Read Ntcham Zacharie 11 Bible Online

Zacharie 11 - Ntcham bible

Zacharie 11

¹Leebanɔn tiŋki, pìitī a-punyɔmmu ŋŋmi ń wà a-seediri sufii[13].

²Siipreesi subu, nín̄ yáliŋkí, di sá yii seedir sufii lítì, bi nāaǹ isumɔnti gbanti. Baasan seeni sufii, nín̄ yáliŋkímaan, di sá yii bi gāā a-bambaŋku kun nìn múkú ubɔ kaa ŋūǹ kí kɔ́ee.

³Bi gbìl̀ bipikpaaliibi nín yáliŋkée, di sá yii bi-nyooti kúntì. Bi gbìl̀ gbikinti siim pu, di sá yii bi kpéelikì Jɔɔdan buŋgbandi mɔsɔŋku kɔkɔ.

⁴M-Dindaan m-Nimbɔtiu tīī-mi mara nee yii: «Kpàà ipii in bi péetí ki cáǹ kí kpɔ̀ nee.

⁵Bin dāā ipii gbantee kù-i an kaa ŋáań-bi nyàaa. Bin nyáfí-iee lì yii: <Ti jáam̀ ti-Dindaan, ti kpántì bigaajab!> I-bɔti kaa kpáàa cáá i-kpaaliibi falaa.

⁶Man ni-Dindaan di lī yii maa làá sɔ̄ kitiŋ nee pu nib saai. M làá gíiǹ unil kamaa kí ŋá u-juti nì u-bɔtiu ŋaan. Bibɔtiibi làá nùkù kitiŋ púb, ní maa làá fōō báà ubɔ bi-ŋaan.»

⁷Niinee ní m fōō ipii in binyampoobi bàà cáǹ kí kpɔ̀ee ki bíi kpàá. M yōoǹ atambɔn ali ki ŋúb́. M yíiń diba yii: <Disaasɔl>, ní ki yíiń din kíǹee yii <Mpèé>, ní m kíĺ ki bíi kpàá-i.

⁸Ní m jìn̄ bipikpaaliibi bitee uŋmabaanti poon. Míǹ boonee ní maa ti cáá kimɔtii ipii pu, ní í mun núutiǹ-mi.

⁹Niinee ní m bí-i yii: «Maa làá ti kpàà-ni! In làá kpúee ń kpú, in làá wāŋkèe ń wāŋkì, ní in làá kíńee ń nīn tɔ̀ntī tɔb!»

¹⁰Ní m cúú m-tambɔndi din m yíì <Disaasɔlee> ki kóol̀ ki kpītì dipoondi din ti-Dindaan nìn pōoǹ anibul kɔkɔee[14].

¹¹Yaadal ní dipoondi gbanti kpītì. Bibantiliibi bin dāā ipiiyee nín ká tin m ŋée, ní bi béè yii ti-Dindaan là kí dī tin m ŋée pu kí sòoǹ tiba ní.

¹²Ní m bí-bi yii: «An yaa ŋān̄ ni-cee, ní pà-mi m-paati, an yaa kaa tí sá mimmee, ní yàntī.» Ní bi pàn̄-mi m-paati jitɔmbi mmuŋku nì saalaa.

¹³Ní ti-Dindaan bí-mi yii: «Bi nín ká m-daaku nimbiŋmiiku sá puee dee! Yòon̄ animbikpaan gbanti kí cáá lúkú ukúduntil!» Ní m yōoǹ animbil jitɔmbi mmuŋku nì saalaayee ki cáa lúkú ukúduntil kunimbɔtidiin.

¹⁴Míǹ boonee ní m cúú m-tambɔndi dililiitiil din m yíì <Mpèéyee> ki kóol̀ kí yàkatī kunabitiiu kun bí Juuda yab nì Isirayeel yab kansikinee.

¹⁵Ní ti-Dindaan gíti bí-mi yii: «Á gíiǹ a-ba upikpaagbaan yam.

¹⁶Di sá yii man làá yàntī upikpaal ubɔ mun ń dāan̄ kitiŋ nee ni. Waa dāa fātìi tɔ́ ipii in wáŋkèe bɔtaaa, kaa dāa nyàab̀ in wáŋkèeyaaa, kaa dāa cāantí in būǹeeyaaa, kaa làá dāá kpíiǹ in pɔ̄ɔ̄yee mun. Ama u dāa kù in gbìfì ki cáá ŋkpamee ki ŋmóò, ki dátí ki fúkutí i-tafuŋfukuti.»

¹⁷An sá mbusu ní ki tīī upikpaagbaan un féeń u-picaŋkpuŋkuee! Bí gāā kí tùkutī u-ŋal kí lēē u-nimbil kujaaun! U-ŋal ń fáká ní u-ŋaŋgiinimbil ń kpú.