Read Ntcham Michée 4 Bible Online

Michée 4 - Ntcham bible

Michée 4

¹«Ŋwiin bí ki dòoń, dijool din pu ti-Dindaan Diiku tɔ́kɔ́ee[3] làá dāá nīn tɔ́kɔ́ ajoon kɔkɔ pu, di làá dāá nīn fɔ̀kɔǹ ŋgbantamu kɔkɔ. Anibul làá dāá nīn bìtifī ki dòoń di-cee.

²Atimbun tikpil làá dāá tàkan̄ nsan ki cá ki lì yii: <Dāam̄maan tí jɔ̄m̀ ti-Dindaan jool pu, tí jɔ̄m̀maan Jaakɔb Nimbɔtiu Diikun! U làá dàkà-ti kun u là tí ŋée ní tí nóó u-sàmbiyaamu.> Tiŋman, Siiyɔn ní Mara làá nyānní, u-nyɔɔbundi làá nyānní Jeerusaleem ní.

³U làá dāá sòoǹ kí ŋāŋkì anibul tikpil kansikin bɔti, kí dāá ŋāŋkì atimbun ŋin cáá mpɔn ki bínní ndandatee kansikin bɔti. Binib làá dāá dū bi-tàataajimmu kí dūú mɔ́ɔ́ akoo, ní kí dāá dū bi-kpammu kí mɔ́ɔ́ igɔti. Ditimbundi diba kaa dāa gíti jáà nì di-juti, ní binib kaa dāa bífí kujaau.

⁴Báà ŋma dāa kíǹ ki kā u-fiinyi nì u-fiigi sufii taapu, ní ubɔ kaa dāa bí kí páb́-u.» Ti-Dindaan Mpɔŋkɔdaan di sòon̄ míǹ.

⁵Ditimbundi kamaa ŋáań tin làá fáatíǹ di-waaŋee ní, ama timbi làá nīn ŋáań tin làá fáatíǹ ti-Dindaan ti-Nimbɔtiuee ní kí nīn cá jaanjaan.

⁶Ti-Dindaan lī yii: «Ŋyunti gbantee, m làá kóoǹní bin fōō tiweendee kí kpāfì, m làá gíiǹní bin tafal m dáaĺ ki yāntì bi yàl̄ ki bínní kuyuŋuee.

⁷Bin fōō tiweendi gbantee, m làá dū-bi kí náań dinibul din bí dimaŋfalinee. Bin bínní kuyuŋunee, m làá dū-bi kí kpántí ditimbundi din pɔ̄ɔ̄yee. Man bi-Dindaan di làá dāá nīn sá bi-bɔtiu Siiyɔn jool pu, kí yòon̄ ŋyunti gbanti kí nīn cáa cá jaanjaan!

⁸Sii Jeerusaleem jool, a wúǹ dinibul pu kii upikpaal nín tɔ̄kɔntí kudifɔkɔu pu ki kpèé u-piii puee ní. A làá fàtīí ká mpɔn ŋun a nìn cáá njaminee. A làá fàtīí kpántí dibeel tiŋyil.»

⁹Kɔŋkɔnnee Jeerusaleem yab, ba pu ní ni sūǹ ki tátí míǹ? Ba pu ní ni bí ki yáliŋkí kii imatiŋween di bāań-nee? Naa ti cáá ubɔti níii? Ni-saŋkiliibi kpíì níii?

¹⁰Nín̄ yáliŋkí nì ni-ba, kí nīn kūuntí kii upɔdaan di bíi màal̀ee. Di sá yii kɔŋkɔnnee ni làá nyā kitiŋin kí tin nín̄ kóò tisatin, áli kí tin bà Babiloon tiŋkin. Niin ní bi làá dā-ni kí líí, niin ní ti-Dindaan làá fīī-ni kí nyāntí ni-nannanliibi ŋaan.

¹¹Kɔŋkɔnnee Jeerusaleem, atimbun tikpil kóoǹ ki kpáfì kí já nì si. Ŋi lì yii: «Tí bīil̀-kì! Bi yaa nāaǹ Siiyɔn tiŋki, án làá nīn mɔ̄ǹ-teeee!»

¹²Atimbun gbanti nín kaa nyí ti-Dindaan nín bɔ́ntì kí ŋá pu, kaa nyí u-landɔkɔyee pu ní ŋi ŋáań míǹ. Úǹ là kí kóoǹ-ŋi kí kpāfì kii bi nín kōontí idi kí bíĺ dinaapaal pu kí gbée ní.

¹³Nimbi bin kóò Jeerusaleem tiŋkinee, yīkìmaan kí gbá idi. M làá yàntī ní nīn pɔ̄ɔ̄ kii unaa un yiŋyi sá tikúti ní u-tafuŋfukuti sá tasa kútee. Ni làá nàan̄ anibul tikpil. Tigaajawan tin ni làá fōō bi-ceeyee, ní dū-tì kí sú man ni-Dindaan, duulinya kɔkɔ kpiliu.

¹⁴Kɔŋkɔnnee, nimbi bin kóò Jeerusaleemee, kóom̀maan kí kpāfì. Binannanliibi māntìi tú-ti kí jáǹ-ti. Bi ŋúb́ ndɔ ki fátí Isirayeel bɔsoonliu nimbiin[4].