Read Ntcham Zacharie 12 Bible Online

Zacharie 12 - Ntcham bible

Zacharie 12

¹Tibɔti tin ti-Dindaan sòon̄ Isirayeel yab puee. Ti-Dindaan un kpátì kutagbɔŋu, ki báaǹ kitiŋ nyeel, ki náań kufoou ki ŋá unilinee nín lī puee sèé:

²«M làá dū Jeerusaleem tiŋki kí ŋá kii ndaam min gbéèyee ní kí tīī anibul ŋin kɔkɔ māntìi tú-kèe. Míǹ ní bi yaa láa māntìi tú Jeerusaleem kí já nì kèe, Juuda yab mun kɔkɔ làá dāá gbí.

³Ŋwiin gbantee, m làá dū Jeerusaleem tiŋki kí ŋá kii ditaŋkpakpaandi din nyìm̀ ubɔ kaa ŋūǹ kí dúkutée. Un kamaa làá dāá màkan̄ kí dúkutí-dèe làá dāá fōō tiweendi. An pu ní kitiŋ pu timbuŋŋi kɔkɔ làá dāá kpāfì kí já nì kì.

⁴Man ni-Dindaan di lī yii, ŋwiin gbantee, m làá dāá kɔ́ǹ itaamu kɔkɔ dinyoondi, ní kí dāá tɔ̄ bitanjakaliibi kuwaatiiu, ní kí dāa tɔ̄ atimbun ŋin kíǹee taamui ijɔfi. Ama m-nimbiliŋ làá nīn cɔ́ Juuda naakooku pu.

⁵Ŋwiin gbantee, Juuda yab kpilib dāa lì bi-pɔbiliŋin yii: <Isirayeel yab pɔŋŋu nyēeń ti-Dindaan Mpɔŋkɔdaan bi-Nimbɔtiu cee ní.>

⁶Ŋyunti gbantee, m làá dū Juuda yab kpilib kí ŋá kii ŋŋmi ŋun fōō didɔkpukul taapuee, àá timool tin fōō ŋŋmi difeencundi taapuee. Bi làá wà anibul ŋin bí bi-ŋaŋgiil nì bi-ŋaŋgan pú ki māntìi tú-bee. Ama Jeerusaleem yab làá dāá nīn gbíntìi kā bi-tiŋkin.»

⁷Ti-Dindaan làá dāá péé péé kí fīī Juuda yab dicaŋŋi ní, án nín làá ŋá pu Daafiidi naakookun yab nì Jeerusaleem yab ń taa dàkafì yii bíǹ jítiǹ Juuda yab bin kíǹee.

⁸Ŋyunti gbantee, ti-Dindaan làá dāá mɔ̄tì Jeerusaleem yab pu. Bi-kansikin bin sá biwɔfibee dāa kíǹ ki pɔ̄ɔ̄ kii Daafiidee, ní Daafiidi dicaŋkun yab dāa bí bi-cee kii Unimbɔtee, kii ti-Dindaan tuuŋŋuee.

⁹Ŋyunti gbanti ní m làá bɔ́ntí kí kúntí anibul ŋin kɔkɔ dāa bíi jáà nì Jeerusaleemee.

¹⁰M làá dāá dū disaasɔl nì ŋwimmeem fam kí sìtīń Daafiidi dicaŋkun yab nì Jeerusaleem yab pu. Niinee ní bí dāá fàtī bi-nimbikpeeŋu kí túĺ-mi, un tikindi bi sāā ki cíl̀ee pu[15]. Bi làá dāá sɔ̄ u-kpool, kii bi nín sūǹ dibibaabil kpool puee. Bi làá dāá sɔ̄ u-pu kii bi nín sūǹ ujipɔŋkpil kúm pu puee.

¹¹Ŋwiin gbantee, bi làá dāá nīn sūǹ ki yáliŋkí nì kunimbaau Jeerusaleem tiŋkin kii bi nín sūǹ diwaal Adaadi-Riimɔn kpool Meegiidoo tantakalin puee.

¹²Kitiŋ nee kɔkɔnee, kudicaŋu kamaa làá dāá gàntì ku-ba kí sɔ̄ dikpool. Daafiidi dicaŋkun yab bininjab làá dāá gàntì bi-ba ní binimpoobi ń dāá gàntì bi-ba, ní Naatan dicaŋkun yab bininjab ń dāá gàntì bi-ba ní binimpoobi ń dāá gàntì bi-ba,

¹³ní Leefii dicaŋkun yab bininjab ń dāá gàntì bi-ba ní binimpoobi ń dāá gàntì bi-ba, ní Simeeyii dicaŋkun yab bininjab ń dāá gàntì bi-ba ní binimpoobi ń dāá gàntì bi-ba.

¹⁴Míǹ mbaantiim ní adican ŋin kíǹee kɔkɔ yab bininjab làá dāá gàntì bi-ba ní binimpoobi ń dāá gàntì bi-ba.