Read Ntcham Nombres 6 Bible Online

Nombres 6 - Ntcham bible

Nombres 6

¹Ti-Dindaan bí Mooyiisi

²ń tùkù Isirayeel yab kí síiń-bi mara nee yii: «Uninja àá unimpu ubɔ di yaa làá gàntī u-ba kí pòon̄ kí dū u-ba kí sú man ni-Dindaanee,

³udaan ń taa nyɔ̀ ndamam nì idafi in kɔkɔ pée pɔ̄ɔ̄yee[12], kí taa nyɔ̀ ndaam min nyàm̀ bi lēē-mi ndamam poonee, nì ndaam min poon bi tɔ́ dinyaalee, nì fiinyi subiliŋ ŋin bi ŋmáaḿee nyim. Ú taa ŋmɔ́ fiinyi subiliŋ asoon àá akulim.

⁴Ŋyunti ŋun kɔkɔ ní u pōoǹ ki dū u-ba ki sú-mee, ú taa ŋmɔ́ tin kɔkɔ sá fiinyi subu wantee. Ú taa ŋmɔ́ fiinyi subil poon biliŋ, kí taa ŋmɔ́ di-pɔkɔku gba.

⁵Ŋyunti ŋun kɔkɔ u dū u-ba ki sú-mee, ú taa yàntī bɔlfi ń gbēē u-yil. Ú nīn bí circir kí yàntī u-yikpiti ń nīn múkú, kí nīn cí ŋyunti ŋun u yóoǹee yaa láa bàn̄ee[13].

⁶Ŋyunti ŋun kɔkɔ u dū u-ba ki sú man ni-Dindaanee, waa máaǹ kí gbēē utaŋkpiil.

⁷U-baa àá u-na àá u-nabiki di yaa kpíì, waa cáá nsan kí sútí kí pìl̄-bi. Di sá yii u-yikpiti tin u túee di dàkà yii u dū u-ba ki sú man u-Nimbɔtiu.

⁸«Ŋyunti ŋun kɔkɔ u pōoǹ ki dū u-ba ki sú-mee, man ni-Dindaan di kíǹ ki yì-u.

⁹Ubɔ yaa lítì u-caŋin ki kpíì dicilpu dicilpuee, u nín dū u-ba ki sú-mi puee bíil̀ dee. Ú kòol̀ u-yil ŋwiin ŋun ní u làá nyā tijɔkɔndin kí fàtīí kpántí circiree, an dàkà yii winluli dal.

¹⁰Winnii dalee, ú cáań ananjil ali àá abeenanjil ali kí tīī usaraaŋal circir kɔŋkooŋŋu punyɔkɔpu.

¹¹Usaraaŋal ń dū diba kí ŋá ikpiti pɔ̄tam saraau, ní kí dū din kíǹee kí ŋá saraawɔkaa. Boonee ní usaraaŋal ń ŋá akoobil nín sá puee kí fíntí-u kí nyāntí utaŋkpiil un gbēē-uee jɔkɔntin. Yaadal ní ú fàtīí kíĺ kí pòon̄ kí dū u-ba kí sú mpɔm.

¹²Míǹ ní ú ŋá ní kí fàtīí kíĺ kí pòon̄ kí dū u-ba kí sú ti-Dindaan mpɔm. Ú dū dibindi diba pibil kí ŋá saraa un ŋáŋkí dibɔkpilee. Ŋyunti ŋun u ŋá ní ki dāa nín gbēē dinikpilee ŋá fám dee, kun puee u kɔ́ tijɔkɔndin.

¹³«Un dū u-ba ki sú-mee yuntiŋu yaa sāāyee, u nín máaǹ kí ŋá puee marau sèé. U-yuntiŋu yaa sāāyee, bí yàntī ú dāan̄ circir kɔŋkooŋŋu punyɔkɔki nyɔkɔpu.

