Read Ntcham Habaquq 1 Bible Online

Habaquq 1 - Ntcham bible

Habaquq 1

¹Unimbɔti bɔti tin ní u lēē ki dàkā u-bɔnaatiliu Abakuukee.

²M-Dindaan, kí cáá sāā ŋyunti ŋulɔŋu ní m làá nīn yíì-si á jòoń-mi ní á nín pīlifì-mi ní? M bíi kūuntí yii tipɔmbɔti gbóotì, ama ní aa bíi fìil̄-ti.

³Ba pu ní a yàntī m kāntí atuŋkpiti ní? Ba pu ní unil wɔ́b̀ u-juti ní a kpèé ki ŋmí ní? Diwɔ́bil nì tipɔmbɔti di māntìi tú-mi. Kunikpɔŋkpɔkɔu nì kujaau di kíǹ ki bí an kɔkɔ.

⁴Mara wɔ̀b̄ kaa ti cáá mpɔn, ní an kaa ti sá un bɔti ŋān̄ee ní bi pɔ̀. Unikpiti nyīī deedeedaan ki múĺ, an pu ní ibɔsoon poonee, ibaamɔn kaa ti bí.

⁵Ti-Dindaan bí yii: «Kpèèmaan tin bíi jītí atimbun ŋin kíǹee kansikin tiŋan. Yàntīmaan án bàkatīǹ-ni sèeee! Di sá yii m làá ŋá maamaaci tundi diba ni-yuntii nee poon. Ubɔ di yaa bàà máafì-ni tibɔti gbanti, naa bàà làá fōō-tì kí kíí[1].

⁶Kpèèmaan, m làá yàntī Babiloon yab ń dāan̄, dinibul gbanti kaa sūǹ isaa ní ki néeń tipɔmbɔti. Bi yìiǹ duulinya kɔkɔn ki fòol̄ binib timmu ki cáa gà bi-biŋŋi.

⁷Bi sá tinibilindi ní ki cáá tifaandi. Bíǹ bi-ba di sīintí bi-marab nì bi-pɔŋŋu.

⁸Bi-taamui yáb̀ ki jítiǹ iguloobu, ki cáá ntoom ki jítiǹ digbiŋgbil din cá kukpɔŋu kujoouee. Bi-tanjakaliibi nyánní ndan ki dòoń bi-taamui yùkufìń. Bi ŋàaǹ kii ukaalun nín tòó pu kí cúú tiba kí jēe ní.

⁹Bi-kɔkɔ dòoń kí fūkul̀, ní bi-nimbikpeeŋu pée cɔ́ bi-nyɔkɔpu. Bi kóoǹ iyumbu ki kpáfì i wīikí kii dibulee.

¹⁰Dinibul gbanti bèel̄ bibɔtiibi ní. Abɔtibil sá kii tigbiŋgbiiliwanee ní bi-cee. Baa fàŋkí ntimu mun bi máń digundi ki túee. Bi fà ntam ní kí kpúkuń digundi gbanti caŋin, ní kí tāā kí dàb̄ kí já kí fōō-mu.

¹¹Bi jītí kii kubuŋkpaaŋŋuee ní ki nìkì bi-saŋŋu. Kun pée páb́-bee di sá bi-pɔŋŋu, ŋúǹ di sá bi-nimbɔtiu.»

¹²Doooo ŋkilkaaminee, sii di sá ti-Dindaan, sii di sá m-Nimbɔtiu, ki sá circirdaan ní kaa kúù. M-Dindaan, sii di lēē dinibul nee dí sòoǹ ti-bɔti. M-taŋkpanaakooku, a tīī-dì mpɔn dí dáaĺ ti-tafal.

¹³A-nimbiliŋ bí circir tikpil, ŋaa ŋūǹ kí kpèè ikpiti. Aa tí ŋūǹ kí kíí kí nīn kpèé ubɔ ń nīn bíi wɔ́b̀ u-juti. Kin ba pu ní a kíí ki kpèé binikpitib bin nyēē bi-jutiibi boon nee kaa lì tiba ní? Ba pu ní a ŋmí ki kpèé unikpiti ń bīil̀ un sá deedeedaan ki jítiǹ-uee ní?

¹⁴Di sá yii a yāntì binib bí kii tiŋkun jɔmiiyee, a lì kii tin fù ti-pool pu kaa cáá ukpootilee.

¹⁵Babiloon yab cútí binib kii ujɔm un bi tɔ́ njɔmpiin ki cúúyee ní. Kulaaŋŋu ní bi dù kí cúú-bi, ní kí dū bi-naanyaaŋŋu kí kóoǹ-bi. Niinee ní an kíǹ ki mɔ̄ǹ-bi ní bi fàal̀.

¹⁶Bi ŋáań saraabi ki tìì bi-laanti, ní ki tùutī talaalub ki tìì bi-naanyaaŋyi. Di sá yii bi-laanti nì bi-naanyaaŋyi pu ní bi-jinti mèeǹ ki mɔ̄.

¹⁷Mimmee bi làá nīn gbíntìi fúutí bi-tàataajimmu kujitooun ki kù atimbun ŋin kíǹee nib nì inimbinaakulimaaa?