Read Ntcham Aggée 2 Bible Online

Aggée 2 - Ntcham bible

Aggée 2

¹Daariyusi nín kāl̀ dibeel abin ali uŋmaluluúti iwiin mmuŋku nì ŋubɔ dal ní ti-Dindaan sòon̄ nì u-bɔnaatiliu Agaayi.

²U nìn bí ú tùkù Seeyaltiyeel jipɔɔn Sooroobabeel, Juuda yab gɔminau nì Yoosadaaki jipɔɔn Joosuwa usaraaŋakpil, nì samaa un kɔkɔ kíǹee yii:

³«Ubɔ bí ni-kansikin ki nìn ká kunimbɔtidii kukpikuuee nyaaŋkuɔɔɔ? Ni wāĺ kupɔŋu nee kúǹ mana? Naa ká yii kúǹ kaa bí tibanaaa?

⁴Kɔŋkɔnnee, Sooroobabeel, ká kunyannyaau! Man ni-Dindaan di lī míǹ. Yoosadaaki jipɔɔn Yoosuwa usaraaŋakpil, ká kunyannyaau. Nimbi kitiŋ nee kɔkɔ nib, kámaan kunyannyaau. Kíĺmaan ditundi, man bí ni-cee. Man ni-Dindaan Mpɔŋkɔdaan di lī míǹ.

⁵M nín nìn nyántìń-ni Eejipiti tiŋkinee, m nìn lēē kí ŋá míǹ kí tīī-ni. M-Fam làá nīn bí ni-kansikin, ní taa fàŋkì tiba.

⁶Tiŋman, man ni-Dindaan Mpɔŋkɔdaan nín lī puee sɔ̀. Án kaa làá ti yúntí m làá cìŋkì yilpu nì taapu nì tiŋku nì kitiŋ[1].

⁷M làá cìŋkì atimbun kɔkɔ ní ŋi-gaajati ń kpìntīí dāan̄ doo. M làá yàntī tinyool ń gbí kudii nee. Man ni-Dindaan Mpɔŋkɔdaan di lī míǹ.

⁸Di sá yii, man di yì sindaariya, man di tí yì animbil.

⁹Míǹ puee kunimbɔtidii kun ni fātìi máń nee nyooti làá nīn jítiǹ kukpikuu. Man ni-Dindaan di lī yii niinee, m làá tīī-ni ŋgbansɔŋfi. Man ni-Dindaan Mpɔŋkɔdaan di lī míǹ.»

¹⁰Daariyusi nín kāl̀ dibeel dibinliliitiil ŋmawawatiu iwiin mmuŋku nì inaa dalee ní ti-Dindaan sòon̄ nì u-bɔnaatiliu Agaayi.

¹¹U bí-u yii ú bàlifì bisaraaŋaliibi tibɔti nee taapu:

¹²«Tí lì yii ubɔ dū saraa nanti ki ŋá dibɔkutil lookun. Boonee, dibɔkutilee gbēē kpɔnɔ àá tikuŋfaal àá ndamam àá ŋkpam àá tijin tin kamaa an yaa pée sée. Mimmee tijin gbanti làá kpántí circir jintaaa?» Ní bisaraaŋaliibi kíí-u yii: «Aayee».

¹³Ní Agaayi gíti bālifì yii: «Ubɔ yaa gbēē dinikpil ki kɔ́ tijɔkɔndin ní ki gbēē tiwan gbanti kɔkɔee, tì làá kpántí tijɔkɔŋwanaaa?» Ní bisaraaŋaliibi kíí-u yii: «Iiin, tì làá kpántí tijɔkɔŋwan.»

¹⁴Ní Agaayi fātìi bí-bi yii: «Too, ti-Dindaan nín lī puee sèé: <Míǹ ní kitiŋ nee nib nì atuun ŋin bi tūǹee bí. Míǹ ní tin kɔkɔ bi cāabìń ki ŋáań-mi saraayee kɔ́ tijɔkɔndi>».

¹⁵Ti-Dindaan gíti bí yii: «Kɔŋkɔnnee, ní dàkafì kí yòon̄ díǹ kí nīn cée, tin làá jītée. Kí wàatī ní kíĺ kí dū ataŋkpee kí tɔ́kɔń tɔb pu kí mā man ni-Dindaan diikuee,

¹⁶ba di nìn jītí ni-pu ní? Ubɔ yaa nìn bíi gbáà ndibɔɔ ki dàkafī yii u làá ká asambil mmuŋkuee, saalaa ní u dāa kāntí. Ubɔ yaa nìn cūtì u-dalɔŋkun kí kpíĺ ndaam liitirib imuŋku ili nì saalaayee ní ú dūú ká liitirib mmuŋku.

¹⁷M kɔ́ǹ-ni agìń ni-tuuŋŋi kɔkɔ poon. M yāntì ni-kpaajinti tiba kūń, tiba bùkū ní ataanyiŋkumbil lítì ki bíil̀ tiba, ama naa fātìi gítìń m-cee. Man ni-Dindaan di lī míǹ.

¹⁸Kí yòon̄ díǹ kí nīn cée, ní dáań tin làá jītée kí yóoń. Díǹ wiiŋŋu ŋun ni bíl̀ man ni-Dindaan diiku nyeel nee sá uŋmawawati iwiin mmuŋku nì inaa ní. Ní cúú kí yóoń!

¹⁹Kéè tijimpin kaa kíǹ cakalaabinaa! Ki kpáaǹ isufi in bi yíì fiinyi nì fiigi nì greenaadi nì ɔliifee kaa lòon̄aa! Ama kí yòon̄ díǹ kí nīn cée, m làá bìin̄ ni-pu.»

²⁰Iwiin mmuŋku nì inaa dal gbanti mbaantee, ti-Dindaan gíti sòon̄ nì Agaayi nliliitiim.

²¹U nìn bí ú tùkù Sooroobabeel, Juuda yab gɔminau yii: «M làá cìŋkì kutagbɔŋu nì kitiŋ.

²²M làá lábití bibɔtiibi beejaliŋ kí cìb̄, ní kí kúntí atimbun beeŋi pɔŋyi. M làá lábití janjatɔrɔkub nì bin kā bi-puee kí cìb̄. Bi làá dāá kpɔ̀ itaamu ní bitanjakaliibi ń kpɔ̀ tɔb.

²³Ama ŋwiin gbantee, sii Seeyaltiyeel jipɔɔn Sooroobabeel un sá man tɔntɔnliuee, m làá ŋúbíǹ-si ditundi diba, ti-Dindaan nyɔɔbundi dee. M làá dū-si kí ŋá m-jaliiki kin m cáa nyìitī ki dāantí m-wantee, kun puee sii ní man lēē. Man ni-Dindaan Mpɔŋkɔdaan di lī míǹ.»