Read Ntcham Nombres 35 Bible Online

Nombres 35 - Ntcham bible

Nombres 35

¹Ti-Dindaan sòon̄ nì Mooyiisi Moowaab tantakal din pìlīǹ Jɔɔdan ki túĺ Jeeriikoo tiŋkee ki bí-u yii:

²«Tùkù Isirayeel yab yii bí lēē bi-tinjaŋŋi poon ntimu kí tīī Leefii yab bí nīn kóò[85]. Bí dū ntimuee kpaanceetii mun kí tīī-bi.

³Bí nīn cáá ntimu ki kóò, ní ntimu gbanti kpaanceetii ń nīn sá ki tīī bi-naai nì bi-wanti nì bi-waŋkuti tin kíǹee kɔkɔ.

⁴Ntimu mun ni làá tīī-bee kpaanceetii waaŋŋu ń nīn sá meetab alaataa aŋmoo kí màntīí tū kitiŋ gundi.

⁵Ní ŋmàntī kitiŋ boon ŋwìiń nyalaŋki pú meetab kutuku, ŋgiil pú meetab kutuku, ŋgan pú meetab kutuku ní ŋwìiń jeetilaŋki pú meetab kutuku, ní kitiŋ ń nīn bí kansikin. Ikpaanceeti nín máaǹ kí nīn bí pu kí màntīí tū kitiŋee dee.

⁶Ni yaa láa tīī Leefii yab ntimuee, ní dāá lēē ntimu muluu kí kūtì, mú nīn sá laakin ní ubɔ yaa kaa nyí ki kūū unil, ú sāǹ kí kɔ́ kí ŋmátée[86]. Ní dāá kūtì-bi ntimu imuŋku ili nì muli.

⁷Ntimu mun ni làá tīī-bee kɔkɔ dāa kpáfí ntimu imuŋku ili nì munii ní, mu nì mu-kpaanceetii.

⁸Ni yaa làá lēē Isirayeel tinjaŋŋi poon ntimu kí tīī Leefii yabee, ní lēē bin timmu wīikée cee tikpil, ní kí lēē bin yɔmu kaa wīikée cee fiii. Kunaakoou kamaa ń lēē ku-timmu kí nóó nì ku-tinjandi din ku fōōyee nín sá puee kí tīī Leefii yab.»

⁹Ti-Dindaan sòon̄ nì Mooyiisi

¹⁰ú tùkù Isirayeel yab yii: «Ni yaa láa dūtì Jɔɔdan buŋŋu ki bàn̄ ki kɔ́ Kanaan tiŋkinee,

¹¹ní dāá lēē ntimu mubɔ, ubɔ yaa kaa nyí ki kūū unilee, ú sāǹ kí kɔ́[87].

¹²Ntimuee di dāa sá un kūū unilee balilaŋki ní un nabiki bi kūūyee[88] ń taa ŋmā kí kpɔ̀-u kí tɔ̀ ipɔntoon samaa kaa láá sòon̄ u-bɔti.

¹³Ní dāá lēē ntimu muluu mun poon ní binib làá nīn sáń ki kóòyee.

¹⁴Ní dāá lēē ntimu muta Jɔɔdan buŋgbandi lapu pu, ní kí lēē ntimu muta Kanaan tiŋkin. Ntimu gbantee ń nīn sá ni-balilaŋki.

¹⁵Ntimu muluuyee làá nīn sá kibalilaŋ ki tīī Isirayeel yab nì binicambi bin kóò bi-ceeyee nì bisaŋkinliibi bin túutì bi-puee. Bi-kansikinee un kaa nyí ki kūū unilee ń sāǹ kí kɔ́ niin.

¹⁶«Ubɔ yaa dū tikúti wanti ki fáá ki kūū unilee, u sá unikpɔl ní, bí kpɔ̀ udaan.

¹⁷U yaa dū ditaŋkpal din ŋūǹ kí kpɔ̀ unilee ki yá u-juti ní u kpíìyee, udaan sá unikpɔl, bí kpɔ̀ u mun.

¹⁸U yaa tí dū ndɔ ŋun ŋūǹ kí kpɔ̀ unilee ki tɔ́ u-juti ní u kpíìyee, udaan sá unikpɔl, bí kpɔ̀ u mun.

