Read Ntcham Zacharie 13 Bible Online

Zacharie 13 - Ntcham bible

Zacharie 13

¹«Ŋwiin gbantee, nnyim làá nyānní nnyimbul ŋubɔ poon kí fíntí Daafiidi dicaŋkun yab nì Jeerusaleem yab kpitii nì bi-jɔkɔnti.»

²Ti-Dindaan Mpɔŋkɔdaan bí yii: «M làá dāá kúntí awaa ŋin bí kitiŋ nee poonee, ní bí súntí ŋi-yiŋŋi pu. M làá dāá kúntí bin mɔ́ntí yii bi sá m-bɔnaatiliibee, ní kí lēē diwaatootil landɔkɔŋu bi-ni.

³Ubɔ yaa láa yíkì ki bí yii u sá m-bɔnaatiliuee, úǹ u-ba baa nì u-na di làá dāá tùkù-u yii: <A máaǹ ŋkúm, di sá yii tin a sòoǹ nee, a bíi mɔ́ntí ti-Dindaan nyɔkɔpu ní.> Ní ŋyunti ŋun u bíi sòoǹ tinyimɔmbɔti m-nyɔkɔpuee ní u-baa nì u-na ń dū kitàataajiki kí sāā kí kpɔ̀-u.

⁴Ŋwiin gbantee, icoo làá dāá cúú bibɔnaatiliibi bí nàatī tibɔti kí sòoǹ tin bi kée. Mimmee baa dāa gíti kíikí kí dū bibɔnaatiliibi bɔkutiŋ ŋin sá ŋgbanee kí pèen̄ kí mɔ̄ntì binib.

⁵Ama báà ŋma làá dāá lì yii: <Maa sá Unimbɔti bɔnaatiliu, man sá ukpaal ní. Doooo m-biyatin ní m bōō ki kù.>

⁶Ní bi yaa láa bālifì-u yii: <A ká la tiweendi tin kā a-bindi pu na?> U làá dāá kíí yii: <An sá m-bɔɔbi dumpu ní m ká tiweendi gbanti.>»

⁷Ti-Dindaan Mpɔŋkɔdaan lī yii: «Kitàataajiki, yīkì kí já nì m-pikpaaliu, kí já nì unil un bí ki pìl̄-mee. Fáá kí kpɔ̀ upikpaal ipii làá yàl̄[16], ní ḿ fàtīí nyā mpibiyaamu pu.»

⁸Ti-Dindaan gíti lī yii: «Bi yaa cúú kitiŋ nee nib ki yākatì mitee, mili pu làá kpú ní diba pu ń ŋmátí.

⁹M làá fíntí bin kíǹ kaa kpíì gbantee jɔkɔnti kí cɔ̄ŋkì kí kpèè kii bi nín dù tikúti nì sindaariya kí ŋá ŋŋmin kí cɔ̄ŋkì kí kpèè puee ní. Niinee bi làá dāá yíiń-mi ní man ḿ dāá kíí-bi. M làá dāá lì-bi yii bi sá <m-nibul> ní bi mun ń dāá lì-mi yii: <M-Nimbɔtiu di sá m-Dindaan[17].>»