Read Ntcham Sophonie 2 Bible Online

Sophonie 2 - Ntcham bible

Sophonie 2

¹Nimbi atimbun ŋin kaa cáá icooyee, kóom̀maan tɔb kí kpāfì kí nīn nyìkī tɔb pu,

²kí wàatī ní ní nín kpántí kii timool tin kubuŋu yòontí ki féeń ŋwimbaantee. Ti-Dindaan bum làá dāá jēetí ni-pu. Ti-Dindaan ŋuukpaandi wiiŋŋu làá dāá jēetí ni-pu.

³Nimbi bin kɔkɔ bí kitiŋ nee pu ki sīntiǹ ni-ba taapu, ki tɔ́ ti-Dindaan marabee, nyàab̀maan ti-Dindaan. Nín̄ ŋáaḿmaan tin bí deedeeyee, kí sìntīmaan ni-ba taapu Unimbɔti nimbiin. An yaa yíì u-ŋuul wiiŋŋu dalee, u làá dāá fīī-ni.

⁴Binib làá dāá yīkì kí fá Gaasaa tiŋki, ní bí nàan̄ Asikeelɔn tiŋki. Bi làá dāá jà Asidoodi yab kuwiŋkaŋu pu, ní kí kpìtī Eekrɔn tiŋki.

⁵Mbusu dɔ̄ ki cí nimbi Kafitoor yab bin kóò ditiŋkugbandee. Kaana, Fiiliistii yab tiŋki, ti-Dindaan bɔsooŋyi dàn̄ a-pu. M làá kúntí-si, di sá yii binib kaa ti kóò a-pu.

⁶Tiŋku kpaanceetii dāa kpántí kunaakpaapɔɔu, laakin bipikpaaliibi kpàá tiwaŋkutee, nì laakin bi làá mā ipii naabakatee.

⁷Juuda yab bin kíǹ ki bí dimaŋfalinee làá dāá jī ditinjandi gbanti. Niin ní bi làá dāá nīn kpàá bi-waŋkuti, ní kujoouee, bí cùú kɔ́ Asikeelɔn yab timmun kí dòon̄. Di sá yii ti-Dindaan bi-Nimbɔtiu làá dāá sɔ̄ bi-saai, ní kí cúú tin poon bi bée kí kpántí.

⁸«M gbìl̄ Moowaab yab siibiliŋ nì Amɔn yab beelii pu. Bi sīī m-nibul ní ki fōō di-timmu ki kútì bi-yɔmu pu.

⁹An pu ní man ni-Dindaan Mpɔŋkɔdaan, Isirayeel Nimbɔtiu pūtì ki lī yii: <Moowaab tiŋki làá dāá kpántí kii Soodoom tiŋkee, ní Amɔn yab tiŋki mun ń kpántí kii Goomoora tiŋkee[4]. Bi-tiŋki làá dāá kpántí ikuŋkum nì diyataŋkpal kí nīn cá jaanjaan. M-nibul yab bin làá dāá kíńee làá dāá fūkul̀-kì, m-timbundi yab bin kíǹee làá dāá fōō-kì.>»

¹⁰Bi-bayoondi puee, tipaal tin bi làá dāá fōōyee sèé. Di sá yii bi sīī ti-Dindaan Mpɔŋkɔdaan nibul ní ki fōō di-timmu ki kútì bi-yɔmu pu.

¹¹Ti-Dindaan kaa làá dāá tàan̄-bi, u làá dāá kúntí awaa kɔkɔ kitiŋ pu. Atimbun ŋin bíń ndandatee làá dāá gbàan̄ u-nimbiin laakin ŋi bée.

¹²«Nimbi Eetiiyoopii yab mun, m làá dāá yàntī ní kpúń kujaaun ní.»

¹³Ti-Dindaan làá dāá já nì ŋgan pú tiŋki ní kí dāá nàan̄ Asuur tiŋki. Niiniifi tiŋki làá dāá kpántí ataŋkpakpuku[5], kitiŋkuliŋŋi kii kuteeuee.

¹⁴Kitiŋ kansikin nì kansikin ní tiwaŋkuti dāa dɔ̀. Tiwaŋkuti kɔkɔ nì ti-buluku, atulinjoo nì nlabinsamu dāa dɔ̀ jaantalkub yilpu ní. Bi dāa gbìl̀ adiin tɔkɔlab pu nnɔmbiyaamu siim pu. A tin pée lì yii a kóò kitiŋinee, tin a làá dāá kée di sá adigbun nì idɔ.

¹⁵Kpèèmaan kitiŋ kin nìn bí dipɔɔsɔŋkilin ki máká ki-ba pu ki lì yii: «Man di bí, m-boonee ubɔ gíti kpée.» Too, Niiniifi kpántì ataŋkpakpuku ŋma ní, tiwaŋkuti kɔŋkooŋŋu. Bin kɔkɔ jītí ki-caŋinee búǹ ifoon ki dɔ̀tī-kì dinyuncul.