Read Ntcham Sophonie 1 Bible Online

Sophonie 1 - Ntcham bible

Sophonie 1

¹Tibɔti tin ti-Dindaan nìn sòon̄ nì Seefaniya ŋyunti ŋun Amɔn jipɔɔn Joosiyaasi nìn sá ubɔti Juuda tiŋkinee sɔ̀. Seefaniya gbanti nìn sá Kuusi naakookun, Geedaliya jipɔɔn, ki sá Amariya naantiiu, ní ki sá Eeseekiyaasi naantitɔntɔkɔl.

²Ti-Dindaan bí yii: «M làá kúntí tin kɔkɔ bí kitiŋ puee.

³M làá kúntí binib nì tiwaŋkuti, nì inoon in bí kutaa puee nì ijɔm in bí dimɔɔlinee. M làá kúntí bitɔŋfitiibi nì tin yàntī bi tūǹ atuŋkpitee. M làá kúntí binib kɔkɔ kitiŋ pu. Ti-Dindaan di lī míǹ.

⁴M làá já nì Jeerusaleem nì Juuda yab kɔkɔ. M làá kúntí awaatuun ŋin kíǹee mpaan nee pu, ní kí kúntí awaa tɔntɔnliibi nì ŋi-tandambi.

⁵M làá kúntí bin tɔ̄kɔntí adibɔ̀bikaa yilpu ki jáaḿ iŋmalbijaayee. M làá kúntí bin gbàantí man bi-Dindaan nimbiin, ní ki gíti pùtī diwaal Mooleeki yindee[1].

⁶Man ni-Dindaan, m làá kúntí bin fàtī bi-boon ki tìì-mi kaa nyàab̀-mi ní kaa bàlifī-mi isaŋkee.»

⁷Ní ŋmīĺmaan díkí diki ti-Dindaan Unimbɔti nimbiin, di sá yii u-ŋuul wiiŋŋu tóobiń. Ti-Dindaan bɔ́ntì saraa, kí ŋá bin u yíińee circir.

⁸Ti-Dindaan bí yii: «M-saraau wiiŋŋu gbanti dalee, m làá dāá já nì bikàliŋkpilib nì abɔtibil, nì bin di pèentí tiwan kii binicambee.

⁹Yaadal wiiŋŋuee m làá dāá dáaĺ bin di yùkufī ki lákatí kunimbɔtidii punyɔkɔkee tafal[2]. M làá dāá dáaĺ bin kɔkɔ fìkì binib ki mùul̄-bi ki fòol̄ tiwan ki gbēentí bi-waadiikuee.

¹⁰Ti-Dindaan bí yii, ŋwiin gbantee, Jeerusaleem tiŋkinee, bi dāa gbìl̀ ibiil Ijɔm punyɔkɔ watil, ní ikuŋkuunti tùm̀ kitimpɔŋ watil, ní kuwookpaaŋŋu gà ŋgbantamu pu.

¹¹Makteesi yab, nín̄ kūuntímaan! Di sá yii binyampoobi kɔkɔ làá kpú, bin ŋmàntī animbilee làá kúntí.

¹²Ŋyunti gbantee, m làá dāá tūū fitila ní kí kɔ́ Jeerusaleem tiŋkin kí kpùkul̀ an kɔkɔ pu. M làá dāá dáaĺ binib bin kā kaa ŋáań tibee tafal kii tidakpati nín dɔ̀ ndaam taapu puee. Bi dàkafī yii: <Ti-Dindaan kaa ŋūǹ kí ŋá tiŋanaaa, kaa tí ŋūǹ kí ŋá tikpitil mun!>

¹³Too, bi làá dāá fūkul̀ bi-gaajawanti ní kí kpēelikì bi-diiŋŋi. Bi māā adiin, ama baa làá kɔ́-ŋi. Bi kù fiinyi sufii kpaaŋŋi, ama baa làá ká i-daam kí nyɔ̀.»

¹⁴Ti-Dindaan wiŋkpaaŋŋu[3] tóobiń, ŋu tóobiń, ŋu dòoń malaa malaa. Ŋwiin gbantee, binib làá dāá gbá ibiil nì dinimbinaamandi. Bibaatandambi gba làá dāá gbá ibiil ki nyàab̀ dijòońdi.

¹⁵An dāa sá diŋuul wiiŋŋu ní, dinimbinaamandi nì kufaaŋŋu wiiŋŋu, asaluu nì ŋkúm wiiŋŋu, kunyeeu nì dibɔmbɔndi wiiŋŋu, atagbambɔn nì dipɔ̀ńdi wiiŋŋu ní an dāa sá.

¹⁶Ŋwiin gbantee, bi làá dāá gbìl̄ bijanjaliibi búǹ dikantándi, ní kí fáá ijanjakuŋkuunti kí já nì ntimu mun bi máń digundi ki túee nì mu-sintil difɔkɔŋi.

¹⁷Ti-Dindaan bí yii: «M làá dāá kɔ́ǹ binib dinimbinaamandin, ní bí nīn còom̄ kii bijɔfubee, kun puee bi yīntiǹ man bi-Dindaan. Bi-fatikuu làá dāá kpáatí kí fá kitiŋ kii dibulee, ní bí cáá bi-wunti kí fá kii titampummoolee.»

¹⁸Bi-nimbiliŋ nì bi-sindaariyab kaa dāa ŋūǹ kí fīī-bi. Ti-Dindaan ŋuul dalee, u-ŋuukpaandi ŋmiŋu dalee, kitiŋ kɔkɔ làá dāá wà kí céetí. Tiŋman, u làá dāá kpɔ̀ kí céetí binib kɔkɔ kitiŋ pu.