Read Ntcham Nombres 4 Bible Online

Nombres 4 - Ntcham bible

Nombres 4

²«Leefii yab kansikinee, ní kàaǹ Keeyaati yab kí nóó nì bi-dicaŋŋi nì bi nín pēē pēē mmaal puee.

³Ní kíĺ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee.

⁴Atuun ŋin Keeyaati jipɔmbi làá nīn tūǹ circir kɔŋkooŋŋunee di sá bí nīn kpèé tin kɔkɔ pée sá circir páaayee.

⁵Ni yaa làá yīkì ni-naapaal puee, Aarɔn nì u-jipɔmbi ń sàkatī ŋŋaabu ŋun pītì poon diiŋŋee kí gíiǹ-ŋu kí bìin̄ dipoondi taŋkpapilinti dakaau pu.

⁶Bí dū ŋgban ŋun dàfèe kí bìin̄, ní kí dū sata un máǹ gàaayee kí páań an pu. Míǹ boonee ní bí dū tikúti kpandɔi kí bɔ̄ Dipoondi dakaau kpiŋŋi bɔmbiliŋ poon.

⁷Bí dū ŋŋaaman gùuu kí bìin̄ teebil un pu bi cāabìń kpɔnɔb ki pāantí Unimbɔti nimbiinee, kí dū palantab nì bikɔŋkɔnnyɔkaabi nì asambil nì bikɔŋkɔŋkpaambi bin bi cáa féeń Unimbɔti ndaamee kí páań, ní kí dū kpɔnɔb bin bi pāantí ŋwiin kamaa ti-Dindaan nimbiinee kí páań[6].

⁸Boonee ní bí dū ŋŋaaman cínciŋ kí bìin̄ tíǹ kɔkɔ pu ní kí fàtīí dū ŋgban ŋun dàfèe kí páań an pu, ní kí dū tikúti kpandɔi kí bɔ̄ teebil kpiŋŋin.

⁹Bí dū ŋŋaaman gàaa kí bìin̄ fitilab tɔ́kɔŋkaati[7] nì ti-fitilab nì ti-babikaati nì nsambiyaamu mun poon ŋfantam kàal̀ee nì kpalbab bin poon ŋkpam kàal̀ee pu.

¹⁰Bí dū an wantee kɔkɔ kí bóob́ kí tàkan̄ ŋgban ŋun dàfèe poon ní kí dūú páań nlún pu.

¹¹Bí dū ŋŋaaman gùuu kí bìin̄ sindaariya saraafaŋŋu pu, ní kí dū ŋgban ŋun dàfèe kí páań an pu, ní kí dū tikúti kpandɔi kí bɔ̄ ŋu-kpìmbiliŋin.

¹²Bí dū tin kɔkɔ bi cáa tūǹ saraabi tuuŋŋi circir kɔŋkooŋŋunee kí póob́ ŋŋaaman ŋun máǹ gùuuyee poon, ní kí dū ŋgban ŋun dàfèe kí bìin̄, ní kí dūú páań nlún pu.

¹³Bí fāā ŋfantam min bí nsaraafan puee ní kí dū ŋŋaaman kí bìin̄ ŋu-pu.

¹⁴Bí dū tin kɔkɔ bi cáa tūǹ nsaraafan pu tundee kí páań an pu, an dàkà yii kisambiki kin poon ŋkpam min bi wùn̄ee fantam kàal̀ee, nì kijiii kin cáá anyinee, nì kun bi cáa mɔ́fí ŋŋmee, nì disambil din poon bi ŋáań fatiku ki yàantée. Bí dū ŋgban ŋun dàfèe kí páań an pu, ní ki dū tikúti kpandɔi kí bɔ̄ nsaraafan kpìmbiliŋin.

¹⁵Aarɔn nì u-jipɔmbi yaa bɔ́ntì tin kɔkɔ sá circiree, ki bīiǹ ti-pu ki dóò bi làá yīkì dinaapaal puee, ní Keeyaati jipɔmbi ń dāá nín yòon̄-tì. Bí taa pée gbēē circir wanti gbanti. Bi yaa gbēē-tì bi làá kpú. Keeyaati jipɔmbi tundi di sá bí nīn tūntí circir wanti tin kɔkɔ bí dikpafindi tantiunee.

¹⁶Aarɔn jipɔɔn Eeleeyasaar tundi di sá ú nīn kpèé ŋkpam min bi cáa ŋáań fitilabinee, nì talaalub bin bi tùutēe, nì tijimpin saraabi bin bi ŋáań kutaa kamaayee, nì ŋkpam min bi sìtī unil yil pu kí dū-u ki sú Unimbɔtee. Úǹ di làá nīn kpèé circir kɔŋkooŋŋu nì tin kɔkɔ bí ŋu-poonee, an dàkà yii circir laŋki nì tin bi cáa tūǹ u-poon ditundee.»

¹⁷Ti-Dindaan sòon̄ nì Mooyiisi nì Aarɔn yii:

¹⁸«Ní kpèè tiŋan Keeyaati naakookun yab ń nīn bí kí taa kpú kí kúntí Leefii yab kansikin.

¹⁹Ni nín làá ŋá pu ní bi yaa sútìi pìl̄ circir wanti bí taa kpúee sèé. Sii Aarɔn nì a-jipɔmbi, ní cáá báà ŋma kí dàkà u-tundi din sá ú nīn tūǹee nì tiwan tin sá ú túńee.

²⁰Mimmee baa dāa gbōontí kí kpèè circir wanti, báà fiii gba. An yaa sá fám, see bí kpú.»

²¹Ti-Dindaan bí Mooyiisi yii:

²²«Á kàaǹ Geersɔn yab kí nóó nì bi-dicaŋŋi nì bi nín pēē pēē mmaal puee.

