Read Ntcham Nahoum 2 Bible Online

Nahoum 2 - Ntcham bible

Nahoum 2

¹Juuda yab[2], ntuun ŋun cāabìń tibɔmɔntiilee di dòoń ajoon puee, ŋu sòoǹ ŋgbansɔŋfi bɔti ní! Jīmaan ni-jiŋaalib, cáaḿmaan ni-pooŋyi saraabi kí tīī Unimbɔti. Kun puee, ukpitee kaa ti làá dāan̄ kí fōō ni-tiŋki, bi pée nāaǹ-u ní múb.

²Niiniifi, bi dòoń kí jáǹ-si dee. Bijanjaliibi, jɔ̄m̀maan sintil difɔkɔŋi pu kí nīn cí, nín̄ cɔ́ŋkímaan adan pu ki kpèé, yòom̄maan ni-gbajab kí gbìn̄, kámaan kunyannyaau kí pɔ́ɔǹ ni-ba.

³Di sá yii ti-Dindaan fātìi gíiǹ Jaakɔb nyooti ki tīī-u. Úǹ u-ba di sá Isirayeel nyooti. Binannanliibi nìn fúkúl̀-bi, ki bíil̀ bi-fiinyi paŋŋi.

⁴Bi-nannanliibi janjaliibi gbampɔɔŋi máǹ, ní bi pēē tiwamman cínciŋ. Bi yaa gbāaǹ dikɔ̀ndi puee, bi-tɔrɔkub kúti ŋmóò ní làka laka kii ŋŋmee, ní bi fīintí bi-kpammu.

⁵Janjatɔrɔkub dū bi-ba ki bíl̀ adan pu, bi kpátìi gbí kitiŋ jaŋŋi kɔkɔ pu a lì kii iŋminaapoolee. Bi yáb̀ kii utaa nín ŋmóò puee ní.

⁶Niiniifi bɔtiu yíiń u-janjaliibi kpilib, ama ní bi còom̄ ki cá ki gùgufī. Binannanliibi sáń ki cá kitiŋ gundi caŋin. Bi bál̀ digbampɔɔl din boon bi làá báĺee.

⁷Bi gbáń ki pīitì mpunyɔmu mun bíitiǹ ibunee mpɔn, bi jáń ki fōō dibeecindi.

⁸Binannanliibi yōoǹ diwaal ki cáa cūnnì kuyuŋu. Binimpoobi bin nìn jáaḿ-dèe bíi sūǹ ki yáliŋkí kii abeenanjilee, ní ki fátí bi-biŋŋi nì kunimbaau.

⁹Niiniifi yab sá kii nnyimbilkaam min nnyim nyáń ki dóòyee ní. Bi nìn kūuntí ki yíì-bi yii: «Sīĺmaan! Sīĺmaan,» ama báà ubɔ kaa fātìi kpēē u-boon gba.

¹⁰Fūkul̀maan kitiŋee nimbiliŋ nì ki-sindaariyau! Ki-gaajawanti kaa cáá dikúntil, tiwammɔntiil kɔkɔ nì ti-bulifi gbí ki-ni.

¹¹Bi fúkúl̀-kì ki gbákal̀-kì ki nāaǹ-kì. Un cáá dipɔbilee gíti kpá, bi-taaŋi yɔ̄tì, tiwun kɔkɔ gbáà kpàkpakpa ní inimbiin cúu kpántì.

¹²Kitiŋ kin poon gbikintib nìn kóòyee bí la? Niin ní agbikintipɔmbil nìn kāntí ki jīǹ. Ugbikintija yaa nìn búntì dijinnyaabilee, ubɔ kaa nìn gbèetī u-biyaamu.

¹³Ugbikintija nìn cútí tinan ní ki tìì u-biyaamu. U nìn kù ipeel ki tìì ugbikintinaati, u nìn gbēentí laakin u kóòyee ipeel in u cúú ki tɔ̄ntèe.

¹⁴Ti-Dindaan Mpɔŋkɔdaan lī yii: «Sii Niiniifi, m làá já nì si, m làá yàntī a-janjatɔrɔkub ń wà kí kpántí ŋfantam. Kujaaun ní bi làá tin kpɔ̀ń a-gbikintipɔmbiliŋ. M làá kúntí a nín yìin̄ ki fúkúl̀ ntimu puee, ní ubɔ kaa làá ti gbìl̄ a-tuuŋyi nyɔmmu pu.»