi-pu.

²⁹U nìn bí-bi yii: «Gaadi nì Rubeen naakɔti yab bin kɔkɔ sá bijanjaliibee yaa bāań, ní ni-kɔkɔ dūtì Jɔɔdan buŋŋu ki cūtìi jáń kii ti-Dindaan nín tīī mara puee ki fōō kitiŋee, ní dāá dū Galaadi tiŋki kí tīī-bi.

³⁰Ama bi yaa kaa dɔ́miń ki kútì ni-pu ni jáńee, Kanaan tiŋkin ní bi làá tin yàkatī ni nì bi kɔkɔ atinjan.»

³¹Ní Gaadi nì Rubeen yab tí kíí yii: «Ti-Dindaan nín pée bí tí ŋá puee, míǹ ní ti làá ŋá.

³²Timbi ti-ba làá yòon̄ tijanjawan kí cù Kanaan tiŋkin kí já kii ti-Dindaan nín tīī-ti mara puee. Ama timbi tinjandi din bi làá tīī-tee di sá Jɔɔdan buŋgbandi doo pú yal ní[80].»

³³Ní Mooyiisi dū Amɔɔr yab bɔtiu Siiwɔn, nì Baasan yab bɔtiu Ɔɔgi timmu, nì ntimu mun gíti bí mu-kpaanceetii ki māntìi tú-muee ki tīī Gaadi nì Rubeen naakɔtin yab, nì Jooseefi jipɔɔn Manasee naakooku dijandi yab.

³⁴Gaadi naakookun yab nìn fātìi máń Diibɔn nì Atarooti nì Arooweer timmu,

³⁵nì Atarooti-Soofan nì Yaseer nì Yoogeebeeya

³⁶nì Beeti-Niimra nì Beeti-Yaran timmu. Bi nìn fātìi máń ntimu gbanti kɔkɔ ní ki máń agun ki māntìi tú-mu, ní ki máń bi-piii nì bi-ŋoobui tikpuŋkpun.

³⁷Ní Rubeen naakookun yab fātìi máń Yeeseebɔn nì Eelalee nì Kiiriyatayiim

³⁸nì Neeboo nì Baal-Meeyɔn nì Siibima timmu. Boonee bi dāa kpántì ntimu gbanti yiŋŋi ki pú-mu ayimpɔɔn.

³⁹Ní Manasee jipɔɔn Makiir yab jáń nì Galaadi yab ki fōō bi-tiŋki, ní ki jìn̄ Amɔɔr yab bin nìn kóò ki-puee.

⁴⁰Ní Mooyiisi dū kitiŋ gbanti ki tīī-bi bí nīn kíǹ ki kóò.

⁴¹Manasee jipɔɔn Yayiir yab nìn cūtìi jáń nì Amɔɔr timbilimmu kí fōō-mu, ní ki pú-mu diyindi yii Yayiir timbilimmu.

⁴²Ní Noobiya cūtìi jáń ki fōō Keenaati tiŋki nì ki-timbilimmu, ní ki dū úǹ u-ba yindi ki pú kitiŋee yii Noobiya.