Read Ntcham Michée 2 Bible Online

Michée 2 - Ntcham bible

Michée 2

¹«Mbusu dɔ̄ ki cí bin dɔ̄ kunyeeu ki dàkafī kí ŋá tibɔkpitil ki bɔ́ntí kí tɔ̄ atuŋkpitee! Kutaa tin pée lì yii ku wúntéee, bi ŋá bi nín bɔ́ntì puee, di sá yii bi cáá an pɔŋŋu.

²Biba kpaatanti yaa kɔ́-bi nnimbitaataamee, bi cútí ní kí fōō. Bi yaa tí ká adiin fáatiǹ-bee, ní bí cúú kí fōō. Bi fìkì kudiidaan nì u-dicaŋku, unil nì u-fakal.

³An pu ní ti-Dindaan lī yii: <M bíi bɔ́ntí nnaabu kí tɔ̄ nimbi bin tūǹ an tuuŋŋee pu. Naa làá dāá ŋmā kí ŋmátí. Naa làá dāá nīn gíti còom̄ ni-yiliŋ gáań, di sá yii an dāa sá dinimbinaamandi yuntiŋu ní.>

⁴Ŋwiin gbantee, bi làá dāá gāā-ni nlan, bi làá dāá nīn gà ŋkpiisilan nee yii: <Bi fúkúl̀-ti pílpil. Ti-nibul kaa ti cáá kitiŋ. Bin bíi fúkuĺ-tee dū ti-sati ki yākatì.»

⁵Too, ti-Dindaan nibul yaa làá dāá fàtīí yàkatī tikpaatanee, ni-kansikin báà ubɔ kaa dāa cáá kí fōō dijandi.

⁶Biba sòoǹ nì mi yii: «Taa ti sòoǹ tin a sòoǹ nee. Aa máaǹ kí nīn lì yii: Icoo làá jī-ti.

⁷Bi ŋūǹ kí sòoǹ mimmaaa, Isirayeel yab? Ti-Dindaan kaa ti cáá kimɔtii níii? Míǹ ní u tūǹ u-tuuŋŋaaa?» Mamee, m cáá dinyɔɔbummɔɔndi kí tīī un bí deedeeyee.

⁸Nimbi pu ní an lī yii: «Ni dū m-nibul ki kpántì m-nannanliibi. Ni fòol̄ bin nyánní kujaau ki còom̄ ki cá nì ŋgbansɔŋfee bɔkutikpaaŋŋi.

⁹Ni jì m-nibul nimpoobi ki nyāntí bi-diiŋŋi ŋin bi néeńee poon. Ni fòol̄ bi-biyaamu cee tinyool tin m tīī-bi kí nīn cáa cá jaanjaanee.

¹⁰Yīkìmaan! Nín̄ cámaan! An kaa sá diŋuŋfil yuntiŋu! Ni-jɔkɔntuuŋŋi puee, nnaabukpaan dɔ̄ ki cí-ni.»

¹¹Binib yaa bí ki cáá kubɔcaau, ki nāantí tinyimɔmbɔti ki lì yii: «Ni làá ká ndamam nì ndaam min pɔ̄ɔ̄yee kí nyɔ̀.» Kubɔcaau gbanti dambi gíti lì yii:

¹²«M làá kóoǹ ni-kɔkɔ kí kpāfì, Jaakɔb naantiibi. M làá kóoǹ Isirayeel yab bin kíǹ kaa kpíìyee kí kpāfì ubaanti. M làá kóoǹ-ni kí kpāfì ubaanti kii ipii nín kpáfí pu kupikpuŋkpuŋunee. Ni làá dāá bùtī kí ŋá dinikitikpaandi bí gbìl̄ ni-pu.

¹³Un pìitī nsanee làá nīn līī ni-nyɔkɔpu. Ni tɔ́ ni-ba, dīmaan kipunyɔkɔ kí nyā. An sá ti-Dindaan ni-bɔtiu di līī ni-nyɔkɔpu ki kpòotī-ni.»