Read Ntcham Aggée 1 Bible Online

Aggée 1 - Ntcham bible

Aggée 1

¹Daariyusi nín kāl̀ dibeel abin ali iŋmal iluu wimpeepeekaaŋu dalee ní ti-Dindaan sòon̄ nì u-bɔnaatiliu Agaayi. U nìn bí ú tùkù Seeyaltiyeel jipɔɔn Sooroobabeel un sá Juuda yab gɔminauee, nì Yoosadaaki jipɔɔn Joosuwa un sá usaraaŋakpilee yii:

²Man ni-Dindaan Mpɔŋkɔdaan nín sòon̄ puee sèé: «Binib nee lì yii: <Ŋyunti ŋun ti máaǹ kí fàtīí mā kunimbɔtidiiyee kaa láá bāań.>»

³Ŋyunti gbanti ní ti-Dindaan dī u-bɔnaatiliu Agaayi pu ki sòon̄ nì bi yii:

⁴«Mimmee ŋyunti ŋmāntì nimbi ń nīn kóò adinyaan poon ní man diiku ń lítí kí kpántí kudigbuŋuɔɔɔ?

⁵Kɔŋkɔnnee, man ni-Dindaan Mpɔŋkɔdaan nín sòon̄ puee sɔ̀. Dàkafìmaan tin poon ni bí nee pu tiŋan!

⁶Ni búĺ tikpil ama ní ki cáń fiii, ni jīǹ ama ní kaa díkì, ni nyù ndaam ama ní an kaa nyàatī-ni, ni pèentí abɔkuti ama ní tiwool gbíntìi cáá-ni, ní utɔntɔnli ń fōō tipaal ní án kɔ́ kuloou kun cíl̀ee poon.

⁷An puee man ni-Dindaan Mpɔŋkɔdaan nín sòon̄ puee sɔ̀. Dàkafìmaan tin poon ni bí nee pu tiŋan!

⁸Jɔ̄m̀maan dijool pu kí cáań idɔ kí fàtīí mā m-Diiku. Án làá mɔ̄ɔkiǹ-mi ní ḿ nyāntí m-nyooti kí dàkà, man ni-Dindaan di lī míǹ.

⁹Ni bàà cɔ́tí kí cā tikpil ní ki dūu cáń fiii. M tɔ́ tin ni yōoǹ ki cáań mmɔŋkee pu kubuŋu. Ba pu ní m ŋá míǹ? Man ni-Dindaan Mpɔŋkɔdaan di bālifì míǹ. Di sá yii m-diiku lítì ki kpántì kudigbuŋu, ama ní báà ŋma nimbiliŋ máǹ u-diiku pu.

¹⁰An pu ní utaa kaa jōō, ní kitiŋ mun kaa lòon̄ báà tiba.

¹¹An pu ní m cáań ŋweel ki tɔ́ kitiŋ nee nì ajoon nì fiinyi nì ɔliifi sufii sati pu, nì tin kɔkɔ kitiŋ pée lòoǹee pu. M cáań ki tɔ́ binib nì ipeel pu, nì tin kɔkɔ ni kùn̄ee pu.»

¹²Ní Seeyaltiyeel jipɔɔn Sooroobabeel nì Yoosadaaki jipɔɔn Joosuwa un sá usaraaŋakpilee, nì samaa un kɔkɔ kíǹee pílifì tibɔti tin bi-Dindaan bi-Nimbɔtiu dī u-bɔnaatiliu Agaayi pu ki sòon̄ nì bee. Min Agaayi túń ditundi din ti-Dindaan dūu ŋúbíǹ-uee dee, ní tifaandi kɔ́ samaa kɔkɔ ti-Dindaan nimbiin.

¹³Ní Agaayi, ti-Dindaan tuuŋŋu dū tibɔti tin u fōōyee ki nāatì samaa yii: «M bí ni-cee, man ni-Dindaan di lī míǹ.»

¹⁴Ní ti-Dindaan fīntì Seeyaltiyeel jipɔɔn Sooroobabeel, Juuda yab gɔminau landɔkɔŋu, nì Yoosadaaki jipɔɔn Joosuwa, usaraaŋakpil landɔkɔŋu nì samaa un kɔkɔ kíǹee landɔkɔi. Bi nìn dɔ́miń ki fātìi kíĺ ki bíi māā ti-Dindaan Mpɔŋkɔdaan un sá bi-Nimbɔtiuee diiku.

¹⁵An nìn sá dibindi gbanti dibaantiil poon uŋmaluluuti, iwiin mmuŋku nì inaa dal ní.