¹⁴Ú nīn ŋúbiń saraa wanti nee kí cáań man ni-Dindaan. Ú dū dipibil din cáá dibindi diba di-laaba kaa wɔ̀b̄ee kí ŋá saraawɔkaa, kí dū upisal un cáá dibindi diba u-laaba kaa wɔ̀b̄ee kí ŋá ikpiti pɔ̄tam saraau, ní kí dū upìja un laaba kaa wɔ̀b̄ee kí ŋá mpèé saraau.

¹⁵Ú cáań kpɔnɔb bin poon baa ŋá ŋkpɔnɔnyɔkɔee kikabiki poon, nì ŋkpɔnɔwaamu mun bi dū ŋkpam ki ŋmālim̀ ki búuń ki púĺ ŋkpɔnɔnyɔkɔ kpá poonee nì kalaabi bin pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee, ní kí cáań tijimpin saraau nì ndaam.

¹⁶Ní usaraaŋal ń fōō tiwanee kí cáań ti-Dindaan nimbiin kí dūú ŋá ikpiti pɔ̄tam saraau nì saraawɔkaa.

¹⁷Ú dū upìja nì kpɔnɔ un kaa cáá ŋkpɔnɔnyɔkɔ ki kā kikabikinee kí ŋá mpèé saraau. Boonee ní usaraaŋal ń ŋá tijimpin saraau nì ndaam saraau.

¹⁸Ŋyunti gbantee ní un pōoǹ ki dū u-ba ki sú-mee ń kòol̀ u-yikpiti circir kɔŋkooŋŋu punyɔkɔki nyɔkɔpu, ní kí dū tiyikpitee kí tɔ̄ mpèé saraau un pá nsaraafan pu ki wùee poon.

¹⁹Ŋyunti ŋun u kōol̀ u-yil ki dóòyee, ní usaraaŋal ń lēē upìja nanti tin bi tɔ́kɔǹee kuboou, nì kpɔnɔb bin kā kikabikin kaa cáá ŋkpɔnɔnyɔkɔee ubɔ, nì kalaabi bin kaa cáá ŋkpɔnɔnyɔkɔee ubɔ, kí dūú tàkan̄ un dū u-ba ki sú-mee ŋaan.

²⁰Niinee ní usaraaŋal u-ba ń yòon̄ saraa wantee kí fíiǹ fíiǹ ní kí dūú ŋá ti-Dindaan saraa. An saraabee sá circir ní, usaraaŋal di yì upiiyee taal din bi dūu ŋá saraayee nì u-bindi din bi lēē ki yóoǹee. Bi yaa ŋá mimmee, udaan ŋūǹ kí kíĺ kí nīn kíǹ ki nyù ndamam.

²¹«Mara un bi síiǹ un yaa pōoǹ kí dū u-ba kí sú man ni-Dindaanee dee. Saraa wanti tin u máaǹ kí cáań kí ŋá saraabi kí tīī-mee dee. Udaan yaa cáá ŋŋmam, u ŋūǹ kí cáań saraa wanti tiba kí kūtì. Tin u pée máaǹ kí ŋée di sá ú tīī tin u pōoǹee, kí ŋá saraabi kí nóó nì mara un bi síiǹ un pōoǹ ki dū u-ba ki sú-mee nín máaǹ kí ŋá puee[14].»

²²Ti-Dindaan bí Mooyiisi

²³ń tùkù Aarɔn nì u-jipɔmbi yii: «Ni yaa làá bìin̄ Isirayeel yab puee, ní lì yii:

²⁴<Ti-Dindaan ń bìin̄ a-boon kí wúń a-pu!

²⁵Ti-Dindaan ń bútí a-pu nnimbiin, u-ŋanti ń nīn bí a-pu!

²⁶Ti-Dindaan ń pɔ̄-si nnimbiimmɔnti kí tīī-si ŋgbansɔŋfi!>

²⁷Ŋyunti ŋun ní bisaraaŋaliibi yaa yíiń m-yindi míǹ kí bìin̄ Isirayeel yab puee, man m-ba di làá bìin̄ bi-pu.»