Read Ntcham Nombres 36 Bible Online

Nombres 36 - Ntcham bible

Nombres 36

¹Jooseefi naantiibi nìn dɔ́miń ki ká Mooyiisi nì Isirayeel yab tindaŋkpilib nì tinaakɔti kpilib. Bíǹ di nìn sá Manasee naantiiu Galaadi, Makiir jipɔɔn maaliŋun dicaŋŋi kpilib.

²Bi nìn bí yii: «Ti-Dindaan di tīī sii ti-kpiliu mara yii Isirayeel yab ń tɔ̄ kasi ní báà ŋma ń jī ditinjandi din làá nīn sá u-fakalee. Ti-Dindaan di tí tīī-si mara yii á dū ti-nabiki Seeloofaadi tinjandi kí tīī u-bisalib difakal[90].

³Bi yaa mɔ́ǹ Isirayeel yab naakooku kubɔ poon niliuee, timbi naakooku tinjandi yíkì ti-cee dee ki cūtìi kútì kunaakoou kun poon bi mɔ́ǹee tinjandi pu. Mimmee ditinjandi din bi tīī timbi difakalee bātì dee.

⁴Dibatɔl bindi[91] yaa bāańee, bíǹ tinjandi làá cùú dūú kūtì kunaakoou kun poon bi mɔ́ǹee, ní timbi baabi tinjandi ń bàtī ti-naakookun.»

⁵Ní ti-Dindaan bí Mooyiisi ń tùkù Isirayeel yab tibɔti nee yii: «Jooseefi naantiibi naakookun yab cáá ibaamɔn.

⁶Mara un man ni-Dindaan tīī Seeloofaadi bisalibee sèé. Bi ŋūǹ kí mɔ̄ǹ un ní bi yaa lèe, ama án nīn sá bi-baa naakookun bi nín pēē pēē mmaal puee niliu ubɔ.

⁷Bi yaa mɔ́ǹ mimmee, kunaakoou kubɔ tinjandi kaa ti yíkí kí cùú kūtì kubɔ pu, ama Isirayeel yab báà ŋma ń nīn ŋúb́ u-baa naakooku tinjandi.

⁸Isirayeel naakɔti poon ubisati ubɔ yaa fōō u-baa tinjandi difakalee, ú fàtīí mɔ̄ǹ u-baa naakookun bi nín pēē pēē mmaal puee niliu ubɔ. Mimmee Isirayeel yab báà ŋma làá nīn ŋúb́ u-baa naakooku tinjandi.

⁹Kunaakoou kubɔ tinjandi ń taa yīkìí póotí kubɔ poon, ama Isirayeel yab báà ŋma ń nīn pée ŋúb́ u-baa naakooku tinjandi nín sá puee.»

¹⁰Ní Seeloofaadi bisalib ŋá kii ti-Dindaan nín tīī Mooyiisi mara yii bí ŋá puee.

¹¹Niinee Maala nì Tiirsa nì Ɔgila nì Miilka nì Nɔɔwa mɔ́ǹ bi-baa nabiyaamu jipɔmbi.

¹²Bi nìn mɔ́ǹ Jooseefi jipɔɔn Manasee naakookun yab, ní bi-tinjandi din bi fōō difakalee gbíntì bi-baa maaliŋun.

¹³Abɔkpaa nì marab bin ti-Dindaan nìn dī Mooyiisi pu ki tīī Isirayeel yab Moowaab tantakalin, Jɔɔdan buŋgbandi ki túĺ Jeeriikoo tiŋkee dee.