Read Ntcham Zacharie 14 Bible Online

Zacharie 14 - Ntcham bible

Zacharie 14

¹Ti-Dindaan wiiŋŋu[18] tóobiń. Jeerusaleem yab, ni-nimbilaaliyin ní bi làá dāá yàkatī ni-gaajawanti.

²Di sá yii ti-Dindaan làá dāá kóoǹ atimbun kɔkɔ nib kí kpāfì bí já nì Jeerusaleem tiŋki. Bi làá dāá já kí fōō kitiŋ, kí dāá fūkul̀ adiin, ní kí cúú binimpoobi kí dòon̄ nì bi mpɔn. Bí làá dāá cúú ki-nib dijandi kí cùnnì kuyuŋu, ama dijandi din kíǹee làá gbíntí kí nīn bí kitiŋin.

³Niinee ti-Dindaan làá nyā kí já nì atimbun gbanti. U làá dāá já kii u nín pée kpààa jáà pu njanjawiinee.

⁴Ŋwiin gbantee, u làá dāá dāan̄ kí yūĺ Ɔliifi sufii jool pu, Jeerusaleem caŋin ŋwìiń nyalaŋki pú. Ɔliifi sufii jool làá dāá búkutí kansikin nì kansikin ní ditantakakpaandi diba ń dòon̄ ŋwìiń nyalaŋki pú nì ŋwìiń jeetilaŋki pú. Dijoolee dibukul diba làá búntí ŋgan pú, ní din kíǹee ń búntí ŋgiil pú.

⁵Ni làá dāá sāǹ kí dī ditantakal din dɔ̄ ajoon kansikin nee, di sá yii dì dāa dɔ̄ kí tin sāā Asaal tiŋki. Ni làá dāá sāǹ kii Juuda bɔtiu Oosiyasi yuntiŋu, kitiŋ nín nìn cīŋkì ni-naanjab nìn sáǹ puee ní. Niinee ti-Dindaan m-Nimbɔtiu ń bàń, u nì u-circir tuuŋyi kɔkɔ.

⁶Ŋwiin gbantee unil kaa dāa gíti nyàab̀ ŋwalifi. Tiwool dāa kpáaa, nsɔnsɔm mun dāa kpá.

⁷Ŋwiin gbanti làá dāá nyā ŋu-ba, ti-Dindaan baba di nyí ŋwiin gbanti. An kaa dāa gíti cáá yii ŋwiimpu sɔ̀ɔɔ, kunyeeu sɔ̀. Báà kujoopɔŋ gba, an dāa wāĺ ní.

⁸Ŋwiin gbantee nnyim min tìì dimaŋfalee làá nyānní Jeerusaleem tiŋkin. Nnyimee dijandi làá nīn pùub̀ ki cá Ŋyaam mɔɔlin, ní dijandi din kíǹee ń nīn pùub̀ ki cá Meediiteeranee tiŋkuun. Án làá nīn bí míǹ ní dipeel pu nì kuseeun kɔkɔ.

⁹Ti-Dindaan di dāa sá kitiŋ kɔkɔ bɔtiu. Ŋwiin gbantee ti-Dindaan baba di làá nīn sá Unimbɔti, ní u-yindi baba ní binib làá nīn nyí.

¹⁰Kitiŋ nee kɔkɔ làá dāá kpántí kitimpiliŋ, kí yòon̄ Geeba ŋgan pú kí tin cáá sāā Riimɔn tiŋki ŋgiil pú. Jeerusaleem tiŋki làá dāá nīn tɔ́kɔ́ yilpu, kí wàan̄ kí kíĺ Beenjameen punyɔkɔki kí tin sāā diguŋkpindi punyɔkɔki, laakin kipunyɔɔkpikii nìn bée. Kì làá nìkī kí kíĺ Ananeeyeel difɔkɔku kí tin cáá sāā ubɔti kpaabun laakin bi ŋmāam̀ ndamamee.

¹¹Binib làá dāá nīn kóò Jeerusaleem tiŋkin, baa làá ti nàan̄-kì, ní binib làá dāá nīn kóò ki-ni nì ŋgbansɔŋfi.

¹²Ditafadaaldi din ti-Dindaan làá dūú dáaĺ anibul ŋin kɔkɔ jáń nì Jeerusaleemee sɔ̀. Bi dáá kā ki wāĺ ní bi-wunnanti ń sūū, ní bi-nimbiliŋ ń sūū bi-nimbisɔntin, ní bi-limbiliŋ ń sūū bi-nyɔmmun.

¹³Ŋwiin gbantee, ti-Dindaan làá dāá dū dinyoondi kí tɔ̄ bi-pu. Bi làá dāá fàtīí nyā tɔb pu ní kí kíĺ ki bíi jáà.

¹⁴Juuda yab làá dāá já kí mɔ̄tì Jeerusaleem pu. Bi làá dāá kóoǹ atimbun ŋin māntìi tú-bee gaajawanti kɔkɔ. Bi làá dāá kóoǹ sindaariya nì animbil nì tiwampeeŋkaal tikpil kí kpúkuń.

¹⁵Ditafadaaldi gbanti dibaantiil di làá dāá jēetí itaamu nì imamboon nì igutaamu nì mmamu nì tiwaŋkuti tin kɔkɔ bí binannanliibi janjanaapaal puee pu.

¹⁶Niinee atimbun ŋin nìn jáń nì Jeerusaleem tiŋki, ki bí kaa kpíìyee, làá nīn jɔ́ḿ dibintil kamaa kí gbàan̄ ubɔti, ti-Dindaan Mpɔŋkɔdaan nimbiin kí jī tantib jiŋaaliu.

¹⁷Ama kitiŋ pu nibul diba yaa kaa dāa cūtì Jeerusaleem kí gbàan̄ ubɔti ti-Dindaan Mpɔŋkɔdaan nimbiinee, utaa kaa làá dāá nì di-tiŋki pu.

¹⁸Eejipiti yab yaa yíì kaa jɔ́m̀ Jeerusaleem kí jī tantib jiŋaaliuee, nnaabu ŋubɔ làá jēetí bi-pu kii atimbun ŋin yíì kaa cūtìi jíń jiŋaal gbantee.

¹⁹Eejipiti yab nì atimbun ŋin kɔkɔ yíì kaa cūtìi jíń tantib jiŋaaliuee tafadaaldi nín dāa sá puee dee.

²⁰Ŋwiin gbantee bi dāa ŋmà itaamu waŋkilimmu pu yii: <Bi dūu sú ti-Dindaan>. Míǹ ní akumboo ŋin yú ti-Dindaan diikunee dāa sá circir wanti kii asambil ŋin yú nsaraafan nimbiin bi ŋáań fatiku poon ki cáa yàantí nsaraafan puee.

²¹Bi làá dāá dū akumboo ŋin kɔkɔ bí Jeerusaleem nì Juuda timmunee kí sú ti-Dindaan Mpɔŋkɔdaan. Bin kɔkɔ dāa dòoń ki ŋáań saraabee dāa cáa tɔ̄kɔntí saraabi nanti. Ŋwiin gbanti yaa láa bāańee, baa dāa gíti kāntí ubantil ubɔ ti-Dindaan Mpɔŋkɔdaan diikun.