Read Ntcham Zacharie 2 Bible Online

Zacharie 2 - Ntcham bible

Zacharie 2

¹M wáaǹ ki kpēē kutaayee ní ki ká iyin inaa[2].

²Ní m bālifì ntuun ŋun bíi sòoǹ nì mee yii: «Iyin nee taapu là kí lì yii ba ní?» Ní ŋu kíí-mi yii: «Iyin nee sá atimbun ŋin jìn̄ Juuda nì Isirayeel nì Jeerusaleem yab ki yàl̄ee ní.»

³Míǹ boonee, ti-Dindaan lēē bicaabi binaa ki dàkā-mi.

⁴Ní m bālifì yii: «Bi dɔ́miń kí ŋá ba ní?» Ní ŋu kíí-mi yii: «Bi dɔ́miń kí kɔ́ǹ atimbun ŋin jìn̄ Juuda yab ki yàl̄ee dinyoondi kí nàan̄-ŋi ní. Bi jìn̄ Juuda yab bi yàl̄ an kɔkɔ pu ní ubɔ kaa ŋúń ki yúl̀ bi-nimbiin.»

⁵M wáaǹ kutaayee ní an lēē ki dàkā-mi. M ká uninja ubɔ u ŋúb́ ŋŋmii ŋun bi cáa ŋmàntēe u-ŋaan[3].

⁶Ní m bālifì-u yii: «A cá la?» Ní u kíí-mi yii: «M cá kí ŋmàntī Jeerusaleem tiŋki kí béé ki-púuŋŋu nì ki-waaŋŋu nín sá puee.»

⁷Niinee ní ntuun ŋun bíi sòoǹ nì mee cōom̀ ki nín cá ní ŋubɔ mun cōom̀ ki túŋkiǹ-ŋu.

⁸Ní ŋu bí ŋun túŋkí-ŋuee yii: «Sāǹ kí cùú tùkù unaacimpɔɔn un ŋúb́ ŋŋmii nee yii: <Jeerusaleem tiŋki kaa làá dāá nīn cáá digundi, binib nì tiwaŋkuti wíiŋŋu pu.

⁹Ti-Dindaan Mpɔŋkɔdaan nín sòon̄ puee sɔ̀. Man m-ba làá nīn bí bi-cee kí nīn sá kii ŋŋmi gundee kí màntīí tù kitiŋ, ní kí lēē m-nyooti kí dàkà ki-kansikin.>»

¹⁰Ti-Dindaan lī yii: Ēeyi! Nimbi bin m nìn jìn̄ ni yàl̄ an kɔkɔ pu, ki bíń ŋgan nì ŋgiil púee, ŋwìiń nyalaŋki nì ŋu-jeetilaŋki púee, sām̀maan kɔŋkɔnnee, nyānnímaan ŋgan pú tiŋkin.

¹¹Ēeyi! Nimbi Jeerusaleem yab bin bíń Babiloon tiŋkin kuyuŋuee, sām̀maan malaa kí ŋmátí.

¹²Ti-Dindaan Mpɔŋkɔdaan un túnní-mi ki tīī-mi mpɔnee nín sòon̄ atimbun ŋin fúkúl̀-nee puee sèé: «Un kamaa yaa gbēē-nee gbēē man nimbibul dee.

¹³Tiŋman, m làá já nì atimbun gbanti yab. M làá yàntī bin bi nìn cúú kuyuŋuee ń fūkul̀-bi. Niinee, ni làá dāá béé yii ti-Dindaan Mpɔŋkɔdaan di túnní-mi.

¹⁴Jeerusaleem tiŋki, kúuǹ nì dipɔɔpindi, nín̄ fàal̀. Di sá yii m dòoń kí dāá nīn kóò a-cee. Ti-Dindaan di lī míǹ.

¹⁵Ŋwiin gbantee, atimbun tikpil làá dāá dū ŋi-ba kí nákáǹ man ni-Dindaan. Ŋi làá dāá kpántí m-nibul. M làá dāá nīn kóò ni-kansikin.» Niinee, ni làá dāá béé yii ti-Dindaan Mpɔŋkɔdaan di túnní-mi ni-cee.

¹⁶Juuda tiŋki làá dāá fàtīí kpántí ti-Dindaan gaajawanti circir tiŋki. U làá dāá fàtīí tí lēē Jeerusaleem kí nīn sá u-tiŋki.

¹⁷Tiwan tin kɔkɔ cáá kufoouee ń ŋmīĺ fɔ́ŋfɔŋ díkí diki ti-Dindaan nimbiin. Di sá yii u làá yīkìí nyānní u-circir kɔŋkooŋŋun.