²³Á kíĺ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee.

²⁴Atuun ŋin Geersɔn jipɔmbi làá nīn tūǹ circir kɔŋkooŋŋunee di sá

²⁵bí nīn tūntí circir kɔŋkooŋŋu ŋaabui nì ŋu-poon diiku ŋaabui nì igban in dàfì bi cáa bìintí an puee nì ŋŋaabu ŋun lìkī circir kɔŋkooŋŋu punyɔkɔkee,

²⁶nì dicindi punyɔkɔki ŋaabui nì a yaa làá kɔ́ dicindi ŋŋaabu ŋun sàkā kipunyɔkɔ kí màntīí tū tanti nì nsaraafanee, nì circir kɔŋkooŋŋu ŋmiii, nì tin kɔkɔ bi cáa tūǹ niin ditundee. Bíǹ di yì an tuuŋŋi kɔkɔ kí nīn tūǹ[8].

²⁷Geersɔn yab làá nīn bí Aarɔn nì u-jipɔmbi taapu ní. Aarɔn nì u-jipɔmbi di làá nīn dàkà-bi atuun ŋin sá bí nīn tūǹee nì tiwan tin sá bí nīn tūntée.

²⁸Atuun ŋin bi dūu ŋúbiǹ Geersɔn jipɔmbi bí nīn tūǹ dikpafindi tantiu poonee dee. Usaraaŋakpil Aarɔn jipɔɔn Itamaar di làá nīn kpèé-bi ní bi tūǹ atuun gbanti.

²⁹«Á kàaǹ Meerarii yab kí nóó nì bi-dicaŋŋi nì bi nín pēē pēē mmaal puee.

³⁰Á kíĺ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee.

³¹Atuun ŋin Meerarii jipɔmbi làá nīn tūǹ circir kɔŋkooŋŋunee di sá bí nīn tūntí tanti punyɔmmu dɔi nì ikalim nì idɔjaati nì i-taapu tílkaati,

³²nì idɔjaati in bi cōontí kí màntīí tū dicindee nì i-taapu tílkaati nì akpakpaa nì iŋmii nì tin kɔkɔ pée sá ditundi gbanti wantee. Ní dāá ŋmà báà ŋma nín máaǹ kí túń kuwaŋu kuŋyee kí tīī-u.

³³Atuun ŋin bi dūu ŋúbiǹ Meerarii jipɔmbi bí nīn tūǹ dikpafindi tantiu poonee dee. Usaraaŋakpil Aarɔn jipɔɔn Itamaar di làá nīn kpèé-bi ní bi tūǹ atuun gbanti.»

³⁴Mooyiisi nì Aarɔn nì samaa kpilib kàan̄ Keeyaati yab ki nóó nì bi-dicaŋŋi nì bi nín pēē pēē mmaal puee.

³⁵Bi nìn kàan̄ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee.

³⁶Bi nìn nyáń binib kutukub bili nì alaataa aluli nì imuŋku ili nì saalaa.

³⁷Binib bin nyɔkɔm bi nìn kàan̄ Keeyaati dicaŋŋin bi bí ki tūǹ ditundi circir kɔŋkooŋŋunee dee. Mooyiisi nì Aarɔn nìn kàan̄-bi kii ti-Dindaan nín nìn sòon̄ nì Mooyiisi puee.

³⁸Bi nìn kàan̄ Geersɔn yab ki nóó nì bi-dicaŋŋi nì bi nín pēē pēē mmaal puee.

³⁹Bi nìn kàan̄ bin cáá abin mmuŋku nì saalaa kí cáá sāā abin imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee.

⁴⁰Bi nìn nyáń binib kutukub bili nì alaataa aluu nì binib mmuŋku nì saalaa.

⁴¹Binib bin nyɔkɔm bi nìn kàan̄ Geersɔn dicaŋŋin bi bí ki tūǹ ditundi circir kɔŋkooŋŋunee dee. Mooyiisi nì Aarɔn nìn kàan̄-bi kii ti-Dindaan nín nìn sòon̄ nì Mooyiisi puee.

⁴²Bi nìn kàan̄ Meerarii yab ki nóó nì bi-dicaŋŋi nì bi nín pēē pēē mmaal puee.

⁴³Bi nìn kàan̄ bin cáá abin mmuŋku nì saalaa kí cáá sāā abin imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee.

⁴⁴Bi nìn nyáń binib kutukub bita nì binib alaataa ali.

⁴⁵Binib bin nyɔkɔm bi nìn kàan̄ Meerarii dicaŋŋin bi bí ki tūǹ ditundi circir kɔŋkooŋŋunee dee. Mooyiisi nì Aarɔn nìn kàan̄-bi kii ti-Dindaan nín nìn sòon̄ nì Mooyiisi puee.

⁴⁶Leefii yab bin kɔkɔ Mooyiisi nì Aarɔn nì Isirayeel kpilib nìn kàan̄

⁴⁷kí yòon̄ bin cáá abin mmuŋku nì saalaa kí cáá sāā abin imuŋku ili nì saalaa, an dàkà yii bin ŋūǹ kí tɔ̄ ditundi circir kɔŋkooŋŋunee

⁴⁸nìn nyáń binib kutukub binii nì alaataa aŋmoo nì binib imuŋku inaa ní.

⁴⁹Kii ti-Dindaan nín nìn bí Mooyiisi ń ŋá puee, u nìn tīī báà ŋma tundi din sá ú tɔ̄ee, ní ki nìn dàkā biwantunliibi tin sá bí túńee. Bi nìn kàan̄-bi kii ti-Dindaan nín nìn tīī Mooyiisi mara puee.