Read Ntcham Habaquq 2 Bible Online

Habaquq 2 - Ntcham bible

Habaquq 2

¹M làá yūĺ sintil, m làá jɔ̄m̀ kí tɔ́kɔń digunlɔkɔl pu kí kpèè tin Unimbɔti làá tùkù-mee, nì m nín bíi yáliŋkée, u nín làá kíí-mi puee.

²Niinee ní ti-Dindaan kíí-mi yii: «Ŋmà tin m bíi lèekī ki dàkà-si nee. Ŋmà kí nákań tipilindi pu, binib ń ŋmā kí kàaǹ sɔkɔmii.

³Dileedakal nee cí di-yuntiŋu ní kí ŋá kii an nín lēē ki dàkā puee. Di-yuntiŋu tóobiń, dàa làá gbíntí. Báà an yaa yúntàaa, cīití-dì. Tin m lēē ki dàkā-si nee, án làá pée ŋá míǹ ní. An pée kpá kí gbíntí[2].

⁴Kpèè, unil un kaa bí deedeeyee yòontí u-ba yilpu, ama deedeedaan kāntí dimaŋfal u-deedeeu pu ní.

⁵Tiŋman ndaam kíiĺ unileeee! Ulambidaan kaa cáá diŋuŋfil. U wàatī u-nyɔkɔ bàaa kii ditaŋkpiilee, waa díkì kii ŋkúmee. U jáà ki fòol̄ atimbun kɔkɔ, ní ki cáá anibul kɔkɔ pu mpɔn.

⁶Ama, binib gbanti kɔkɔ làá dāá nīn gà alaŋkpan ki bèel̄-u ní ki lāā-u.» Bi dāa lì yii: «Mbusu dɔ̄ ki cí-ni! Ni bí ki fìkì binib wanti kí cáá sāā ŋyunti ŋulɔŋu? Ni mɔ̀tīi kútí ni-pɔɔŋŋi nyiŋfiŋu pu dee!

⁷Bin pīnnì-ni animbilee làá dāá cíliń ni-pu ní dicilpu dicilpu. Bi làá dāá yīkì kí cìŋkì cìŋkì-ni. Bi làá dāá fūkul̀-ni kí téeǹ.

⁸Ni fúkúl̀ atimbun tikpil. Anibul ŋin kíǹee mun làá dāá fūkul̀-ni míǹ mbaantiim. Di sá yii ni kūū binib, ki ŋá Juuda tiŋki nì ki-timmu nì bin kóò mu-nee tipɔmbɔti!

⁹«Mbusu dɔ̄ ki cí-ni! Ni nyàab̀ dulim gaajati kí dūú kpāafì kí síiń ni-dicaŋŋi yab, ní ki māā ni-diiŋŋi ki tɔ̄kɔntí yilpu, nnaabu yaa páaǹnée, án taa gbēē-ni.

¹⁰Tin ni bɔ́ntì kí ŋée làá cáań icoo kí tɔ̄ ni-dicaŋŋi yab pu ní. Ni nín nāaǹ anibul tikpil puee, nimbi ni-ba maŋfal ní ni nāaǹ.

¹¹Ataŋkpee ŋin bi dūu máń agunee gba làá nīn kūuntí ki kɔ́kɔĺ-ni, ní idɔ in bi dūu tɔ́kɔǹ kudiiyee ń kíí-ŋi.

¹²«Mbusu dɔ̄ ki cí-ni! Ni māā ni-timmu ki tɔ̄kɔntí nnikpaakoon nì tin kaa bí deedeeyee pu ní.

¹³An pu ní anibul gìńdi kúntí ŋŋmin, ní atimbun bí ki bìǹ fám[3]. Tíǹ gbanti kɔkɔ kaa nyánní ti-Dindaan Mpɔŋkɔdaan cee níii?

¹⁴Tiŋman, báà ŋma làá béé ti-Dindaan nyooti, tì làá dāá gbí kitiŋ pu kii nnyim nín gbí tiŋku poon puee ní[4].

¹⁵«Mbusu dɔ̄ ki cí-ni! Ni páb̀ ni-jutiibi bí nyɔ̀ ndaam, ki tìì-bi ndaam min poon ni ŋmālim̀ nnyɔkɔee bí nyɔ̀ kí gbí kí fá bi-ba ní wāl̀ bi-cancaŋgbeel.

¹⁶Ama icoo làá cúú-ni gbòooo, kaa sá tinyool! Ni mun, nyɔ̀maan kí gbí bí ká ni-cancaŋgbeeŋi. Ti-Dindaan làá páb́-ni ní nyɔ̀ u-ŋuul din kā u-yukubilinee. Ni-jilmau làá kpántí icoo.

¹⁷Di sá yii tipɔmbɔti tin ni ŋá Leebanɔn tiŋkinee làá fàtīí gítiń ni-pu. Ni pɔ̄fì tiwaŋkuti. Too tiwaŋkuti gbanti di làá kɔ́ǹ-ni dinyoondin. Di sá yii ni kūū binib, ki ŋá Juuda tiŋki nì ki-timmu nì bin kóò mu-nee tipɔmbɔti!

¹⁸Ba ní bi làá dū diwaal kí ŋá ní ukpiŋkpiiti kpítí-dì ní? An sá tikúti ní bi dūntì ki dūu mɔ́ɔ́ ní an dàkà tinyimɔmbɔti. Ukpiŋkpiiti di kpítì-dì ní dàa ŋūǹ kí sòoǹ. Kin ba pu ní u gíti máká di-pu nan dee?

¹⁹«Mbusu dɔ̄ ki cí-ni! Ni tùkù didɔgindi yii: <Yīkì!> ki tùkù ditaŋkpal din kaa ŋūǹ kí sòoǹee yii: <Fìntī.> Ditaŋkpal kaa ŋūǹ kí dàkà-si tiba. Báà bi yaa dūntì sindaariya nì animbil ki nákaǹ-dàaa, dàa cáá kufoou!

²⁰Ama ti-Dindaan úǹ kóò u-circir diikun ní. Kitiŋ kɔkɔ pu nib ń ŋmīĺ fɔ́ŋfɔŋ u-nimbiin!»