Read Ntcham Nahoum 1 Bible Online

Nahoum 1 - Ntcham bible

Nahoum 1

¹Kugbɔŋu nee poonee, tibɔti tin sòoǹ Niiniifi tiŋki puee kā. Tibɔti gbantee, Unimbɔti lēē-tì ki dàkā Nawum un sá ueelikoosjee[1].

²Ti-Dindaan sá Unimbɔti un cáá ipoompoonee ní ki tɔ̀ ipɔntoon. U dátí bin jáà nì uee tafal. U-ŋuul pɔ̄ɔ̄ an kaa cáá bí lì. U tɔ̀ u-nannanliibi ipɔntoon, ní kaa súntí bi-kpitii in bi ŋáańee pu.

³Ti-Dindaan kaa fòol̄ diŋuul malaa ní ki cáá mpɔŋkpaan, ama waa yàntī dibɔkpil daan fám kaa dáaĺ u-tafal. Kunaakpaabuŋŋu nì kubuŋkpaaŋŋu poon ní u còom̄. Atagban di sá u yaa tà, kukpɔŋkpɔŋu kun yíkée.

⁴U kpàtī tiŋku pu ní ú kpā, ní ki yàntī ibun kɔkɔ nyim fóotí. Baasan pɔɔku nì Kaarmeel jool mooti fáaḿ, ní Leebanɔn pumpukum yɔ́ĺ.

⁵U yaa dòońee, ajoon cìŋkī ní, ní ŋgbantamu kpìkitī. U yaa páaǹnée kitiŋ cìŋkī, ní binib bin kɔkɔ bí ki-puee jìkì.

⁶U yaa fōō diŋuulee, ŋma di ŋūǹ kí ŋmátí? U yaa fōō mbumee, ŋma di ŋūǹ kí yūĺ? U-ŋuul fòol̄ bìlbil kii ŋŋmee ní, ataŋkpee gba wìil̄ u-nimbiin ní.

⁷Ti-Dindaan ŋān̄! U sá kibalilaŋ ní dinimbinaamandi yuntiŋu poon. U wúǹ bin di sáń ki kóò-uee pu,

⁸báà digìńdi yaa dɔ́miń ki bīiǹ bi-pu kii nnyiŋgbeenee. Ama u làá nàan̄ bin bí ki jáà nì uee, ní kí jà u-nannanliibi kí kɔ́ǹ dibɔmbɔndin.

⁹Ba ní ni bíi bɔ́ntí ti-Dindaan pu? Úǹ di nàantí u-nannanliibi, ní baa ti làá wɔ́b́-ni nliliitiim.

¹⁰Di sá yii bi bí kii abɔjanaakun ŋin sɔ̀kɔ̄ee ní, bíǹ bin nyù idafi ki gbéèyee. Ŋŋmi làá wà-bi múb kii timɔkulindee ní.

¹¹Unil un bíi bɔ́ntí kí já nì ti-Dindaanee, unil un di cáá ilandɔkɔkpitee nyánní sii Niiniifi tiŋkin ní.

¹²Ti-Dindaan nín sòon̄ puee sèé: «Báà ni-nannanliibi yaa wīikí ki pɔ̄ɔ̄, m làá nàan̄-bi ní bí kúntí múb. M sīntiǹ-ni taapu, maa ti làá ŋá míǹ.

¹³Kɔŋkɔnnee, m làá nyìkitī diwaŋgul din bi dūu nyīkiǹ ni-puee, ní kí tìl̄ ni-kusakai.»

¹⁴Ti-Dindaan nín sòon̄ tin nimbi Niiniifi yab puee sèé: «Naa ti làá màal̀ mbiyaamu mun làá dāá fōō ni-yindee. M làá kúntí awaakpitikaa nì amɔɔkaa ŋin bí ni-waadiikunee. M bíi bɔ́ntí ni-kaakul, di sá yii naa bí tiban.»