Read Ntcham Michée 1 Bible Online

Michée 1 - Ntcham bible

Michée 1

¹Ti-Dindaan nìn sòon̄ nì Miika un sá Mooreeseeti timbiliikin iyunti in ní Yootam nì Akaasi nì Eeseekiyaasi nìn kāl̀ kāl̀ dibeel Juuda tiŋki puee. Tibɔti tin ti-Dindaan nìn lēē ki dàkā-u Samaarii nì Jeerusaleem timmu puee sɔ̀.

²Anibul kɔkɔ nib, ní pīlifìmaan! Kitiŋ nì bin kɔkɔ kóò ki-puee, ní kpòom̄maan ni-tafal kí pīlifì. Ti-Dindaan làá sòoǹ ni-tuŋkpitiŋ pu doooo u-circir kɔŋkooŋŋun.

³Tiŋman, ti-Dindaan nyánní u-kɔŋkooŋŋun. U sìntìń ki còom̄ ŋgbantamu yilpu kúntí kunti.

⁴Ajoon ŋin pu u tɔ́kɔ́ee dùntī kii tikaliŋkpun di kā ŋŋminee, ní atantaka fátí iwèeń kii nnyim nín pùub̀ dijool pu puee.

⁵Tin bí nee kɔkɔ bāań kun puee Jaakɔb naantiibi ŋá ikpiti, Isirayeel yab kaa yúl̀ deedee. Ŋma yàntī Jaakɔb naantiibi ŋáań ikpiti ní? An kaa sá Samaarii tiŋkaaa? Ŋma yàntī Juuda yab kóò iwaatootin ní? An kaa sá Jeerusaleem tiŋkaaa?

⁶«Ti-Dindaan nín lī puee sɔ̀. An puee m làá yàntī Samaarii tiŋki ń kpántí adigbuŋkati ŋma kitiŋ kin pu bi dāa ŋūǹ kí kpɔ̀ fiinyi sufiiyee. M làá yàntī bí bíntí u-diiŋŋi taŋkpeeŋi kí tɔ̄ nsitimin, ní kí bìitī bi-tiŋki nyeel pu án nīn wāĺ.

⁷M làá gbá kí wīī bi-waaŋi kɔkɔ, ní kí dū tiwampɔkaal tin bi pú-ŋee kí tɔ̄ ŋŋmin. M làá nà awaa gbanti dúsi dusi, di sá yii nlaakpaamu paati ní bi dūu ká tiwan gbanti kɔkɔ, ní tiwan gbanti làá fàtīí kpántí nlaakpaamu paati.[1]»

⁸«Miika nín lī puee sɔ̀. M làá sɔ̄ kí yāliŋkì. M làá nīn còom̄ kaa táká anaataka, kaa pēē tiba. M làá gāā dituweel kii jiiŋkpaai nín sūǹ puee, kí nīn yáliŋkí kii taataayee.

⁹Di sá yii tiweendi tin Samaarii tiŋki fōōyee kaa cáá nnyɔkɔ. Tì nyātì ki bàn̄ Juuda tiŋki, ki tin gūū Jeerusaleem punyɔmmu, laakin m-nibul kóòyee.

¹⁰Ní taa māafì an bɔti Gaati tiŋkin, taa sɔ̄maan. Beeti-Leeyafiira tiŋkin yab, ní dòom̄maan ntampukumin kí nīn bíntí.

¹¹Nimbi bin kóò Safiir tiŋkinee, kíĺmaan kuyuŋu saŋŋu nì icoo nì dicancaŋgbeel. Bin kóò Saanan tiŋkinee kaa kíikí kí nyā bi-tiŋkin.

¹²Bin kóò Marɔti tiŋkinee kíǹ ki sūǹ bi-ba pu ki mèé yii mbusu ń cù ndan. Di sá yii nnaabu ŋun nyánní ti-Dindaan ceeyee bāań ki gūū Jeerusaleem punyɔmmu.

¹³Nimbi bin kóò Lakiisi tiŋkinee, ní dū janjatɔrɔkub kí kúĺ kí lúntí itaamu. Naa yúl̀ nì Unimbɔti deedee kii Isirayeel yabee, ní ki dáaĺ Jeerusaleem yab ki kɔ́ǹ ni-tuŋkpitiŋin.

¹⁴An pu ní ni máaǹ ni nì Mooreeseeti-Gaati tiŋkin yab ń yàkatī tɔbin. Akisiib tiŋkin yab kaa làá dāá ŋmā kí jòò Isirayeel yab bɔtiibi.

¹⁵Nimbi bin kóò Mareesa tiŋkinee, ti-Dindaan làá dū ujanjapɔɔl ubɔ kí tɔ̄ ni-pu. Isirayeel nigaakaabi làá dāá sāǹ kí cù Adulaam taŋkpalɔkɔŋun kí báĺ.

¹⁶Nimbi bin kóò Jeerusaleemee, ní cāmaan ni-yikpiti, ní kòol̀maan dibaakpandi ni-biyaamu mun ni néeń tikpilee pu. Ní nīn tú dibaakpandi kii kaajiikuee, kun puee bi làá cùnnì ni-biyaamu kuyuŋu kitiŋ kin dátiǹ-nee poon.