Read Ntcham Michée 6 Bible Online

Michée 6 - Ntcham bible

Michée 6

¹Ní pīlifìmaan tibɔti tin ti-Dindaan sòon̄ee. Yīkì kí sòoǹ kí mɔ̄tì m-pu ajoon nimbiin, kí mɔ̄tì m-pu ŋgbantamu nimbiin.

²Nimbi ajoon nì dinyeel din pu kitiŋ tɔ́kɔ́ kaa cìŋkēe, pīlifìmaan. Ti-Dindaan yíiń u-nibul ibeeyiin, u bíi sòoǹ Isirayeel yab bɔti.

³U bí yii: «M-nibul, ba ní m ŋá-si ní? Digìńdi dilal poon ní m kɔ́ǹ-si ní? Á kíí-mi!

⁴M nín nyántìń-si Eejipiti tiŋkineeyaaa, m nín dá-si ki nyántì kuyuŋuneeyaaa, m nín tú Mooyiisi nì Aarɔn nì Miiriyam bí kpòotī-see ní m yīntì ní[7].

⁵M-nibul, á téetí tin bí nee! Moowaab bɔtiu Balaaki nìn bɔ́ntì kí ŋá-si tikpitil. Téetí tin Beewɔɔr jipɔɔn Balaam nìn kíí-uee. Míǹ boonee, a yíkì Siitiim tantakalin ki cūtì Giilgaal paaŋŋu pu. A nìn ŋúń ki ká tiŋaŋkpaandi tin man a-Dindaan ŋá ki tīī-see.»

⁶Ti yaa dɔ́miń kí jāam̀ ti-Dindaanee, ba ní ti máaǹ kí nīn ŋúb́ kí cáań kí ŋá saraa kí tīī Yilpu Fɔ́ŋŋŋ Nimbɔtiu dee? Ti kalin cāabìń dibindi diba nabil kí ŋá saraa kí tīī-uaaa?

⁷U là ipijaa kutukub naaa, ŋkpam ń nīn pùub̀ ibun kutukub kutukub poon ní? Tí dū ti-jipɔŋkpilib kí ŋá saraa ti-yìntitam puɔɔɔ, ti nín dù ti-poon naŋu kí ŋá saraa ti-kpitii pu ní?

⁸Unil, ti-Dindaan dàkā-si tin ŋān̄ee. Kun u bàlifī-see di sá á nīn ŋáań tin bí deedeeyee, kí nīn néeń ki ŋáań tikɔkɔ nì tiniti ní kí nīn nóó a-Nimbɔtiu nì dibasintil.

⁹Ti-Dindaan bíi sòoǹ nì bin kóò kitiŋ nee poonee! U làá fīī bin fàŋkí-uee. «Pīlifìmaan, Juuda naakookun yab, nimbi bin kɔkɔ kóoǹ ki kpáfì kitiŋ nee poonee!

¹⁰Binikpitib dumpuyee, bi kāntí tigaajawan tin bi mūul̀ binib ki kée ní. Di sá yii ni cáá tiwaŋŋmantikaal tin kaa bí deedeeyee ki mùul̄ binib. An sá ntimbiil tuuŋŋi ní. Maa ŋūǹ kí nīn wāĺ míǹ kí nīn kā ki ŋmí.

¹¹Biba tútì bi-saniyab baa ti ŋmàntī tiwan deedee, ki cáá bi-lookun ataŋkpee ŋin bi cáa ŋmàntī nnyiŋfee mili pu ki cáa mùul̄ binib. Ḿ sòoǹ kí pɔ̀ binib gbantaaa?

¹²Kitiŋ nee gaajab fìkì binib ŋma ní. Ki-nib sá binyimɔndambi ní. Bi yaa pée wāaǹ kinyɔkɔ kí sòoǹee, an sá kí kīil̀ binib ní.

¹³An pu ní m dū falaa ki gbáń-ni, ki làá nàan̄-ni ni-kpitii pu.

¹⁴Ni làá jī ama kaa làá díkì, ŋkùm làá nīn pée bí ni-dicaŋŋin ní. Ni làá dāá kpāafì ni-kpaajinti, ama tì làá bùkū. Báà ni yaa láa kpáafì ni-wanti tibaaa, m làá dāá bīil̀-tì kujaaun.

¹⁵Ni làá dāá kpɔ̀ kí bɔ̄l̀, ama kaa làá dāá ŋmā kí cā. Ni làá dāá ŋmáaḿ kí lēē ɔliifi subiliŋ kpam, ama kaa làá dāá ká-mì kí ŋmìtī. Ni làá dāá ŋàan̄ ndaam, ama kaa làá dāá nyɔ̀-mì.

¹⁶Ni nóó ubɔti Oomirii nì u-jipɔɔn Akaab dicaŋkun yab bimbikpitim. Ni ŋáań kii binib gbanti nín ŋáań puee. An pu ní m làá nàan̄ ni-tiŋki, ní kí yàntī bin kíǹee ń nīn bèel̄ nimbi bin kóò ki-nee. Icoo in jíń m-nibulee làá jī ni mun.»