Read Ntcham Zacharie 10 Bible Online

Zacharie 10 - Ntcham bible

Zacharie 10

¹Mèèmaan ti-Dindaan ú yàntī ukpaasiitaa ń nì. Ti-Dindaan di yàntī utaa nì ki yàntī utaa ŋmóò ki tátí nì kubuŋu. U làá yàntī utaaja ń nì, ní báà ŋma saaku ń sɔ̀ŋkì timool ń nyā.

²Di sá yii awaa sòoǹ tinyimɔmbɔti ní, ní bibɔɔbi wāĺ tin kaa sá ibaamɔnee. Bi nín lèekī tidamintiil taapu puee sá inyimɔn ní, ní bi ŋmēentí binib fám. An pu ní dinibul nee yíkìi búntì nì falaa kii ipii in kaa cáá ukpaalee.

³«Bipikpaaliibi pu ní m fōō diŋuul, iŋɔjaa tafal ní m làá dáaĺ[11]. Tiŋman, man ni-Dindaan Mpɔŋkɔdaan làá dāan̄ kí kpàà m-picaŋkpuŋku, Juuda nibul. M làá dū-bi kí kpántí tinyool taamuu kí cáá-bi kí cùnnì dikɔ̀ndi.

⁴Juuda naakookun ní ditaŋkpal din tíkí kudiiyee, nì tanti kpakpaal nì bujanjatɔbu làá nyānní. Kunaakoou gbantin ní bibɔtiibi kɔkɔ làá nyānní.

⁵Bi làá dāá nīn bí kii bibaatandambee. Bi làá dāá nīn tà bi-nannanliibi ki múl̀ kii adan pu kpatee. Bi làá dāá nīn jáà míǹ, kun puee man bi-Dindaan bí bi-cee. Icoo làá cúú bi-nannanliibi bitanjakaliibi.

⁶M làá tīī Juuda yab mpɔn, m làá fīī Isirayeel yab. M làá fàtīí gíiǹ-bi bi-tiŋkin, kun puee bi kɔ́-mi falaa. Bi làá dāá nīn bí kii maa pée dū-bi ki fá ki kée. Di sá yii man di sá bi-Dindaan bi-Nimbɔtiu, ní m làá fōō bi-wimmeem.

⁷Eefiraayiim yab làá dāá nīn cáá dipɔbil kii bibaatandambee. Bi làá dāá nīn bí dipɔɔpindin kii bi nyùn̄ ndaamee. Bi-jipɔmbi yaa láa ká mimmee, bi làá dāá nīn fàal̀, ní kí nīn bí mmɔŋkpaanni ti-Dindaan pu.

⁸M làá búń ŋfoon kí yíiń m-nibul yab kí kóoǹ-bi kí kpāfì, di sá yii m fōō-bi ki líì. Bi làá dāá bùtī kii njaminee.

⁹M yāaǹ-bi atimbun kansikin, kii bi nín yàantí iwambool puee. Ama ndandati timmu gbanti poonee, bi làá téetí m-pu. Bi làá dāá nīn bí niin dimaŋfalin nì bi-biyaamu ní kí fàtīí gítiń.

¹⁰M làá dāá nyāntiń-bi Eejipiti nì Asuur timmun, ní kí kóoǹ-bi kí kpāfì. M làá dāá cáá-bi kí kɔ́ǹ Galaadi nì Leebanɔn timmun. Nì míǹ kɔkɔee, an kaa làá dāá bà-bi.

¹¹Bi làá dāá dùtī dinimbinaamandi mɔɔl[12]. Man ni-Dindaan làá dāá fáá dimɔɔl nyiŋgbanti. Niil mɔɔl làá kpā kí tin sāā taapu. Asuur ulambidaan làá lítí, ní Eejipiti kaa ti làá nīn cáá mpɔn.

¹²M làá dāá tīī m-nibul yab mpɔn, ní bí nīn ŋáań min man lèe. Man bi-Dindaan di lī míǹ.»