¹⁹Unil un bi kūūyee nabiki kin máaǹ kí tɔ̀ ipɔntoonee di máaǹ kí kpɔ̀ unikpɔlee kí tɔ̀ ipɔntoon. Laakin ní u yaa pée ká-uee, u ŋūǹ kí kpɔ̀-u.

²⁰Án yaa sá nì kináŋ ní ubɔ téé u-juti mpɔn ní u lítì ki kpíì, àá u díkí-u tiba pu ní ki dū tiba ki fáá-u ní u kpíìyee,

²¹án yaa ti sá nì kudɔ̀ŋu ní u fáá-u ní u kpíìyee, un kūū u-jutee máaǹ ŋkúm, u sá unikpɔl ní. Un u kūūyee nabiki kin máaǹ kí tɔ̀ ipɔntoonee yaa pée ká-u laakiŋyee, ú kpɔ̀-u kí tɔ̀ ipɔntoon.

²²«Ama án yaa sá yìkíl̄ yikil, waa ná-u, kudɔ̀ŋu kubɔ mun kpá bi-kansikin ní u téé udaan àá u dū tiba ki yá-u ní an dūu kpántì ŋkúmee,

²³àá ditaŋkpal din ŋūǹ kí kpɔ̀ unilee ní u tɔ́, ama ní kaa nyí yii ubɔ bí laakin u tɔ́ ditaŋkpalee ní an cúú ubɔ ní udaan kpíì. An yaa kaa sá yii u ná-u àá u là kí ŋá-u tikpitil tibee,

²⁴samaa ń kpāfì kí dī mara nee pu kí sòoǹ kí ŋāŋkì un kūū unil kaa nyée nì un làá tɔ̀ ipɔntoonee kansikin.

²⁵Samaa ń fīī un kɔ́ tibɔtinee un làá tɔ̀ ipɔntoonee ŋaan, ní kí gíiǹ-u kitiŋ kin poon bin kūū binibee sáń ki kóòyee. «Ú nīn bí niin kí nīn cí usaraaŋakpil un bi lēē ki dū ŋkpam ki sītì u-puee yaa láa kpíìyee.

²⁶Ama unikpɔlee yaa nyáń kitiŋ kin bi lēē bí nīn sáń ki kóòyee poon,

²⁷ní un làá tɔ̀ ipɔntoonee ká-u laaba, kaa sá kitiŋ kin bi sáń ki kóòyee poon ní ki kūū-uee, waa ŋá ikpiti.

²⁸An sá unikpɔlee ń gbíntí kí nīn kā kitiŋ kin poon u sáǹ ki kɔ́ee kí nīn cí usaraaŋakpil kúm. Úǹ kúm boonee, u ŋūǹ kí gítiń u-tiŋkin.

²⁹«Tibɔti nee ń nīn sá dibɔkpaal ki tīī ni nì ni-biyaamu, laakin kamaa ni yaa bàn̄ ki làá nīn kóòyee.

³⁰«Báà nnikpaakoon yaa pée yāntì ki sá ŋuŋyee, ní ká biseeradambi ń nīn wīikí kí wàatī kí nín kpɔ̀ unikpɔl. Ní taa kpɔ̀ ubɔ unibaanti seerau pu[89].

³¹Ní taa fōō kunimbiŋmiiu kubɔ un kūū unil ki máaǹ ŋkúmee cee kí gíiǹ-u kí líí, ní kpɔ̀-u.

³²Ní taa tí fōō u-cee animbil kí dàkà-u nsan ú sāǹ kí cùú kɔ́ kitiŋ kin poon binikpɔliibi sáń ki kóòyee, àá kí yàntī ú gítiń kí nīn kóò u-tiŋkin ŋyunti ŋun ní usaraaŋakpil kaa láá kpíìyee.

³³«Ní taa láa kɔ́ǹ kitiŋ kin poon ni làá dāá nīn kóòyee tijɔkɔndi. Di sá yii fatiku di kɔ̄ntí kitiŋ tijɔkɔndi. Tiba kaa ŋūǹ kí fíntí un bi kūūyee fatikuu, see un kūū-uee fatikuu baba di ŋūǹ kí fíntí.

³⁴Ní taa láa kɔ́ǹ kitiŋ kin poon ni làá dāá nīn kóòyee tijɔkɔndi, kun puee m kóò ki-poon ní. Di sá yii man di sá ni-Dindaan, ní ki kóò Isirayeel yab kansikin.»