Read Ntcham Nombres 8 Bible Online

Nombres 8 - Ntcham bible

Nombres 8

¹Ti-Dindaan bí Mooyiisi

²ń tùkù Aarɔn yii: «A yaa làá yóoń fitilab circir kɔŋkooŋŋunee, á yàntī bi-walifiŋu ń nīn ŋmíntí fitilab bilulee tɔ́kɔŋkaati nimbiin pú.»

³Ní Aarɔn ŋá kii ti-Dindaan nín tùkū Mooyiisi yii ú ŋá puee. U nìn dū fitilabee ki yóoǹ min ní án làá nīn ŋmíntí fitilab tɔ́kɔŋkaati nimbiin púee.

⁴Bi nìn dū sindaariya ní ki mɔ́ɔ́ fitilab tɔ́kɔŋkaati, kí yòon̄ taapu ki cáá sāā ikpiin. Bi nìn mɔ́ɔ́ fitilab tɔ́kɔŋkaati kii ti-Dindaan nín nìn dàkā Mooyiisi yii ú mɔ́ɔ́-bi puee ní.

⁵Ti-Dindaan bí Mooyiisi yii:

⁶«Á gàntī Leefii yab Isirayeel yab kansikin kí bɔ́ntí-bi bí nīn bí circir.

⁷A nín làá ŋá-bi pu ní bí nīn kíǹ ki bí circiree sɔ̀. Á dū nnyim min bi cáa fíntí ki lèekī ikpitee kí yɔ̄kɔfì bi-pu, kí yàntī bí kòol̀ bi-wunti pu kuti kɔkɔ ní kí fíntí bi-wampeeŋkaati. Bi yaa ŋá mimmee, bi kpántì circir dee.

⁸Boonee ní bí cáań unaja nì ŋyim min bi búuń ŋkpaminee, ní sii a-ba ń yòon̄ unajaliliiti un sá bí dūú ŋá ikpiti pɔ̄tam saraauee.

⁹Á yàntī Leefii yab ń sútiń kí yūĺ circir kɔŋkooŋŋu nyɔkɔpu, ní kí yíiń Isirayeel samaau kɔkɔ kí kpāfì.

¹⁰Á yàntī Leefii yab ń sútiń kí yūĺ m-nimbiin ní Isirayeel yab ń dū bi-ŋalii kí páań bi-pu.

¹¹Ní Aarɔn ń dū-bi kí sú-mi kii saraa ní Isirayeel yab ŋá ki tīī-mee, ní bí nīn kíǹ ki sá bin bi gāntì bí nīn tūǹ man tundee.

¹²Leefii yab ń dū bi-ŋalii kí páań inajaayee yiliŋ pu ní á dū unaja ubɔ kí ŋá ikpiti pɔ̄tam saraau kí tīī-mi, ní kí dū un kíǹee kí ŋá saraawɔkaa. Míǹ boonee ní Aarɔn ń ŋá dikoobil din u máaǹ kí ŋée Leefii yab pu ní bí ká bi-kpitii pɔ̄tam.

¹³Míǹ boonee ní á yàntī Leefii yab ń yūĺ Aarɔn nì u-jipɔmbi nimbiin, ní á dū-bi kí sú-mi.

¹⁴Mimmee a gāntì Leefii yab Isirayeel yab kansikin dee, bí nīn kíǹ ki sá man yab.

¹⁵Kí yòon̄ ŋyunti gbantee ní Leefii yab ŋūǹ kí kɔ́ dikpafindi tantiu poon kí nín tūǹ bi-tuuŋŋi. «Míǹ ní an sá á dī kí ŋá Leefii yab circir ní kí dū-bi kí sú-mi.

¹⁶Di sá yii Isirayeel yab kansikinee, bíǹ ní bi dūu sú-mi kɔkɔ. Ní ḿ fōō-bi Isirayeel yab biseebiyaamu nninjabiyaamu kɔkɔ yil pu.

¹⁷Di sá yii Isirayeel yab biseebiyaamu nninjabiyaamu kɔkɔ ki kpáaǹ bi-waŋkuti biseebiyaamu njamu kɔkɔee, man di yì. Kí yòon̄ daliŋkin m kūū Eejipiti tiŋkin mbiseebiyaamu nninjabiyaamuee ní m dū Isirayeel yab biseebiyaamu ki sú m-ba[15].

¹⁸M yōoǹ Leefii yab ní ki dūu kpántì Isirayeel yab biseebiyaamu nninjabiyaamu.

¹⁹M lēē-bi Isirayeel yab kansikin ki dū-bi ki tīī Aarɔn nì u-jipɔmbi. Bi làá nīn bí dikpafindi tantiu poon ki tūǹ ditundi ki tìì Isirayeel yab bin kíǹee, ní kí nīn ŋáań Isirayeel yab pu akoobil nín sá puee bí ká bi-kpitii pɔ̄tam. Mimmee Isirayeel yab kaa ti sútí kí pìl̄ circir kɔŋkooŋŋu ní kaa nín kpíì.»

²⁰Mooyiisi nì Aarɔn nì Isirayeel yab kɔkɔ nìn ŋá Leefii yab pu kii ti-Dindaan nín nìn tīī Mooyiisi mara ú ŋá puee deedee.

²¹Leefii yab nìn ŋá tin kɔkɔ pée sá bí ŋá kí kpántí circiree, ki fíntì bi-wampeeŋkaati. Boonee ní Aarɔn dū-bi ki sú ti-Dindaan, ní ki ŋá akoobil nín sá puee bí kpántí circir.

²²Míǹ boon ní Leefii yab kíĺ bi-tuuŋŋi dikpafindi tantiun. Aarɔn nì u-jipɔmbi di nìn kpòotī-bi atuun gbanti poon. Ti-Dindaan nín nìn tīī Mooyiisi mara yii bí ŋá Leefii yab puee, míǹ deedee ní bi nìn ŋá.

²³Ti-Dindaan gíti bí Mooyiisi yii:

²⁴«Leefii yab ń nīn cáá abin mmuŋku nì aŋmoo ní kí nín kíĺ ditundi dikpafindi tantiun.

²⁵Bi yaa tin bàn̄ abin imuŋku ili nì saalaayee, bí gbèen̄ kí taa ti tɔ̄ ditundi.

²⁶Bi dāa ŋūǹ kí tūtuǹ bi-nabiyaamu circir kɔŋkooŋŋu poon atuun, ama baa dāa sá bin bi tìì atuun aba bí tɔ̄ee. Án nín sá á bɔ́ntí atuun min kí tīī Leefii yabee dee.»