Read Ntcham Zacharie 1 Bible Online

Zacharie 1 - Ntcham bible

Zacharie 1

¹Daariyusi nín jíń dibeel dibinliliitiil ŋmaniniitiu poonee, ní ti-Dindaan sòon̄ nì u-bɔnaatiliu Sakari, Baraaki jipɔɔn, Didoo naantiiu.

²U bí-u yii: «Ti-Dindaan fōō ni-baabi pu diŋuul ŋkpitim pu.»

³Á tùkù Isirayeel yab yii ti-Dindaan Mpɔŋkɔdaan nín lī puee sèé yii: «Fàtīí gítiḿmaan man cee, ní ma mun ń fàtīí gítiń ni-cee. Man ni-Dindaan Mpɔŋkɔdaan di lī míǹ.

⁴Ní taa fōōmaan ni-baabi bimbim. Ŋyunti ŋun nìn jítèe, m-bɔnaatiliibi nìn dū m-nyɔɔbundi ki sòon̄ nì bi yii: <Fámaan ni-saŋkpitii nì ni-bimbikpitim>, ama baa nìn pílifiǹ-mi kaa fātìi tɔ́ mun. Ti-Dindaan Mpɔŋkɔdaan di lī míǹ.

⁵Ni-baabi gbanti bí la? M-bɔnaatiliibi gbíntìi báaa?

⁶Nì míǹ kɔkɔee, m-nyɔɔbuŋŋi nì m-bɔkpaaŋi ŋin m nìn dūu tùkū m-tɔntɔnliibi bibɔnaatiliibee nìn gbēē ni-baabi pɔbiliŋ. An di nìn yāntì bi kpántì bi-bimbim ki lī yii: <Ti-Dindaan Mpɔŋkɔdaan nín nìn lī yii ti-saŋkpitii nì ti-tuŋkpitiŋ pu u làá ŋá-ti miŋyee, míǹ ní u ŋá nee.>»

⁷Daariyusi nín jíń dibeel dibinliliitiil iŋmal saalaa nì ubɔ, uŋmal un bi yíì Seebatee poon iwiin mmuŋku nì inaa dal ní ti-Dindaan sòon̄ nì u-bɔnaatiliu Sakari, Baraaki jipɔɔn, Didoo naantiiu. Sakari nín sòon̄ tiŋyee sɔ̀.

⁸An lēē ki dàkā-mi kunyeeu gbanti. M ká utanjakal ubɔ kā utaamu un máǹ wèeeeyee pu. U nìn yú nsutantamu mun bi yíì miirtee taapu ditantakal diban. Itaamu in máń wèeeeyee nì in máǹ gàaayee nì itampiin iba mun yú u-boon.

⁹Ní m bālifì-u yii: «M-Dindaan, itaamu nee taapu là kí lì yii ba dee?» Ní ntuun ŋun bíi sòoǹ nì mee bí-mi yii: «M làá tùkù-si i-taapu nín sá puee.»

¹⁰Ní uninja un yú nsutantamu mun bi yíì miirtee kansikinee kíí yii: «An sá bin ti-Dindaan tú bí yìiǹ kí màntì kitiŋee.»

¹¹Niinee ní binibee bí ti-Dindaan tuuŋŋu ŋun yú nsutantamuee kansikinee yii: «Ti yìin̄ ki māntì kitiŋ ki kpēē, ti ká yii kitiŋ kɔkɔ bí ŋgbansɔŋfin, tiba kaa páb́ ki-nib.»

¹²Ní ti-Dindaan tuuŋŋu bí yii: «Ti-Dindaan Mpɔŋkɔdaan, a nín fōō Jeerusaleem tiŋki nì Juuda timmu mun kíǹee pu diŋuulee, abin imuŋku ita nì saalaa sèé[1]. Mimmee kí tin sāā ŋyunti ŋulɔŋu ní a làá sɔ̄ bi-saai?»

¹³Ní ti-Dindaan kíí ntuun ŋun bíi sòoǹ nì mee kunyannyaau nì dipɔɔsɔŋkil nyɔɔbundi.

¹⁴Ní ntuun ŋun bíi sòoǹ nì mee bí-mi yii ḿ bāakì ti-Dindaan Mpɔŋkɔdaan bɔti nee yii: «M cáá dineeŋkpaandi Jeerusaleem tiŋki nì Siiyɔn gbantaŋki pu tikpil.

¹⁵Ama m fōō atimbun ŋin máká ŋi-ba puee pu mbiim tikpil, di sá yii ŋyunti ŋun m nìn fōō m-nibul pu diŋuul fiiiyee, bíǹ dɔ́miń ki púntì ki nāaǹ-dì.

¹⁶An pu ní man ni-Dindaan Mpɔŋkɔdaan, m lī yii m làá fàtīí gítiń Jeerusaleem kí dàkà m-laŋŋaŋfitiiku. Bi làá fàtīí mā m-diiku niin nì Jeerusaleem tiŋki.»

¹⁷Míǹ boonee ní ntuunee bí-mi yii ḿ dū ti-Dindaan Mpɔŋkɔdaan nyɔɔbundi nee kí nàatī: «M-timmu làá fàtīí tí kɔ́ digbíl poon. M làá fàtīí sɔ̀ŋkì Siiyɔn gbantaŋki pɔbil, ní kí fàtīí tí lēē Jeerusaleem tiŋki.»