Read Ntcham Habaquq 3 Bible Online

Habaquq 3 - Ntcham bible

Habaquq 3

¹Ŋwimmeem min Unimbɔti bɔnaatiliu Abakuuki nìn mēē nì itiminsi poonee sɔ̀.

²Ti-Dindaan, m gbìl̄ atuŋkpaan ŋin a ŋée pu. An cúú-mi tifaandi gba. Ti-Dindaan, fàtīí ŋá a-tuuŋŋi gbanti ti-wiiŋyi nee poon, yàntī báà ŋma ń béé-ŋi ti-yuntii nee poon. Báà a yaa fōō ti-pu diŋuulaaa, téetí a-poommɔŋŋu pu.

³Unimbɔti nyánní Teeman tiŋkin ki dòoń, circir Nimbɔtiu páaǹní Paaran jooŋŋi pu. U nín sá ukpaan puee bīī kutagbɔŋu pu, ní u-nyɔŋkii gbí kitiŋ kɔkɔ pu.

⁴U wāĺ bɔ́iii kii ŋwalifee, ní itaaŋmɔŋmɔ nyēeń u-ŋaan ki jìl̀ pàlpal. Niin ní u-pɔŋŋu mun kā.

⁵Bìlbil kúm līī u-nyɔkɔpu ní nnaanyeem tēentí u-tabɔbiliŋ.

⁶U yaa sāā ki yúl̀ee, kitiŋ cìŋkī ní. U yaa fātìi kpēē atimbun nibee, bi-wunti gbáà ní kpàkpakpa. Jaanjaan jooŋŋi fáá iwèeń, ní cannaaku gbantammu lábitì ki cìb̄, ŋíǹ mun di nìn sá njaminee u-saŋŋu.

⁷M ká Kusan yab tantib kaa ti bí tiban. Madiyan yab kɔŋkooŋyi cīŋkì nì tifaandi.

⁸Mimmee ti-Dindaan, ibun pu ní a fōō diŋuulaaa? Ibun pu ní a fōō mbum naaa? Tiŋku pu ní a-ŋuul gà lìblib yéèee? A jɔ́m̀ ki kāl̀ atagban pu kii dijajil tɔrɔkubee.

⁹A bɔ́ntì a-tɔbu, ní dinyɔɔbundi din a sòon̄ee sá kii ipiinee. A dū ibun ki búkutì kitiŋ.

¹⁰Ajoon wál̀-si ní ki fāŋkì ki fōō dijinjikil. Utaakpaan nìn̄ nì mpɔn, ní tiŋku yāntì bi gbìl̄ u-bintindi pu. U tòó u-nyiŋgbanti yilpu.

¹¹Ŋwìiń nì uŋmal nín wál̀ a-piiŋyi in a tɔ́ee nín ŋàaǹ ki wāĺ puee, nì a-kpaŋki nín ŋmóò pu làka lakee, ní bi sāā ki yúl̀ laakin bi bée.

¹²A-ŋuul poonee, a yìiǹ kitiŋ kɔkɔ pu, a-bum poonee, a tà ki mátí atimbun.

¹³A nyáń kí fīī a-nibul kí fīī ubɔti un a lēēyee. A líì un sá uyidaan binikpitib dicaŋkunee, ki nāaǹ u-yab kɔkɔ múb.

¹⁴A dū úǹ u-ba piiŋyi ní ki sāatìi cífì u-janjaliibi yiliŋ. Bi bàà sáń ki dòoń kii kubuŋkpaaŋŋuee kí dāá yàaǹ-ti. Bi nìn kūuntí nì dipɔɔpindi, a lì kii bi kpáàa cúú uwɔfi ki bíi tɔ̀ntī dibalinee.

¹⁵A cátì nsan tiŋkun laakin tinyiŋgban pɔ̄ɔ̄yee a-taamui cōom̀ ki jítì.

¹⁶M gbìl̄ kuwoou nee kɔkɔ pu ní m-poon kaam cɔ́tì. M-nyunculiŋ bíi jìkì ní m-kpabiŋ bíi bùkù. M-taaŋi yɔ̄tì maa ti ŋūǹ kí yūĺ. M ŋmíl̀ fɔ́ŋfɔŋ ki cí dinimbinaamandi wiiŋŋu kí cùú já nì anibul ŋin bíi jáà nì tee.

¹⁷Fiigi subu kaa ti púkuḿ, fiinyi subu kaa ti lòoǹ, ɔliifi subu kaa ti lòoǹ, ní tisati mun kaa ti lòoǹ tikpaajin. Ipii kaa ti bí kupikpuŋkpuŋun, ní inaa mun kaa ti bí kunaabakaun.

¹⁸Ama mamee, m làá nīn fàal̀ ti-Dindaan pu, m làá nīn bí mmɔnni Unimbɔti un di fīī-mee pu.

¹⁹Ti-Dindaan Unimbɔti di sá m-pɔŋŋu. U yàntī m tóotí kii upeemanee, ní ki yàntī m tɔ́kɔ́ yilpu ki còom̄. Bilaŋgaaliibi kpiliu di ŋmàn̄ nlan nee. Bi bɔ̀ɔ́ kubeeu ní ki gà-ŋu.